“Labele taʼuk”
1. Hanesan Jeremias, sentimentu saida deʼit mak ita rasik hasoru?
1 Kuandu Jeremias hetan knaar nuʼudar profeta, nia sente katak nia la iha matenek atu halo knaar neʼe. Maibé, Maromak Jeová hatete ba nia: “Labele taʼuk,” no ho laran-diʼak hametin Jeremias atu halaʼo ninia knaar. (Jer 1:6-10) Ohin loron, ema sente moe ka la fiar an, ida-neʼe bele hanetik sira atu hola parte iha serbisu haklaken. Taʼuk kona-ba oinsá ema sei hatán ba ita ka haree ita, dala ruma ida-neʼe bele halo ita dada an atu la haklaken ba ema. Oinsá mak ita bele hasoru sentimentu taʼuk hanesan neʼe, no bensaun saida deʼit mak ita bele hetan?
2. Oinsá mak prepara nanis ajuda ita atu hamenus ita-nia taʼuk kuandu bá haklaken?
2 Prepara nanis: Prepara didiʼak antes bá haklaken bele ajuda ita atu hamenus ita-nia taʼuk. Porezemplu, se ita hanoin kona-ba saida mak baibain ema hatete atu hapara ita-nia koʼalia, ida-neʼe sei ajuda ita hatene oinsá atu hatán ba sira. (Prov 15:28) Diʼak mós atu halo treinu kuandu halaʼo Adorasaun Família nian hodi prepara nanis oinsá atu hasoru susar oioin neʼebé mosu iha eskola ka iha serbisu haklaken.—1 Ped 3:15.
3. Oinsá mak fiar ba Maromak Jeová ajuda ita atu la sente taʼuk?
3 Fiar ba Maromak Jeová: Fiar ba Maromak Jeová mak sei ajuda ita atu la sente taʼuk. Maromak Jeová promete katak nia sei ajuda ita. (Isa 41:10-13) Ho Maromak Jeová nia ajuda, ita bele duni sente seguru no la taʼuk. Jesus mós promete katak bainhira ita hasoru situasaun susar ruma, Maromak nia espíritu santu sei ajuda ita atubele haklaken iha dalan neʼebé diʼak. (Mc 13:11) Tan neʼe, husu beibeik Maromak Jeová nia espíritu santu.—Lc 11:13.
4. Bensaun saida deʼit mak ita bele hetan hodi hakaʼas an atu haklaken nafatin maski susar?
4 Bensaun sira: Nuʼudar ita hakaʼas an iha serbisu haklaken maski susar, ita hetan forsa atu hasoru ho didiʼak susar ruma iha futuru. Ita mós aumenta ita-nia aten-brani, neʼebé hatudu katak ita nakonu ho espíritu santu. (Apos 4:31) Liután neʼe, nuʼudar ita hamenus ita-nia sentimentu taʼuk, ita hametin ita-nia fiar ba Maromak Jeová no fiar katak nia bele salva ita husi susar ruma. (Isa 33:2) Ita mós haksolok hodi hatene katak ita halo kontente ita-nia Aman iha lalehan. (1 Ped 4:13, 14) Nuneʼe, mai ita haklaken mensajen Reinu nian ho aten-brani hodi la sente taʼuk, no hodi fiar nafatin katak Maromak Jeová sei ajuda ita!