Lisaun 2

Sé maka Maromak?

Sé maka Maromak loos, no nia naran saida? (1, 2)

Isin oin saida maka nia iha? (3)

Saida maka furak liu kona-ba Maromak? (4)

Atu adora nia ita bele uza estátua no símbolu sira ka lae? (5)

Dalan rua saida mak ita bele aprende kona-ba Maromak? (6)

1. Ema adora buat barak. Maibé Bíblia hateten mai ita katak iha Maromak LOOS ida deʼit. Nia hakiak, ou kria hotu iha lalehan no iha Rai. Tanba nia maka fó mai ita moris, nia Mesak deʼit mak ita tenke adora. — 1 Korinto 8:​5, 6; Apokalipse[Wahyu] 4:⁠11.

2. Maromak iha títulu barak, maibé nia iha naran ida deʼit. Naran neʼe maka JEOVÁ. Iha Bíblia barak, ema hasai Maromak nia naran no troka ho títulu NAʼI ou MAROMAK. Maibé, kuandu ema hakerek hotu tiha Bíblia, naran Jeová mosu dala 7.000 liu! — Êxodo[Keluaran] 3:15; Salmo[Mazmur] 83:18; Apokalipse[Wahyu] 19:1.  

3. Jeová iha isin, maibé la hanesan ita-nian. Bíblia hateten katak: “Maromak mak espíritu.” (Joao 4:24) Espíritu maka moris oin ida neʼebé aas liu ita-nian. La iha ema ida iha Rai neʼebé haree Maromak. Jeová hela iha lalehan, maibé nia bele haree buat hotu. (Salmo[Mazmur] 11:​4, 5; Joao 1:18; Ebreu[Ibrani] 4:13) Entaun, saida mak espíritu santu? La’ós Maromak. Maibé, espíritu santu maka Maromak nia forsa. — Salmo[Mazmur] 104:⁠30.

4. Bíblia fó sai mai ita kona-ba Jeová. No hatudu mós katak buat furak liu kona-ba nia maka ninia domin, justisa, matenek no kbiit. (Deuteronômio[Ulangan] 32:4; Jó[Ayub] 12:13; Isaías 40:26; 1 Joao 4:⁠8) Bíblia hateten mai ita katak Maromak mós sente hanoin, no nia laran-diʼak, perduadór, laran-luak, no iha pasiénsia. Ita, nuʼudar oan sira neʼebé halo tuir, tenke buka atu halo hanesan nia. — Efeso 5:​1, 2.

5. Ita bele hakruʼuk an ka halo orasaun ba estátua, imajen, símbolu sira, ka buat lulik iha ita-nia adorasaun ka lae? Lae! (Êxodo[Keluaran] 20:​4, 5) Jeová hateten katak ita tenke adora nia mesak deʼit, tanba nia la fahe nia glória ho ema ida ou buat ida seluk. Estátua sira la iha kbiit, ou podér atu ajuda ita. — Salmo[Mazmur] 115:​4-8; Isaías 42:8.

6. Oinsá mak ita bele koñese Maromak diʼak liu tan? Dalan ida maka hodi hateke buat sira neʼebé nia kria tiha no hanoin kleʼan kona-ba saida maka buat sira-neʼe hateten mai ita. Buat neʼebé Maromak kria hatudu mai ita katak nia iha kbiit boot no matenek. Ita haree nia domin iha buat hotu nia halo. (Salmo[Mazmur] 19:​1-6; Roma 1:20) Dalan ida seluk neʼebé ita bele aprende kona-ba Maromak maka hodi estuda Bíblia. Iha Bíblia laran Maromak hateten mai ita buat barak liután kona-ba nia an. Maromak mós fó-hatene mai ita kona-ba buat nia hakarak halo no saida maka nia hakarak ita atu halo. — Amós 3:7; 2 Timoteo 3:​16, 17.

[Dezeñu sira iha pájina 5]

Ita aprende kona-ba Maromak husi buat nia kria no husi Bíblia