Hahalok sira neʼebé diʼak husi tempu uluk toʼo agora​—Laran-metin

BÍBLIA NIA MATADALAN: “Ema hotu tenke respeitu moris kaben nian, no keta hafoʼer relasaun kaben nian.”—Ebreu 13:4.

OINSÁ MAK HAHALOK NEʼE LORI DIʼAK BA ITA? Ema balu hanoin Bíblia nia liafuan sira-neʼe la vale ona. Maibé hanoin neʼe mak sala duni! Hanesan deʼit ho tempu Bíblia nian, ohin loron mós se feen ka laʼen ida la hatudu laran-metin ba ninia kaben, neʼe halo nia kaben sai laran-kanek.—Provérbios (Amsal) 6:34, 35.

Laʼen ida neʼebé iha ona oan, naran Jessie hatete: “Tanba haʼu ho haʼu-nia feen laran-metin ba malu, ida-neʼe halo ami-nia moris kaben nian sai metin no haksolok. Tau fiar ba malu mak buat neʼebé importante tebes ba feen-laʼen. Se ida la laran-metin ona, neʼe halo ida seluk la bele fiar tan.” Hanoin mós oinsá mak hahalok la laran-metin bele fó impaktu ba oan sira!

Feen ida naran Ligayaa neʼebé uluk besik atu sobu ninia moris kaben nian, dehan: “Haʼu ransu ho ema neʼebé ladiʼak. Ikusmai haʼu toman halimar iha liʼur toʼo kalan-boot no toba hamutuk ho mane seluk.” Moris hanesan neʼe halo Ligaya kontente ka lae? Lae. Nia sempre haksesuk malu ho ninia laʼen, no sente laran-tun beibeik. Nia hatutan tan: “Bainhira haʼu hanoin fali ami-nia moris runguranga neʼebé haʼu halo, haʼu komprende duni liafuan neʼebé uluk haʼu-nia inan-aman sempre hatete mai haʼu. Sira dehan: ‘Ransu hamutuk ho ema aat sei estraga toman diʼak.’”—1 Korinto 15:33.

Ligaya hatutan tan: “Bainhira ami-nia moris kaben nian besik atu naksobu, haʼu deside kedas atu troka haʼu-nia hahalok hodi estuda Bíblia no halo tuir.” Rezultadu mak saida? Nia hametin fali ninia moris kaben nian. Nia laʼen mós komesa hatudu laran-diʼak no respeitu ba nia. Ligaya hatete: “Bíblia troka haʼu-nia moris, haʼu la triste kona-ba buat neʼebé haʼu husik ona ba kotuk, hanesan haʼu-nia hahalok aat no kolega uluk nian.”