Lisaun 15

Ajuda ema seluk atu halo Maromak nia hakarak

Tansá mak Ita tenke fó-hatene ba ema seluk kona-ba buat neʼebé Ita aprende? (1)

Ba sé mak Ita bele hatoʼo lia-foun diʼak neʼe? (2)

Oinsá mak Ita-nia hahalok bele dada ema seluk? (2)

Bainhira mak Ita bele haklaken hamutuk ho kongregasaun? (3)

1. Toʼo agora Ita aprende buat diʼak barak tiha ona husi Bíblia. Koñesimentu neʼe tenke halo Ita atu hetan hahalok no hanoin kristaun nian. (Efeso 4:​22-24) Koñesimentu ida-neʼe mak importante liu ba Ita atu hetan moris rohan-laek. (Joao 17:⁠3) Maibé, ema seluk mós presiza atu rona kona-ba lia-loos, hodi nuneʼe, sira mós bele hetan salvasaun. Ema kristaun loos hotu tenke fó sasin ba ema seluk. Ida-neʼe buat neʼebé maka Maromak haruka ita atu halo. — Roma 10:10; 1 Korinto 9:16; 1 Timoteo 4:16.

2. Ita bele komesa atu fó sasin hodi hatoʼo buat diʼak neʼebé Ita aprende ba ema seluk. Koʼalia kona-ba ida-neʼe ba Ita-nia família, kolega sira, maluk sira iha eskola no serbisu-fatin. Halo ida-neʼe ho laran-diʼak no pasiénsia. (2 Timoteo 2:​24, 25) Hanoin-hetan katak dala barak ema haree liu maka ba hahalok duké rona ba buat ema ruma hateten. Tan neʼe, Ita-nia hahalok diʼak bele dada ema seluk atu rona ba mensajen neʼebé Ita hatoʼo. — Mateus 5:16; 1 Pedro 3:​1, 2, 16.

3. Lakleur, Ita sei hetan lisensa husi kongregasaun ida atu haklaken hamutuk ho Testemuña ba Jeová. Ida-neʼe buat importante atu bá oin. (Mateus 24:14) Ita sei haksolok tebes bainhira Ita bele ajuda ema ruma atu sai atan ida ba Jeová no hetan moris rohan-laek! — 1 Tesalonia 2:​19, 20.