Oportunidade barak atu hahiʼi Jeová
1. Arranju foun saida mak sei ajuda ita atu “hahiʼi Jeová liután”?
1 Hahú husi fulan-Marsu neʼebé foin liubá, ita iha arranju foun neʼebé fó oportunidade ba haklaken-naʼin sira atu serbí nuʼudar pioneiru estra hodi hatama oras 30 kada fulan-Marsu no Abríl, no mós iha fulan neʼebé katuas área nian sei vizita ita-nia kongregasaun. Se vizita husi katuas área nian hahú iha fulan nia rohan toʼo fulan tuirmai, haklaken-naʼin sira neʼebé hakarak foti pioneiru estra ho oras 30 bele hili atu halo ida-neʼe iha fulan neʼebé katuas área nian hahú ninia vizita ka iha fulan tuirmai. Haklaken-naʼin hotu neʼebé foti pioneiru estra bele tuir reuniaun tomak neʼebé katuas área nian sei halaʼo ho pioneiru regulár no pioneiru tempu-tomak sira. Ida-neʼe katak se ita la bele hatama oras 50, ita nafatin iha oportunidade atu “hahiʼi Jeová liután” hodi serbí nuʼudar pioneiru estra, hodi hatama oras 30 dala haat kada tinan!—Sal 109:30; 119:171.
2. Pioneiru estra sira sei haksolok ho buat saida deʼit durante vizita husi katuas área nian?
2 Durante vizita husi katuas área nian: Agora haklaken-naʼin barak liután mak bele serbí nuʼudar pioneiru estra durante vizita husi katuas área nian. Sira sei haksolok no hametin malu nuʼudar sira haklaken hamutuk ho nia. (Rom 1:11, 12) Pioneiru estra sira neʼebé serbisu iha loron baileet bele husu katuas área nian atu haklaken hamutuk ho sira iha loron-sábadu ka domingu. Karik pioneiru estra balu bele foti loron ida nuʼudar feriadu hodi bele haklaken hamutuk ho katuas área nian. Liután neʼe, pioneiru estra sira sei haksolok tebes hodi tuir reuniaun pioneiru nian hamutuk ho pioneiru regulár sira!
3. Tanbasá tempu Memoriál mak tempu diʼak atu serbí nuʼudar pioneiru estra?
3 Durante fulan-Marsu no Abríl: Haklaken-naʼin sira neʼebé aproveita arranju uluk nian hodi serbí nuʼudar pioneiru estra ba fulan ida hodi hatama oras 30 durante tempu Memoriál, agora bele aumenta sira-nia “sakrifísiu hahiʼi” nian ba dala rua. (Ebr 13:15) Fulan-Marsu no Abríl mak fulan diʼak atu aumenta ita-nia serbisu haklaken hodi serbí nuʼudar pioneiru estra. Kada tinan iha tempu Memoriál, ita hola parte iha kampaña neʼebé fó ksolok mai ita hodi konvida ema atu tuir Memoriál. Liután neʼe, ita bele haklaken hamutuk ho ita-nia maluk oioin tanba haklaken-naʼin barak aumenta serbisu haklaken durante tempu neʼe. Depois Memoriál, ita mós vizita ema neʼebé hatudu interese neʼebé tuir Memoriál no fó laran-manas ba sira atu tuir diskursu espesiál. Ita-nia laran book Ita atu aproveita oportunidade sira-neʼe atu serbí nuʼudar pioneiru estra ka lae?—Lc 6:45.