Pergunta husi haklaken-naʼin
◼ Antes haklaken-naʼin ida hetan lisensa atu hetan batizmu, nia presiza hatudu saida kona-ba tuir reuniaun sira no serbisu haklaken?
Hetan batizmu mak desizaun importante tebes neʼebé ema ida presiza halo. Tan neʼe, antes haklaken-naʼin ida hetan lisensa atu hetan batizmu, nia presiza komprende ho didiʼak saida mak Maromak hakarak nia atu halo. No mós, nia presiza hatudu ho klaru katak nia moris tuir Maromak nia hakarak.
Ema kristaun simu mandamentu kona-ba la haluha atu halibur an hamutuk. Entaun, haklaken-naʼin ida neʼebé seidauk hetan batizmu presiza hatudu ona katak nia badinas atu tuir reuniaun beibeik. (Ebr 10:24, 25) No mós, nia sei hola parte hodi fó komentáriu iha reuniaun sira-neʼe. Karik nia tama ona iha Eskola Serbisu Kristaun nian maibé tama eskola neʼe laʼós kritériu ida.
Liután neʼe, ema kristaun simu mandamentu atu haklaken liafuan diʼak no halo dixípulu sira, tan neʼe haklaken-naʼin ida tenke hola parte beibeik iha serbisu haklaken antes hetan batizmu. (Mt 24:14; 28:19, 20) Entaun, nia presiza haklaken ba fulan hira antes nia bele hetan batizmu? Diʼak liu se nia iha tempu natoon hodi bele hatudu katak nia badinas atu haklaken beibeik no fulan-fulan. (Sal 78:37) Maski nuneʼe, nia la presiza sai haklaken-naʼin ba tempu naruk liu. Karik fulan balu deʼit toʼo ona ba nia antes hetan batizmu. Oras hira mak nia tenke hatama iha ninia relatóriu? La iha lei kona-ba neʼe. Maibé katuas sira presiza hatene kona-ba haklaken-naʼin ida-idak nia situasaun no komprende buat neʼebé ema ida-idak bele halo.—Lc 21:1-4.
Bainhira katuas sira (ka atan ba kongregasaun se la iha katuas barak) koʼalia hamutuk ho haklaken-naʼin ida neʼebé hakarak hetan batizmu, diʼak atu rekoñese katak ema ida-idak la hanesan. Entaun, sira presiza tetu didiʼak se ema neʼe kumpre ona kritériu ruma hodi bele hetan batizmu. Buat neʼebé sira presiza haree kona-ba ema neʼe mak nia hakarak duni atu sai nuʼudar Testemuña ba Jeová no hatudu katak nia hafolin tebes atu sai parte ba Jeová nia organizasaun no hola parte iha serbisu haklaken. Katuas sira komprende katak ema neʼe laʼo ba oin hela iha dalan espirituál no mós la iha esperiénsia barak kona-ba serbisu haklaken. Se katuas sira hanoin katak haklaken-naʼin neʼe seidauk kumpre kritériu ruma atu hetan batizmu, ho laran-diʼak sira bele uza eskritura balu hodi esplika razaun tansá no oinsá mak sira bele ajuda nia atu laʼo ba oin.