Anju aat sira bosok katak ema mate sei moris hela

Bíblia hatete katak agora daudaun Diabu Satanás “lohi mundu tomak”. (Apokalipse 12:9) Satanás ho ninia anju aat sira lakohi ema atu tau fiar ba Maromak nia Liafuan Bíblia. Sira halo buat oioin hodi ema bele fiar katak ema mate sira-nia klamar sei moris hela iha fatin ruma. Mai ita haree oinsá mak anju aat sira lohi ema.

Relijiaun falsu

Relijiaun barak hanorin katak ema hotu iha klamar. Bainhira ema ida mate, ninia isin-lolon mak mate, maibé klamar sei moris hela. Sira fiar katak klamar sei nunka mate.

Maibé Bíblia la hanorin hanesan neʼe. Porezemplu, kona-ba tempu neʼebé Maromak kria Adão, Bíblia hatete: “Maromak Jeová halo ema husi rai, huu iis moris nian ba nia inus, nuneʼe nia sai ema neʼebé moris.” (Gênesis [Kejadian] 2:7) Maromak la tau buat ruma hanesan “klamar” iha Adão nia isin-lolon neʼebé bele moris ba nafatin maski ninia isin-lolon mate.

Tuir Bíblia, la iha espíritu ka klamar neʼebé bele haketak an husi mate-isin. Ema mate la iha ona hanoin no la bele halo tan buat ida. Neʼe katak la iha klamar neʼebé bele ajuda ka intenta ema neʼebé moris. Bíblia hatete:

• “Ema neʼebé halo sala, ema neʼe rasik sei mate.”—Ezequiel (Yehezkiel) 18:4.

• “Nia iis kotu, nia fila fali ba rai; iha loron neʼe kedas ninia hanoin hotu lakon.”—Salmo (Mazmur) 146:4.

• “Ema neʼebé moris hatene katak sira sei mate; maibé ema neʼebé mate ona, sira la hatene buat ida, ka la iha tan kolen ba sira . . . Buat hotu neʼebé ó-nia liman bele halo, halo ida-neʼe ho ó-nia kbiit tomak, tanba la iha serbisu, ka planu, ka koñesimentu ka matenek iha rate, fatin neʼebé ó sei bá.”—Eclesiastes (Pengkhotbah) 9:5, 10.

Eskritura seluk mós hatete katak ema ho animál hotu mate fila fali ba rai deʼit. (Eclesiastes [Pengkhotbah] 3:19, 20) Hanesan ho rai-rahun, ema ka animál neʼebé mate la hatene tan buat ida, no sira la iha tan.

Se ita lee Bíblia tomak, ita bele hatene katak Bíblia nunka hanorin ema mate nia klamar sei moris hela ka bá fatin ruma. Tuir loloos, hanorin neʼe mai husi Satanás ho ninia anju aat sira. Maromak Jeová odi hanorin bosok oioin neʼebé relijiaun falsu sira habelar.—Provérbios (Amsal) 6:16-19; 1 Timóteo 4:1, 2.

Matan-dook

Satanás mós lohi ema liuhusi matan-dook nia atividade. Ema barak fiar katak matan-dook sira bele rona lian ka simu liafuan ruma husi beiʼala sira ka ema mate nia klamar. Sira no matan-dook rasik mós fiar duni katak buat hirak-neʼe mai husi matebian sira. Maibé hanesan ita haree tiha ona iha Bíblia, ema mate la bele halo tan buat ida.—Eclesiastes (Pengkhotbah) 9:5, 6, 10.

Entaun, buat hirak-neʼe mai husi sé? Anju aat sira! Sira hatene duni kona-ba ema ida-idak nia jeitu iha moris tomak, porezemplu, oinsá ema nia oin, nia koʼalia no ninia hahalok. Nuneʼe, la susar ba anju aat sira atu hasara fali ema neʼebé mate ona nia jeitu.—1 Samuel 28:3-19.

Istória oioin neʼebé laloos

Satanás mós habelar lia-bosok kona-ba ema mate nia klamar liuhusi istória oioin neʼebé laloos. Istória sira hanesan neʼe dala barak halo ema la fiar ba lia-loos husi Bíblia.—2 Timóteo 4:4.

Porezemplu, iha rai-Áfrika, ema fiar istória oioin kona-ba ema mate nia klamar neʼebé mosu fali. Maibé tuir istória neʼebé sira konta, matebian sira-neʼe mosu iha fatin dook husi fatin neʼebé uluk sira moris no hela. Agora, husu ba Ita-nia an: ‘Se matebian sira-neʼe bele mosu fali no bele hasoru ema neʼebé sei moris, tanbasá mak sira tenke mosu fali iha fatin neʼebé dook husi família no belun sira?’

Karik ema mós bele hanoin sala katak matebian sira mosu fali tanba haree ema seluk nia oin neʼebé hanesan deʼit ho sira neʼebé mate ona. Porezemplu, wainhira mane kristaun naʼin-rua haklaken iha knua ida iha rai-Áfrika, sira haree katuas ida laʼo tuir sira ba oras balu. Bainhira sira husu katuas neʼe, nia hatete katak husi mane naʼin-rua neʼe ida mak ninia maun neʼebé mate tiha ona iha tinan balu liubá. Loloos, katuas neʼe hanoin sala, maibé nia lakohi simu katak nia mak sala. Hanoin toʼok, karik katuas neʼe sei konta ba ninia maluk no viziñu sira katak nia hasoru duni ninia maun!

Mehi, lian, ka buat neʼebé ema haree

Iha mós istória oioin neʼebé ema konta, hanesan haree ema mate nia klamar, rona lian, ka fó mehi ba sira. Dala barak halo ema sai taʼuk tebes bainhira buat hirak-neʼe akontese ba sira. Porezemplu, feto ida naran Marein iha rai-Áfrika Oeste, kalan-kalan, nia sempre rona nia avó-feto neʼebé mate ona bolu beibeik nia naran. Tanba taʼuk tebes, Marein hakilar toʼo fanu ninia família hotu iha uma laran. Lakleur, Marein sai bulak.

Entaun, se karik ema mate sira-nia klamar mak sei moris hela, sira sei halo taʼuk ba ema neʼebé sira hadomi ka lae? Buat neʼebé sira halo neʼe diʼak ka lae? Lae duni. Nuneʼe, buat hirak-neʼe mai husi anju aat sira neʼebé gosta haterus ema.

Maibé, oinsá se ema fiar katak sira hetan mehi ruma ka rona lian ruma neʼebé bele ajuda sira ka halo sira kontente? Porezemplu, feto ida naran Gbassay husi rai-Serra Leoa, bainhira nia moras hela, nia mehi hetan ninia aman neʼebé mate tiha ona. Nia aman fó mehi neʼe, dehan: “Ó bá foti ai-tahan husi ai-hun ida hodi kahur ho bee no hemu. Maibé antes ó halo ida-neʼe, ó keta fó-hatene ba ema seluk.” Gbassay halo tuir duni, no ikusmai nia sai diʼak. Buat hanesan neʼe mós akontese iha ita-nia rai, loos ka lae?

Feto ida seluk tan konta katak kalan ida, nia laʼen neʼebé mate ona mosu ba nia. Nia haree nia laʼen bonitu tebes no hatais furak.

Maski dala ruma ema fiar katak buat hirak-neʼe diʼak no bele ajuda sira, maibé neʼe mai husi Maromak ka lae? Lae. Jeová mak “Maromak lia-loos nian”. (Salmo [Mazmur] 31:5) Ninia hahalok sempre tuir lia-loos, nia nunka halo buat ruma atu lohi ema. Anju aat sira deʼit mak halo buat hotu neʼe.

Maibé, iha anju aat balu neʼebé hakarak halo buat diʼak ba ema ka lae? Lae. Maski ema balu sente anju aat sira halo buat diʼak ba sira, maibé tuir loloos, anju aat hotu mak laran-aat. Hanoin toʼok, wainhira Diabu koʼalia ba Eva, nia finje koʼalia ho mamar no promete buat diʼak barak. (Gênesis [Kejadian] 3:1) Maibé bainhira Eva rona no halo tuir Diabu nia liafuan, ikusmai saida mak nia hetan? Nia mate.

Ita hatene katak dala barak ema aat finje koʼalia ho mamar ba ema neʼebé sira hakarak lohi ka lasu. Hanesan lia-dadolin neʼebé baibain ita dehan: “Nabilan husi liʼur, maibé laran-makerek.” Maromak nia Liafuan mós hatete: “Satanás rasik kontinua hatudu nia an nuʼudar anju naroman nian.”—2 Korinto 11:14.

Ohin loron, Maromak la fó tan lia-menon ba ema liuhusi mehi, vizaun, ka lian ruma. Tanba nia fó ona matadalan no hanorin ema liuhusi Bíblia, neʼebé bele halo ema “sai kompletu hodi prontu atu halo serbisu diʼak hotu”.—2 Timóteo 3:17.

Tanba Maromak Jeová hadomi ita, nia fó avizu mai ita kona-ba lasu oioin neʼebé Diabu uza atu bosok ema. Nia hatene katak anju aat sira mak inimigu neʼebé laran-makerek tebetebes no buka atu halo buat aat ba ita ema.