Keta rende an maski hasoru susar

BAINHIRA sei kiʼik, saida mak Ita hakarak ba Ita-nia moris? Karik Ita hakarak sai matenek kona-ba buat ruma, hetan serbisu diʼak, ka hakarak kaben. Maibé dala barak ita-nia moris ohin loron la hanesan ho buat neʼebé uluk ita mehi. Ita-nia situasaun bele troka derrepente deʼit. Haree toʼok susar neʼebé Anja, Delina no Gregory hasoru iha sira-nia moris.

• Anja, iha rai-Alemaña, hetan moras kankru bainhira nia tinan 21, toʼo agora doutór bandu nia labele sai husi uma.

• Delina, iha rai-Estadus Unidus, tenke tau matan ba ninia maun naʼin-tolu neʼebé aleijadu maski nia mós iha moras neʼebé dala ruma halo ninia liman-ain sai kleʼuk.

• Gregory, iha rai-Kanadá, iha moras kakutak nian neʼebé derrepente deʼit halo nia taʼuk tebes no neon halai tun-saʼe.

Maski sira naʼin-tolu tenke tahan hasoru susar sira-neʼe, maibé sira nafatin halaʼo moris ho laran-kontente. Oinsá mak sira bele?

Bíblia dehan: “Se ó sai laran-tun iha tempu susar, ó-nia kbiit sei sai menus.” (Provérbios [Amsal] 24:10) Loos, buat neʼebé importante mak ita-nia hanoin. Bainhira hasoru susar ruma, ema balu hanoin katak diʼak liu rende an deʼit ona, maibé balu seluk nafatin iha hanoin neʼebé pozitivu no buka dalan oinsá atu kontinua halaʼo moris ho kontente.

Mai ita haree hamutuk Anja, Delina no Gregory nia ezemplu sira neʼebé diʼak.