Ema naʼin-ualu moris liu Rai-Nabeen

Noé, ninia família, no animál sira tama ona iha ró boot. Jeová taka odamatan, no udan komesa tun. Udan tun makaʼas tebes toʼo ró komesa namlele. Ikusmai, bee taka mundu tomak. Ema aat hotu mate ona. Maibé Noé no ninia família iha ró laran seguru hela. Tuir ó-nia hanoin, sira sente oinsá? Karik sira sente kontente tebes tanba halo tuir Jeová!

Udan tun loron 40 no kalan 40, depois para. Bee komesa menus toʼo ikusmai ró para iha foho. Maibé bee sei iha fatin hotu, tan neʼe Noé ho ninia família seidauk bele sai husi ró.

Neineik-neineik, rai komesa maran. Noé ho ninia família iha ró laran ba tinan ida liu ona. Tuirmai Jeová haruka sira atu sai husi ró no sira bele sama fali mundu neʼebé ema aat la iha ona. Sira agradese tebes ba Jeová tanba nia salva sira, tan neʼe sira hasaʼe sakrifísiu ba Jeová.

Jeová sente kontente ho sakrifísiu neʼe. Nia promete katak nia sei nunka halakon tan mundu tomak liuhusi rai-nabeen. Nuʼudar sinál ba promesa neʼe, nia halo arkiris primeiru mosu iha lalehan. Ó haree ona arkiris ka lae?

Jeová mós haruka Noé no ninia família atu iha oan no halo nakonu mundu.