Reuniaun boot ba loron tolu husi Testemuña ba Jeová iha tinan 2009
1. (a) Hodi tuir programa hotu durante loron tolu iha reuniaun boot, bensaun saida deʼit mak ita sei hetan? (b) Planu saida deʼit mak ita sei halo agora kedas?
1 Ita hotu hein atu tuir reuniaun boot ba loron tolu iha tinan 2009. Ida-neʼe mak oportunidade ida tan atu halibur hamutuk ho ita-nia maluk sira neʼebé adora Maromak Jeová, neʼebé “kiak iha laran [‘hanoin kona-ba sira-nia presiza espirituál’, MF]”. (Mt 5:3) Tanba Maromak Jeová nia loron boot besik ona, ami hakarak tebes imi atu tuir programa hotu durante loron tolu iha reuniaun boot neʼe. Hodi nuneʼe, ita bele haksolok hamutuk ho ita-nia maluk kristaun no mós bele simu hahán espirituál neʼebé sei ajuda ita atu hamriik metin iha fiar. (Sof 1:14) Tan neʼe, diʼak atu fó-hatene nanis Ita-nia mestre ka mestra no patraun katak reuniaun boot neʼe mak parte importante husi ita-nia adorasaun. Ho aten-brani halo planu nanis no buka Maromak Jeová nia bensaun; Ita bele fiar katak Nia sei ajuda Ita.—Isa 50:10.
2. Maski ita sei la tuir reuniaun boot internasionál, oinsá mak reuniaun boot iha tinan 2009 sei sai la hanesan baibain?
2 Reuniaun boot internasionál: Tanba reuniaun boot internasionál sei halaʼo iha rai balu deʼit, ema neʼebé hetan konvite deʼit mak sei tuir. Se ita halo tuir matadalan neʼe, sei la iha problema hanesan reuniaun-fatin ida sai nakonu ho ema barak liu. (1 Kor 14:40; Ebr 13:17) Maibé reuniaun boot balu sei sai hanesan reuniaun boot internasionál, tanba misionáriu no irmaun-irmán sira neʼebé serbí iha rai seluk sei asiste reuniaun boot neʼe iha sira-nia rai rasik.
3. Oinsá mak ita bele hatudu domin kristaun ba irmaun balu iha ita-nia kongregasaun?
3 Ajuda ema seluk atu tuir: Ema balu husi Ita-nia kongregasaun presiza ajuda atu tuir reuniaun boot neʼe ka lae? Se Ita ajuda ema seluk atu tuir, Ita la ‘buka Ita rasik nia diʼak, maibé buka uluk ema seluk nian’.—Flp 2:4.
4, 5. Se Ita atu tuir reuniaun boot iha rai seluk, karik Ita presiza halo saida?
4 Buka informasaun: Atu hamenus ema neʼebé kontaktu sukursál atu husu kona-ba data no fatin ba reuniaun boot, favór ida haree uluk Menara Pengawal 1 Maret 2009 ka husu sekretáriu husi Ita-nia kongregasaun kona-ba informasaun neʼebé Ita presiza.
5 Se Ita atu tuir reuniaun boot iha rai seluk, karik Ita presiza hakerek karta ba departamentu neʼebé tau matan ba hela-fatin iha neʼebá hodi husu Recommended Lodging List (Lista kona-ba otél besik reuniaun-fatin). Ita bele hetan departamentu neʼe nia diresaun iha formuláriu Special Needs Room Request (Formuláriu atu husu kona-ba hela-fatin tuir ida-idak nia presiza) nia kotuk. Ami sei haruka formuláriu neʼe ba kongregasaun ida-idak nia sekretáriu. Se Ita hakarak simu fali surat husi departamentu neʼe, la haluha atu tau envelope ida neʼebé hakerek ona Ita-nia diresaun hamutuk ho Ita-nia karta atu nuneʼe sira bele haruka fali.
6. Hodi halo saida deʼit mak haklaken-naʼin ida bele hetan ajuda kona-ba hela-fatin?
6 Presiza espesiál: Se haklaken-naʼin ida presiza hela-fatin, Kongregasaun nia Grupu Serbisu tenke haree se haklaken-naʼin neʼe kumpre kritériu atubele hatama formuláriu Special Needs Room Request. Sira tenke haree fali matadalan husi formuláriu neʼe no surat ho data 14 Dezembru 2008, neʼebé haruka tiha ona ba grupu katuas sira, antes kongregasaun nia sekretáriu haruka formuláriu ba departamentu hela-fatin nian.
7. Kuandu hela iha irmaun ruma nia uma, oinsá mak ita bele hatudu respeitu ba irmaun neʼe?
7 Departamentu hela-fatin nian halo arranju atu fó hela-fatin ba sira neʼebé la iha dalan seluk atu buka hela-fatin. Hela-fatin hanesan neʼe, laʼós ba sira neʼebé iha osan atu selu otél maibé lakohi gasta sira-nia osan. Liután neʼe, ladún diʼak atu aproveita irmaun uma-naʼin nia laran-diʼak hodi hakarak hela loron balu antes ka depois reuniaun boot. Hela-fatin sira-neʼe, fó deʼit durante reuniaun boot. Sira neʼebé simu hela-fatin hanesan neʼe no oan sira mós tenke hatudu respeitu ba uma-naʼin, hodi la estraga uma-naʼin nia sasán, ka la tama sira-nia kuartu privadu. Se uma-naʼin hasoru problema kona-ba neʼe, nia tenke fó-hatene kedas ba irmaun katuas neʼebé tau matan ba departamentu hela-fatin nian iha reuniaun boot. Irmaun neʼe sei prontu atu ajuda.
8. Kuandu rezerva otél, ita tenke kuidadu kona-ba saida?
8 Rezerva otél: Kuandu Ita rezerva otél, halo tuir buat tuirmai neʼe:
◼ Telefone iha oras neʼebé sira halaʼo serbisu.
◼ Fó-hatene ho klaru data neʼebé Ita halo check in no check out.
9. Kuandu ita prepara atu asiste reuniaun boot ba loron tolu iha tinan 2009, ita hanoin uluk kona-ba saida?
9 Hahalok neʼebé fó glória ba Maromak: Importante atu ita koʼalia no hatudu hahalok diʼak nuʼudar ema kristaun, liuliu kuandu hasoru ema serbisu-naʼin sira iha otél no ema seluk iha sidade neʼebé halaʼo reuniaun boot. Hodi nuneʼe, ita bele halo Maromak Jeová nia povu nia naran sai diʼak no mós ajuda atu ema ida la sidi. (1 Kor 10:31; 2 Kor 6:3, 4) Ami hein katak Ita sei fó glória ba Maromak hodi asiste no mós hodi hatudu hahalok diʼak iha reuniaun boot iha tinan 2009!—1 Ped 2:12.
[Kaixa iha pájina 5]
Oras atu halaʼo programa:
Loron-kinta
(Reuniaun boot internasionál deʼit)
Tuku 1:20 lokraik - 4:55 lokraik
Loron-sesta no sábadu
Tuku 9:20 dadeer - 4:55 lokraik
Loron-domingu
Tuku 9:20 dadeer - 4:00 lokraik
[Kaixa iha pájina 6]
Pontu importante neʼebé fó sai ona iha Ita-nia Serbisu Reinu nian iha tempu uluk:
Hatudu hahalok diʼak
◼ Halo tuir buat neʼebé otél-naʼin husu
◼ Tau matan didiʼak ba oan sira
◼ Respeitu ema seluk
Rona iha reuniaun boot
◼ Hanoin didiʼak kona-ba tema
◼ Loke no lee eskritura sira
◼ Hakerek nota badak
◼ Buka pontu sira neʼebé ita sei halo tuir iha ita-nia moris
◼ Hanoin filafali buat neʼebé ita aprende
Hatais diʼak
◼ Kuandu laʼo toʼo reuniaun-fatin
◼ Iha reuniaun-fatin
◼ Kuandu deskansa no halimar