Uza Bíblia ho matenek
1. Bíblia ajuda ita iha dalan saida deʼit?
1 Ita-nia matenek atu uza Maromak nia Liafuan, ajuda ita atu haklaken no hanorin lia-loos iha dalan neʼebé klaru. Ida-neʼe inklui atu esplika lia-loos kona-ba hanorin sira neʼebé falsu no ema nia tradisaun neʼebé la tuir Bíblia.—2 Tim 2:15; 1 Ped 3:15.
2. Saida mak sei ajuda ita atu hetan lalais eskritura sira ho matenek?
2 Hatene liután Bíblia: Kuandu ita hatene liután kona-ba sasán ruma, ita bele uza sasán neʼe iha dalan diʼak liután. Nuneʼe, hodi lee Bíblia husi primeiru toʼo ikus sei ajuda ita atu hatene diʼak liután kona-ba Bíblia tomak nia tema. Ida-neʼe mós ajuda ita atu hanoin-hetan no hetan eskritura sira lalais. Nuʼudar ita-nia matenek kona-ba Bíblia aumenta, ita sei haklaken lia-loos ba ema seluk ho laran-manas.—1 Tes 1:5.
3, 4. (a) Iha dalan saida deʼit mak ita bele hatene liután Bíblia? (b) Saida mak ajuda Ita rasik atu hatene liután Eskritura sira?
3 Sai toman atu loke no lee tuir Bíblia iha reuniaun sira. Kuandu ita estuda mesak no prepara reuniaun sira, lee eskritura sira iha livru neʼebé ita estuda daudauk, no hanoin kleʼan oinsá mak eskritura sira kona ho informasaun. Ema barak hanoin katak lee kedan eskritura husi Bíblia, duké lee husi komputadór ka husi surat-tahan neʼebé print, neʼe ajuda sira atu hetan lalais eskritura neʼebé sira presiza kuandu sira haklaken.—Joao 14:26.
4 Família balu arranja tempu hodi sira bele dekór eskritura sira. Karik sira uza surat-tahan neʼebé hakerek eskritura iha oin no iha kotuk hakerek liafuan husi eskritura neʼe. Sira halo ida-neʼe hodi troka malu atu haree se sira bele hanoin-hetan liafuan sira husi eskritura, ka bele hetan eskritura iha neʼebé. No mós, hodi treinu atu uza Bíblia kuandu haklaken, kuandu hatán ema nia pergunta, no kuandu ema koko hapara ita-nia koʼalia, bele aumenta ita-nia matenek kona-ba Bíblia.
5. Tansá mak ita hakarak aumenta ita-nia matenek kona-ba Bíblia?
5 La iha livru seluk neʼebé bele kompara ho Bíblia. Liafuan husi Bíblia laran deʼit mak bele ajuda ema simu “hanorin atu hetan maksoin”. (2 Tim 3:15) Entaun, diʼak atu aumenta ita-nia matenek atu hatudu ba ema seluk saida mak Bíblia promete, tanba ema barak iha ita-nia haklaken-fatin seidauk hatene rikusoi iha Bíblia laran.—Prov 2:1-5.