Esperiénsia sira

◼ Austrália: Mane ida neʼebé hetan edukasaun boot, naran John, kuandu nia sei labarik, nia bá igreja, maibé ikusmai nia fiar makaʼas katak Maromak la iha. Pioneiru ida fó ba John broxura Moris Hotu Mosu Mesak Deʼit ka Lae? no kuandu nia vizita fali, nia mós fó broxura Asal Mula Kehidupan. Irmaun pioneiru neʼe kontinua vizita John hodi lori revista sira no hatudu informasaun kona-ba kriasaun no Bíblia nia profesia. Kuandu irmaun neʼe haree katak John prontu ona, nia fó livru Alkitab—Firman dari Allah atau dari Manusia? John lee livru neʼe, no ida-neʼe halo nia hanoin katak karik Maromak iha. Tuirmai, irmaun neʼe hatudu livru Bíblia Hanorin, iha parágrafu 8 husi pájina 20 no parágrafu 13-16 husi pájina 23-24. Kuandu John lee eskritura sira neʼebé temi iha parágrafu sira-neʼe, neʼe book tebes nia laran toʼo nia hatete: “Karik haʼu presiza aprende didiʼak kona-ba Bíblia.”

◼ Méxiku: Mane ida hatete ba haklaken-naʼin ida katak nia la fiar Bíblia mak livru husi Maromak. Haklaken-naʼin neʼe husu: ‘Haʼu bele lee ba Ita eskritura ida neʼebé hatudu katak Maromak mak leno Bíblia?’ Ita-nia irmaun vizita mane neʼe ba dala balu no buat neʼebé mane neʼe aprende husi Bíblia komesa book ninia laran, liuliu kona-ba Maromak nia matadalan sira. Nia hatete ba irmaun: “Foufoun kuandu ita lee Bíblia hamutuk, haʼu sente neʼe konsellu husi livru baibain deʼit no ida-neʼe ladún book haʼu. Maibé agora, kuandu ita lee Bíblia, liuliu ninia matadalan kona-ba morál, ida-neʼe halo haʼu-nia laran moras.”

◼ Estadus Unidus: Kuandu ita-nia maluk feen-laʼen ida halaʼo haklaken espesiál iha fatin públiku iha sidade boot, sira hasoru feto ida husi rai-Taiwán, neʼebé fiar ba Maromak maibé hanoin katak Bíblia mak livru ba ema-malae deʼit. Nia hakarak foti ita-nia livru balu tanba maski nia iha ona moris diʼak, maibé nia sente katak nia sei falta buat ruma iha ninia moris. Nia hanoin karik Bíblia bele ajuda nia atu hetan moris neʼebé iha folin liu. Kaben-naʼin neʼe komesa estuda Bíblia ho nia hodi uza livru Bíblia Hanorin hamutuk ho broxura Dame no haksolok ba nafatin—Oinsá atu hetan (Lasting Peace and Happiness—How to Find Them). Duké estuda kapítulu 2 husi livru Bíblia Hanorin, sira uza informasaun ho títulu “Livru neʼebé iha matadalan neʼebé lori bensaun ba ema hotu” husi broxura neʼe. Kuandu sira koʼalia ona parágrafu ida toʼo neen, feto neʼe hatete katak nia hakfodak tanba Bíblia la hanesan duni ho livru seluk husi relijiaun oioin. No kuandu aprende kona-ba profesia husi Bíblia neʼebé sai loos ona, nia hatete: “Haʼu sente katak la iha livru seluk neʼebé hanesan ho Bíblia.”

◼ Japaun: Maski uma-naʼin ida hatete ba irmaun ida katak nia la fiar Maromak, irmaun neʼe kontinua vizita nia hodi hatudu série “Maromak mak kria ka lae?” husi livru Matan-moris bá!. Neineik-neineik, mane neʼe komesa troka ninia hanoin no hatete katak karik Kriadór iha. Agora nia fiar duni katak Maromak iha, no nia estuda ho irmaun neʼe hodi uza broxura Liafuan Diʼak Husi Maromak.

◼ Kanadá: Ita-nia irmán ida fó revista foun ba feto ida neʼebé sai husi uma no laʼo daudauk ba karreta. Bainhira irmán neʼe vizita fali feto neʼe, nia hatete katak nia la iha interese no nia la fiar Maromak. Duké rende an, irmán deside atu lori fali broxura Kehidupan yang Memuaskan—Bagaimana Memperolehnya? Kuandu nia vizita fali feto neʼe, nia hatete: ‘Maski haʼu hatene katak Ita la fiar Maromak, haʼu hanoin nafatin kona-ba Ita tanba Ita mesak deʼit mak haboot oan.’ Nia hatudu parágrafu 6 husi pájina 4 iha broxura neʼe, neʼebé koʼalia kona-ba iha neʼebé mak ita bele hetan matadalan neʼebé diʼak. Tuirmai, irmán husu feto neʼe atu lee sujestaun sira iha lisaun 2 kona-ba haboot oan. Feto neʼe kontente tebes atu simu broxura neʼe.