Hetan benefísiu husi Jesus nia sakrifísiu
Tinan ida dala ida, Testemuña ba Jeová no ema millaun ba millaun iha mundu tomak sei halibur hamutuk atu komemora Jesus nia mate hodi tuir ninia mandamentu. (Lucas 22:19) Komemorasaun neʼe ajuda ita atu hafolin buat neʼebé Jesus halo ona atu salva ema. Neʼe mós ajuda ita komprende oinsá mak ninia sakrifísiu fó impaktu ba ita-nia moris agora no iha futuru.—João 3:16.
Maski Ita asiste ka la asiste komemorasaun iha tinan neʼe, oinsá mak Ita bele hetan benefísiu husi Jesus nia mate? Jesus hanorin katak ita presiza halo buat rua neʼebé importante:
1. Aprende kona-ba Maromak no Jesus. Iha Jesus nia orasaun ba ninia Aman iha lalehan, nia dehan: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit, no mós Jesus Kristu neʼebé Ita haruka mai.”—João 17:3.
2. Halo tuir buat neʼebé Ita aprende. Jesus hatete katak ita presiza duni atu aplika ninia hanorin sira iha ita-nia moris. Porezemplu, bainhira nia hanorin ema-lubun iha foho ida, nia gaba ema neʼebé “rona [ninia] liafuan no halo tuir”. (Lucas 6:46-48) Iha tempu seluk, nia dehan: “Se imi hatene buat sira-neʼe, ksolok ba imi kuandu imi halo tuir.”—João 13:17.
Ita hakarak aprende liután kona-ba Maromak no Jesus ka lae? Ita hakarak hetan matadalan kona-ba oinsá atu aplika buat neʼebé Ita aprende? Tuirmai mak dalan balu neʼebé bele ajuda Ita.
Kursu Bíblia
Ami-nia kursu Bíblia interativu neʼebé gratuitu ajuda ona ema barak atu aprende Bíblia no aplika iha sira-nia moris.
Atu hatene liután kona-ba kursu neʼe, haree pájina Kursu Bíblia ho Testemuña ida.
Haree vídeo Benvindu ba Ita-nia kursu Bíblia atu hatene oinsá mak Testemuña ba Jeová halaʼo estuda Bíblia ho ema.
Testemuña ba Jeová nia reuniaun sira
Testemuña ba Jeová halibur hamutuk semana ida dala rua iha Reuniaun-Fatin. Iha reuniaun sira-neʼe, ami aprende kona-ba Bíblia no oinsá atu aplika buat neʼebé ami aprende iha ami-nia moris.
Ema naran deʼit bele tuir reuniaun neʼe; Ita la presiza sai Testemuña ba Jeová atu bele tuir. Depende ba Ita-nia situasaun, Ita bele hili atu tuir iha Reuniaun-Fatin ka liuhusi konferénsia vídeo.
Atu hatene kona-ba Testemuña ba Jeová nia reuniaun sira, haree vídeo Oinsá mak ami halaʼo reuniaun sira?
Atu buka-hatene reuniaun neʼebé halaʼo besik iha Ita-nia área, haree pájina Reuniaun kongregasaun nian husi Testemuña ba Jeová.
Informasaun no vídeo sira
Informasaun no vídeo sira iha website neʼe bele ajuda Ita atu aprende liután kona-ba Jesus nia hanorin no benefísiu saida mak Ita bele hetan liuhusi ninia mate.
Porezemplu, atu aprende oinsá mak ema ida nia mate bele lori benefísiu ba ema barak, lee informasaun “Oinsá mak Jesus bele salva ita?” no “Tanbasá mak Jesus tenke terus no mate?” ka haree vídeo Tanbasá mak Jesus mate?