TAHAN HASORU PROBLEMA EKONOMIA

Iha esperansa

Iha Ita-nia rai, sasán no hahán nia folin saʼe, maibé Ita-nia saláriu mak nafatin deʼit ka lae? Ita hanoin barak kona-ba tau matan Ita-nia an no Ita-nia família ka lae? Se sin, karik Ita mós hanoin barak kona-ba Ita-nia futuru. Iha situasaun hanesan neʼe, importante tebes atu iha esperansa.

TANBASÁ IMPORTANTE?

Ema neʼebé iha esperansa la hein deʼit atu situasaun sai diʼak. Maibé sira-nia esperansa sei book sira atu hakaʼas an halo buat ruma atu hadiʼa sira-nia situasaun. Peskiza sira fó sai katak ema neʼebé iha esperansa . . .

bele tahan situasaun neʼebé susar
lalais atu adapta ho situasaun foun
halo desizaun neʼebé matenek, no neʼe ajuda sira iha moris neʼebé saudavel

SAIDA MAK ITA BELE HALO?

Buka-hatene oinsá Bíblia bele ajuda Ita ohin loron. Bíblia fó sujestaun oioin neʼebé bele ajuda Ita tahan bainhira sasán nia folin saʼe. Sujestaun sira-neʼe bele ajuda Ita atu halo desizaun diʼak agora, no mós ajuda Ita atu tahan susar sira neʼebé sei mosu iha futuru.

“Kbiit atu hanoin sei tau matan ba ó, no kbiit atu tetu didiʼak sei proteje ó.”—Provérbios 2:11.

Buka-hatene saida mak Bíblia hatete kona-ba futuru. Bainhira Ita rekoñese katak matenek husi Bíblia mak folin-boot, neʼe sei book Ita atu aprende buat neʼebé Bíblia fó sai kona-ba futuru. Porezemplu, Ita sei aprende katak Maromak hakarak Ita atu iha “futuru kapás no esperansa”. (Jeremias 29:11) Ita bele fiar ida-neʼe tanba Maromak sei kumpre ida-neʼe liuhusi Ninia Ukun.

SAIDA MAK MAROMAK NIA UKUN NO NEʼE SEI HALO SAIDA?

Maromak nia Ukun mak governu ida neʼebé sei ukun mundu tomak. (Daniel 2:44; Mateus 6:10) Ukun neʼe harii iha lalehan no neʼe sei halakon terus no mós kiak. Ema hotu sei moris ho dame no mós sente kontente tanba la falta buat ida hanesan fó sai iha eskritura sira tuirmai.

“Ó sei haksolok no moris diʼak.”—Salmo 128:2.

Maromak nia povu nia “serbisu makaʼas sei la sai saugati deʼit”.—Isaias 65:23.

“Sei iha ai-han barak iha rai.”—Salmo 72:16.

Ema millaun ba millaun tau fiar ba promesa sira-neʼe tanba hatene katak Maromak “nunka bosok”. (Tito 1:2) Ita mós hakarak aprende liután kona-ba Bíblia ka lae? Esperansa neʼebé fó sai iha Bíblia bele ajuda Ita tahan hasoru problema ekonomia no fiar metin katak futuru sei sai diʼak liu.