Preparasaun mak importante atu halo vizita fali neʼebé diʼak
1. Serbisu haklaken neʼebé ema kristaun halo, sei halaʼo toʼo iha neʼebé?
1 Jesus fó treinu neʼebé diʼak ba ninia dixípulu sira atubele haklaken “liafuan diʼak reinu nian” ho didiʼak. (Mt 4:23; 9:35) Sira hetan treinu atu halaʼo serbisu haklaken iha rai Palestina deʼit. Maibé antes Jesus saʼe ba lalehan, nia fó-hatene katak ema kristaun sei haklaken mós iha rai seluseluk atu “hanorin [“halo dixípulu iha”, MF] nasaun hotu-hotu”.—Mt 28:19, 20.
2. Jesus nia mandamentu atu halo dixípulu inklui saida?
2 Serbisu neʼe mós inklui vizita ema neʼebé hatudu ona interese ba liafuan diʼak kona-ba Maromak nia Reinu hodi hanorin sira atu halo tuir buat hotu neʼebé Kristu haruka. Atu halo vizita fali neʼebé diʼak, ita presiza prepara didiʼak.
3. Kuandu ita hasoru ema ba dala primeiru, saida mak ita bele halo atu prepara ba ita-nia vizita tuirmai?
3 Prepara didiʼak: Kuandu hasoru ema ruma ba dala primeiru, haklaken-naʼin balun husu pergunta ida ba ema neʼe no promete atu mai fali hodi fó resposta ba pergunta neʼe. Kuandu halo vizita fali, sira uza informasaun husi livru Bíblia Hanorin. Hodi halo nuneʼe fasil liu ba sira atu komesa estudu Bíblia ida.
4. Tanbasá mak lalika hein toʼo simu livru fulan-fulan nian neʼebé foun, atu halo vizita fali?
4 Maski uma-naʼin simu livru fulan-fulan nian kada fulan, neʼe laʼós katak ita tenke hein toʼo simu livru fulan-fulan nian neʼebé foun atu ita bá vizita sira. Loloos ita bele haburas sira-nia interese hodi koʼalia kona-ba informasaun husi livru fulan-fulan neʼebé ema neʼe simu tiha ona.
5. Tanbasá mak diʼak atu halo planu?
5 Halo planu: Antes bá vizita fali, uza minutu balun atu haree fali informasaun neʼebé Ita hakerek kona-ba ema neʼe no halo planu kona-ba saida mak nia sei hatete. Porezemplu, Ita bele koʼalia hamutuk uma-naʼin kona-ba informasaun ida husi livru neʼebé sira simu ona. Karik Ita mós bele fó livru ruma neʼebé kona tópiku neʼebé Ita koʼalia uluk. Se Ita husu pergunta ruma iha Ita-nia vizita uluk, Ita-nia planu mak atu hatán pergunta neʼe. Se bele, lee eskritura ida husi Bíblia atu apoia informasaun neʼebé Ita hatoʼo ba sira.
6. Saida mak ita-nia hakarak kuandu halo vizita fali?
6 Ita-nia hakarak: Klaru katak ita-nia hakarak mak komesa estudu Bíblia ida. Irmaun ida husu atu komesa estudu Bíblia ho ema neʼebé nia vizita, maibé ema neʼe la simu. Maski nuneʼe, irmaun neʼe vizita filafali atu fó livru fulan-fulan nian foun no hatete: “Ohin loron ami hakarak fó resposta husi Bíblia ba pergunta ida.” Rona tiha ema neʼe nia hanoin, irmaun neʼe lee eskritura ida no lee parágrafu ida husi livru neʼebé uza atu halaʼo estudu Bíblia, neʼebé hatán pergunta neʼe. Ikusmai, nia komesa estuda Bíblia semana-semana ho ema neʼe.
7. Oinsá mak prepara didiʼak sei ajuda ita atu hahú estudu Bíblia ho ema?
7 Kuandu ita uza tempu atu prepara atu halo vizita fali, ida-neʼe sei fó rezultadu diʼak, no sei halo ita kontente. Dala ruma ita mós iha knaar espesiál atu ajuda ema ida “neʼebé Maromak fihir” atu laʼo iha dalan moris nian.—Apos 13:48.