Oportunidade atu simu hahán espirituál no haksolok
1. Oinsá mak Maromak Jeová tau matan ba ninia atan sira-nia presiza espirituál?
1 Ho domin, Maromak Jeová tau matan ba ninia atan sira-nia presiza espirituál. Maski ema iha mundu sei hamlaha ba buat neʼebé espirituál, maibé ita han toʼo bosu. (Isa 65:13) Dalan ida neʼebé Maromak Jeová fó hahán espirituál mak liuhusi reuniaun boot sira. Ita prepara daudauk atu tuir loron hotu iha reuniaun boot ba loron tolu, neʼebé iha tema “Husik Maromak nia espíritu hatudu dalan ba Ita” ka lae? Ita sei simu hahán espirituál neʼebé furak tebes iha neʼebá.
2. Planu saida deʼit mak ita presiza halo atu tuir reuniaun boot?
2 Prepara nanis: “Ema badinas nia planu sei hetan rezultadu neʼebé diʼak.” (Prov 21:5) Tan neʼe, kuandu halo planu atu tuir reuniaun boot neʼe ba loron tolu hotu, keta demora atu husu lisensa husi ita-nia patraun. Se presiza, Ita arranja ona fatin atu hela ka lae? Diʼak mós atu halo planu kona-ba han-meiudia atu han hamutuk ho ita-nia irmaun sira iha reuniaun fatin. Halo planu atubele toʼo reuniaun fatin sedu, hodi nuneʼe Ita sei iha tempu atu buka tuur-fatin no bele hola parte iha knananuk no orasaun atu loke reuniaun.
3. Hatais oinsá mak ita sei uza atu tuir reuniaun boot?
3 Ita hakarak prepara mós hatais neʼebé diʼak. (1 Tim 2:9, 10) Iha reuniaun boot, ita sei iha oportunidade neʼebé diʼak atu fó sasin ba ema seluk besik reuniaun fatin. Kuandu ita laʼo ho hatais diʼak hodi tau nafatin kartaun naran nian, ema neʼebé haree ita sei simu sasin neʼebé diʼak.
4. Saida mak ajuda ita no ita-nia família atu rona didiʼak programa hotu?
4 Rona didiʼak: Ita lakohi lakon buat ida husi hahán espirituál neʼebé prepara ona ba festa ida-neʼe! (Prov 22:17, 18) Loke eskritura sira-neʼebé temi iha diskursu no hakerek nota badak sei ajuda ita atu see tilun nafatin ba programa no ajuda ita atu la hanoin kona-ba buat oioin. Depois iha kalan, ita bele uza ita-nia nota atu koʼalia ho ema seluk kona-ba pontu importante neʼebé ita foin rona. Dala ruma iha reuniaun boot, iha ema joven balu neʼebé tuur hamutuk no dada lia ka haruka mensajen hodi uza sira-nia telemovel. Se Ita mak inan-aman, tuur hamutuk ho Ita-nia oan sira, maski sira neʼe boot ona, hodi rona programa nuʼudar família ida. Ida-neʼe diʼak liu duké husik Ita-nia oan sira atu tuur ketak ho sira-nia maluk joven.
5. Oinsá mak ita bele aumenta ita-nia haksolok iha reuniaun boot?
5 Haksolok hodi ransu ho ita-nia maluk: Hahán neʼebé diʼak sai gostu liu kuandu han hamutuk ho ita-nia kolega sira. (Prov 15:17) Hanesan neʼe mós, kuandu ita ransu hamutuk ho ita-nia irmaun no irmán sira, ida-neʼe sei aumenta ita-nia ksolok iha reuniaun boot. Tan neʼe, diʼak tebes atu hakbesik ba irmaun no irmán sira-neʼebé Ita seidauk koñese hodi halo kolega ho sira! (Sal 133:1) Se aprezentadór konvida ita atu tuur antes knananuk komesa, ita tenke para koʼalia ba malu no fila fali ba ita-nia tuur-fatin atu tuir programa.
6. Konta Ita-nia esperiénsia kona-ba fó sasin ba ema seluk kuandu tuir reuniaun boot.
6 Buka oportunidade hotu atu fó sasin: Baibain, reuniaun boot mak oportunidade diʼak ida atu fó sasin ba ema. Depois reuniaun ramata, irmaun balu bá restaurante, no dala barak ema neʼebé serbisu iha restaurante husu pergunta kona-ba tema ba reuniaun neʼebé hakerek iha sira-nia kartaun naran nian. Ida-neʼe loke dalan ba irmaun sira atu fó sasin diʼak kona-ba lia-loos. Depois, irmaun sira konvida atu sira mós tuir reuniaun boot neʼe, no sira balu tuir duni.
7. Tansá mak ita tenke tuir ita-nia reuniaun boot ba loron tolu iha tinan ida-neʼe?
7 Presiza tempu barak tebes atu irmaun sira prepara programa, buka fatin atu halaʼo reuniaun neʼe, fahe knaar oioin ba irmaun sira, no prepara diskursu. Sira halo buat hirak-neʼe hotu ho domin atu festa espirituál neʼe bele laʼo ho diʼak. Ida-neʼe hatudu Maromak Jeová nia laran-diʼak hodi tau matan ba ninia povu. Mai ita hotu tuir no simu hahán espirituál ho laran! Se halo nuneʼe, ita sei lahanesan ema iha mundu, maibé ita sei “hasaʼe lian ho haksolok tanba sente diʼak iha laran”.—Isa 65:14.