TAHAN HASORU PROBLEMA EKONOMIA
Hatudu laran-luak
Se Ita sente susar atu sosa buat neʼebé Ita presiza, karik Ita hanoin katak Ita la iha kbiit atu hatudu laran-luak ba ema seluk. Maibé tuir loloos, se Ita fó ba ema seluk, neʼe bele ajuda Ita tahan hasoru problema ekonomia. Maski Ita-nia moris mak simples deʼit, maibé Ita nafatin bele hatudu laran-luak ba ema seluk.
TANBASÁ IMPORTANTE?
Bainhira ita fó ba ema seluk, maski neʼe mak kiʼik deʼit, neʼe sei halo ita sente kontente no fiar an. Doutór balu hatete katak bainhira ita fó ba ema seluk, neʼe bele lori benefísiu ba ita-nia saúde fíziku no mentál. Porezemplu, neʼe bele hamenus laran-taridu, estrese, hatún tensaun, no mós ita-nia isin bele sente kmaan. Neʼe mós bele ajuda ita toba-dukur.
Bainhira ita ajuda ema seluk hodi fó osan ka buat seluk, ita sei sente fasil liu atu simu ajuda husi ema seluk. Howard neʼebé hela iha rai-Inglaterra hatete: “Haʼu no haʼu-nia feen sempre buka dalan atu hatudu laran-luak no ajuda ema seluk. Neʼe ajuda ami atu la sente katak ami hatodan ema seluk bainhira ami presiza simu ajuda.” Klaru katak ema neʼebé laran-luak la hein atu hetan fali buat ruma. Maibé baibain sira hetan belun neʼebé prontu atu ajuda iha tempu neʼebé susar.
SAIDA MAK ITA BELE HALO?
Fahe buat neʼebé Ita iha. Maski Ita iha sasán neʼebé uitoan deʼit, maibé Ita nafatin bele fó ba ema seluk. Karik Ita bele deʼit fó hahán neʼebé simples. Duncan no ninia família neʼebé hela iha rai-Uganda mak kiak tebes, maski nuneʼe sira gosta hatudu laran-luak ba ema seluk. Duncan hatete: “Domingu-domingu, haʼu no haʼu-nia feen konvida ema ruma atu han hamutuk iha ami-nia uma, maski han hahán neʼebé simples deʼit. Ami gosta tebes atu gasta tempu hamutuk ho ema seluk.”
Klaru katak Ita presiza tetu didiʼak antes fó ba ema seluk tanba Ita lakohi fó demais ba ema seluk toʼo Ita-nia família rasik falta buat neʼebé sira presiza.
Sujestaun: Oferese hahán no hemu neʼebé simples ba ema seluk. Fó sasán neʼebé Ita la uza ona ba kolega ka viziñu neʼebé karik sei hafolin no uza ida-neʼe.
Fó iha dalan seluk tan. Porezemplu, Ita bele fó Ita-nia tempu no atensaun hodi halo buat ruma atu ajuda ema seluk. Ita-nia liafuan mós iha folin-boot, tan neʼe fó sai ba ema seluk katak Ita hafolin no hadomi sira. Ajuda ema iha dalan hanesan neʼe mak folin-boot liu fali osan no sasán.
Sujestaun: Ajuda ema seluk kona-ba serbisu uma laran, hadiʼa buat neʼebé aat iha sira-nia uma, ka bá kompras. Ita bele hakerek karta ka haruka mensajen ba Ita-nia belun hodi fó sai katak Ita hanoin nia.
Bainhira Ita hatudu laran-luak, Ita sei kontente liu.