Ita iha rikusoi neʼebé folin boot atu fahe
1 Maromak nia Liafuan nakonu ho hanorin importante neʼebé ita bele hafolin. (Sal 12:6; 119:11, 14) Loron ida, Jesus konta ai-knanoik balu kona-ba Maromak nia Reinu, no depois nia husu nia dixípulu sira: “Imi rona loos buat hirak neʼe hotu?” Kuandu dixípulu sira hatán sin, Jesus dehan ba sira: “Tan neʼe, eskriba [mestre] sira neʼebé matenek kona-ba reinu lalehan nian hanesan aman ida neʼebé hasai buat foun no tuan husi nia rikusoi.”—Mt 13:1-52.
2 Lia-loos neʼebé ita aprende bainhira foin komesa estuda Bíblia mak hanesan rikusoi neʼebé tuan. Maibé, kuandu ita estuda buat kleʼan iha Maromak nia Liafuan, ita sei hetan informasaun foun neʼebé hanesan rikusoi neʼebé foun. (1 Kor 2:7) No mós liuhusi ‘atan laran-metin no matenek’ ita bele komprende informasaun foun sira-neʼe.—Mt 24:45.
3 Ita hafolin duni rikusoi espirituál tuan no foun. Ida-neʼe book ita atu aprende liután no hetan esperiénsia liután kona-ba hanorin Maromak nia Liafuan ba ema seluk. Sin, ho laran-manas ita haklaken ba ema seluk lia-loos neʼebé ita aprende tiha ona.
4 Aprende husi Jesus nia ezemplu: Hodi hatudu oinsá nia hafolin rikusoi sira-neʼe, Jesus hakaʼas an tebes atu haklaken ba ema seluk. Maski nia kole ona, neʼe la hapara nia atu haklaken rikusoi neʼebé nia hafolin.—Joao 4:6-14.
5 Jesus hadomi sira neʼebé la hatene lia-loos kona-ba Maromak no Maromak nia promete sira, no ida-neʼe mós book nia atu haklaken lia-loos kona-ba Maromak neʼebé fó moris ba ema. (Sal 72:13) Jesus sente hanoin ba sira neʼebé hamlaha iha dalan espirituál. Tan neʼe, “nia hanorin sira buat barak”.—Mc 6:34.
6 Halo tuir Jesus: Kuandu ita hafolin rikusoi neʼebé ita iha, hanesan Jesus, ita sei hakarak duni atu hatudu husi Bíblia rikusoi espirituál neʼe ba ema seluk. (Prov 2:1-5) Maski dala ruma ita sente kole, ita haklaken nafatin lia-loos husi Bíblia ho laran-manas. (Mc 6:34) Se ita agradese ho rikusoi neʼebé ita iha, ida-neʼe sei book ita atu hakaʼas an liután hodi buka oportunidade atu aumenta ita-nia serbisu haklaken.