Haʼu sempre haree buat neʼebé la iha justisa

HAʼU moris iha tinan 1965 husi família neʼebé kiak iha Irlanda Norte. Haʼu boot iha County Derry durante “tempu susar”, neʼe mak tempu funu entre ema katóliku ho protestante durante tinan 30 nia laran. Iha ami-nia rai, ema katóliku mak uitoan liu, tan neʼe, ema protestante sira hanehan katóliku, hanesan fó-sala ba ami kuandu iha krime, no halo susar ba ami atu hetan serbisu no hela-fatin.

Iha fatin hotu, haʼu sempre haree buat neʼebé la iha justisa. Haʼu la bele sura dala hira mak ema baku haʼu, hatún haʼu husi karreta no see kilat mai haʼu. Polísia no soldadu sira mós investiga haʼu beibeik. Nuʼudar haʼu sai vítima, haʼu hanoin: ‘Haʼu labele simu deʼit, maibé tenke luta hasoru situasaun neʼe!’

Haʼu hola parte iha marxa “Domingu Raan nian” hodi komemora ema naʼin-14 neʼebé soldadu Bretaña sira tiru mate iha tinan 1972, no ami mós halo demonstrasaun atu komemora ema dadur sira neʼebé protesta hodi lakohi han toʼo mate iha tinan 1981. Liután neʼe, iha fatin hotu haʼu hasaʼe bandeira Irlanda Norte nian neʼebé bandu no hakerek liafuan neʼebé kontra hasoru governu. Maibé haʼu haree katak ema katóliku neʼebé protesta governu mós sempre halo violénsia no oho ema. Dala barak demonstrasaun sira mós ikusmai sai runguranga no nakonu ho violénsia.

Kuandu haʼu tama universidade, haʼu hola parte iha demonstrasaun atu defende ambiente. Depois, haʼu muda ba Londres, no haʼu partisipa iha demonstrasaun atu kontra hasoru governu tanba haʼu haree katak sira todan ba sorin no la hanoin ema kiak sira. Haʼu mós hola parte iha serbisu-naʼin sira-nia protesta kona-ba saláriu. Iha tinan 1990, haʼu partisipa iha marxa atu protesta kona-ba impostu, no iha tempu neʼe, partisipante sira estraga fatin públiku boot ida naran Trafalgar Square.

Neineik-neineik haʼu sai laran-tun, tanba ami la konsege hetan buat neʼebé ami hakarak no ami sai nervozu liután.

Iha tempu neʼebá, haʼu koñese malu ho Testemuña ba Jeová liuhusi kolega ida. Sira hanorin haʼu husi Bíblia katak Maromak hanoin ita-nia terus no nia sei halakon ema nia susar hotu. (Isaías [Yesaya] 65:17; Apokalipse 21:3, 4) Maski ema iha hakarak neʼebé diʼak, maibé sira la konsege hadiʼa buat neʼebé la tuir justisa. Ita presiza laʼós deʼit Maromak nia matadalan, maibé mós ninia forsa atu luta hasoru forsa aat neʼebé hamosu problema oioin iha mundu neʼe.—Jeremias (Yeremia) 10:23; Efeso 6:12.

Agora, haʼu sente katak haʼu-nia hakaʼas-an uluk nian mak hanesan buka atu hadiʼa tali iha ró laran maski ró rasik mak mout daudaun. Lakleur tan, mundu neʼe sei sai nakonu ho justisa no sei la iha tan ema neʼebé hanehan ema seluk, no ida-neʼe halo haʼu sente kmaan.