Ita-nia família prepara daudaun atu hetan salvasaun ka lae?
1 Ita moris iha tempu neʼebé liafuan husi Bíblia sai loos daudaun, no ida-neʼe hatudu ho klaru katak mundu aat neʼe besik ona atu ramata. Agora ita moris duni iha tempu neʼebé susar, hanesan ho tempu Noé antes Rai-Nabeen. (Mt 24:37-39) Noé bele hetan salvasaun husi mundu aat, tanba nia “laʼo ho Maromak neʼebé loos”. (Gên 6:9) Klaru katak Noé mós hanorin ninia família kona-ba Maromak Jeová nia dalan tanba sira mós hetan salvasaun husi Rai-Nabeen. Iha dalan saida deʼit mak ita bele halo tuir Noé nia ezemplu no prepara an nuʼudar família atu hetan salvasaun kuandu mundu aat neʼe ramata?
2 Haklaken nafatin: Maizumenus tinan 40 ka 50 nia laran, Noé kontinua atu haklaken Maromak nia liafuan nuʼudar “justisa nia manu-ain”. (2 Ped 2:5) Ita la hatene loloos se anju aat sira neʼebé nakfila an ba ema mak book Noé nia viziñu sira atu goza Noé, maibé klaru katak viziñu sira goza duni kuandu nia haklaken. Iha ita-nia tempu mós ema barak la interese no ema balu goza ita, no ida-neʼe hatudu katak mundu aat neʼebé ita moris daudaun besik ona atu ramata. (2 Ped 3:3, 4) Maibé, lahanesan ho ema iha tempu Noé, agora iha mós ema barak neʼebé simu ita-nia mensajen no hakarak hamutuk ho ita atu adora Maromak Jeová. (Isa 2:2) Hodi tahan toʼo rohan deʼit mak ita sei soi ‘ita-nia an no mós sira hotu neʼebé rona ita’. (1 Tim 4:16) Tan neʼe importante tebes ba inan-aman atu hanorin oan sira liuhusi liafuan no hahalok, katak haklaken mak serbisu neʼebé urjente tebes!—2 Tim 4:2.
3 Noé halo “nuneʼe duni”: Ba Noé no ninia família, sira-nia salvasaun depende ba sira-nia hahalok atu halo tuir buat hotu neʼebé Maromak Jeová haruka. (Gên 6:22) Agora mós importante mai ita atu “tuir buat neʼebé loos” hodi halo tuir matadalan husi Bíblia no atan neʼebé laran-metin no matenek. (Tgo 3:17) Porezemplu, maun-alin naʼin-neen neʼebé sai boot ona hanoin-hetan oinsá mak sira-nia aman hakaʼas an atu halo tuir matadalan husi Maromak Jeová nia organizasaun. Nia halaʼo estudu nuʼudar família semana-semana, no lori família atu bá haklaken kada semana hodi tuir buat neʼebé organizasaun hatete. Nia hakaʼas an atu haklaken hamutuk ho nia oan kada semana. Aman neʼe nia hahalok atu halo “nuneʼe duni” book oan sira-nia laran, no ikusmai sira naʼin-neen hotu sai Maromak Jeová nia atan neʼebé laran-metin.
4 Mundu aat neʼe nia rohan sei toʼo derrepente deʼit. (Lc 12:40) Hodi halo tuir Noé nia ezemplu no hodi hametin ita-nia fiar ba salvasaun, ita no ita-nia família bele sai prontu ba akontesimentu neʼe!—Ebr 11:7.