Lori Jesus nia naha bá
1 Iha mundu neʼebé nakonu ho susar, ita hatene ona katak se ita hatán ba Jesus nia konvite atu lori ninia naha, ita bele halaʼo moris neʼebé kontente. (Mt 11:29, 30) Lori Jesus nia naha nuʼudar ninia dixípulu, neʼe katak hola parte iha ninia serbisu. Ita presiza forsa barak atu halaʼo serbisu neʼe, maibé serbisu ida-neʼe sei fó kmaan mai ita. Parte ida husi serbisu neʼe mak haklaken lia-foun diʼak Reinu nian hodi ajuda ema seluk atu simu mós Jesus nia naha no hetan kmaan.—Mt 24:14; 28:19, 20.
2 Hetan kmaan husi serbisu haklaken: Jesus la husu ba ninia dixípulu sira atu lori nafatin sira rasik nia todan no lori tan todan neʼebé nia fó ba sira. Nia konvida sira atu troka sira-nia todan ho ninia naha neʼebé kmaan liu. Hodi halo nuneʼe, ita la sente ona todan no laran-susar iha mundu neʼebé la iha esperansa; no mós ita sei la gasta ita-nia forsa saugati deʼit atu buka rikusoin neʼebé sei mohu. (Lc 21:34; 1 Tim 6:17) Maski ita tenke serbisu atu hetan ita-nia presiza loron-loron nian, ita tau uluk adorasaun ba Maromak nuʼudar buat neʼebé importante liu iha ita-nia moris. (Mt 6:33) Se ita haree momoos buat neʼebé importante liu, serbisu haklaken sei sai buat neʼebé fó kmaan mai ita, laʼós buat neʼebé hatodan ita.—Flp 1:10.
3 Baibain, ita sente kontente atu koʼalia kona-ba buat neʼebé ita gosta. (Lc 6:45) Ita hotu nuʼudar ema kristaun hadomi Maromak Jeová no gosta bensaun sira neʼebé nia promete nanis ona liuhusi ninia Reinu. Tan neʼe, kuandu ita hatoʼo “liafuan foun diʼak” no husik ita-nia susar loron-loron nian ba kotuk durante tempu haklaken, ita sei sente kmaan duni! (Rom 10:15) No klaru katak kuandu ita uza tempu barak liu iha serbisu haklaken, ita sei sai matenek liu no ida-neʼe mós halo ita sente kontente. Tan neʼe, aumenta ita-nia tempu atu haklaken sei halo ita sente kmaan no laran-haksolok liután. No kuandu ema simu ita-nia mensajen, ida-neʼe sei halo ita haksolok tebes! (Apos 15:3) Maski ita hasoru ema neʼebé la rona no kontra hasoru ita, serbisu haklaken sei fó kmaan mai ita, se ita hanoin nafatin katak Maromak Jeová sente kontente atu haree ita-nia hakaʼas an no ikusmai nia sei haraik bensaun ba ita-nia serbisu neʼe.—Apos 5:41; 1 Kor 3:9.
4 Kuandu simu Jesus nia konvite, ita bele sente laran-haksolok tanba ita iha knaar espesiál atu serbisu hamutuk ho Jesus nuʼudar Maromak Jeová nia Testemuña sira. (Isa 43:10; Apok 1:5) Loos, lori Jesus nia naha fó ksolok no kmaan duni mai ita!