Buka sira neʼebé merese lia-foun diʼak
1. Oinsá mak ita hatudu katak ita hafolin ita-nia knaar atu haklaken?
1 Kuandu Jesus iha mundu, nia bá haklaken lia-foun diʼak iha fatin barak hodi fó kmaan ba ema laran-maus. (Isa 61:1, 2) Nuʼudar embaixadór ba Maromak nia Reinu no ema neʼebé serbisu ho embaixadór sira, ohin loron ita iha knaar neʼebé furak atu halo tuir Jesus. Nuneʼe ita la para atu halaʼo ita-nia serbisu, maibé ita buka nafatin sira neʼebé merese lia-foun diʼak iha ita-nia haklaken-fatin.—Mt 10:11; 2 Kor 5:20.
2. Apóstolu Paulo haklaken tuir ema nia situasaun. Oinsá mak nia halo ida-neʼe? Neʼe lori rezultadu saida?
2 Koʼalia tuir situasaun: Apóstolu Paulo iha toman atu haklaken iha sinagoga sira, nia fó sasin ba ema judeu no ema seluk husi rai oioin neʼebé tuir fali relijiaun judeu nian. (Apos 14:1) Iha sidade Filipe, Paulo no Silas bá haklaken iha fatin neʼebé ‘sira hanoin katak iha uma orasaun ruma’. Sira hahú haklaken ba feto lubun ida, sira-neʼe ida naran Lidia, nia lalais deʼit simu lia-loos.—Apos 16:12-15.
3. Ita mós iha oportunidade atu haklaken iha fatin saida deʼit?
3 Hodi halo tuir Paulo, ita mós bele haklaken iha fatin oioin hanesan, fatin atu hein karreta, jardín, serbisu-fatin, iha dalan, loja, no fatin seluk tan. Iha fatin seluk ita la bele hakbesik uma-naʼin tanba sira iha seguransa neʼebé hein uma, se nuneʼe, karik ita bele haklaken ba uma-naʼin hodi uza telefone ka karta. Sai prontu nafatin atu haklaken no koʼalia tuir ema nia situasaun iha ita-nia haklaken-fatin, ida-neʼe sei ajuda ita atu “badinas nafatin ba Naʼi nia serbisu”.—1 Kor 15:58.
4. Ita bele halo saida se ita-nia kongregasaun nia haklaken-fatin ladún luan?
4 Haklaken-naʼin barak aumenta sira-nia serbisu haklaken hodi muda ba rai seluk atu ajuda kongregasaun neʼebé presiza sira-nia ajuda. Irmaun-irmán seluk tan maski la muda ba rai seluk, sira aprende língua foun hodi sira bele haklaken ba ema neʼebé mai husi rai liʼur.
5. Ita presiza hanoin nafatin saida kona-ba mundu neʼe? Ita hakarak hakaʼas an atu halo saida?
5 Ita hotu labele haluha katak “toʼos mak mundu” tomak. (Mt 9:37; 13:38) Hodi hanoin nafatin katak mundu aat neʼe nia rohan besik ona, diʼak se ita ida-idak uza ita-nia matenek no buka oportunidade atu aumenta ita-nia serbisu haklaken. Maromak Jeová promete katak se ita tau uluk ninia Reinu iha ita-nia moris, nia sei fó bensaun ba ita-nia hakaʼas-an atu aumenta ita-nia serbisu haklaken.—Mt 6:33.