1925​—Tinan atus ida liubá

BUAT NEʼEBÉ SIRA ESPERA LA SAI LOOS

Iha tinan 1925, Estudante Bíblia barak espera katak mundu sei sai Paraízu. Kona-ba tempu neʼe, irmaun Albert Schroeder, neʼebé ikusmai sai membru ba Grupu Administradór, hatete: “Ami hanoin katak Kristu nia alin sira neʼebé sei iha mundu sei saʼe ba lalehan atu sai liurai iha Maromak nia Ukun, no fiar-naʼin antigu sira hanesan Abraão, David, no seluk tan sei hetan moris-hiʼas no sai ulun-naʼin atu dirije povu iha rai nuʼudar parte ba Maromak nia governu.” Maibé durante tinan 1925, la iha buat ida mak akontese no neʼe halo ema balu sai laran-kraik.—Prov 13:12.

Maski Estudante Bíblia balu sai laran-kraik, maibé sira barak kontinua okupadu atu haklaken no komesa komprende katak sira-nia responsabilidade atu fó sasin kona-ba Jeová mak importante tebetebes. Mai ita aprende oinsá sira uza rádiu atu haklaken ba ema barak liután.

HARII TAN ESTASAUN RÁDIU

Iha tinan 1924, ema barak rona ba rádiu WBBR. Tan neʼe iha tinan 1925 Estudante Bíblia sira harii tan estasaun rádiu ida neʼebé boot besik Chicago, Illinois. Estasaun foun neʼe hanaran WORD. Ralph Leffler neʼebé hola parte iha konstrusaun ba estasaun neʼe hatete: “Ema barak iha fatin oioin iha área dook mós rona ba estasaun WORD, liuliu iha kalan tempu malirin.” Porezemplu, família ida neʼebé hela dook kilómetru 5.000 liu iha Pilot Station, Alaska, rona ba programa husi WORD. Rona tiha programa primeiru, sira hakerek karta ba estasaun WORD atu fó agradese ba programa neʼebé ajuda sira atu hatene liután kona-ba Maromak no Bíblia.

Livru Haklaken 1 Dezembru 1925 esplika tanbasá ema husi fatin dook tebes bele rona ba estasaun WORD, hodi hatete: “WORD mak estasaun ida iha Estadus Unidus neʼebé forsa boot liu ho 5.000 watt. Ema bele rona ida-neʼe iha fatin hotu iha Estadus Unidus, Kuba, no parte norte iha Alaska. Ema barak neʼebé seidauk rona ba lia-loos hakarak aprende liután tanba rona ba rádiu neʼe.”

Estudante Bíblia mós hakaʼas an atu uza rádiu hodi bele haklaken liafuan diʼak iha Kanadá. Iha tinan 1924, sira harii estasaun rádiu CHUC iha Saskatoon, Saskatchewan. Neʼe mak ida husi estasaun rádiu primeiru balu neʼebé fó sai hanorin relijiaun nian. Maibé iha tinan 1925, sira presiza estasaun neʼebé luan liután. Tan neʼe, Watch Tower Society sosa Regent Building, teatru antigu iha Saskatoon no halo renovasaun hodi bele uza nuʼudar estasaun rádiu.

Liuhusi estasaun rádiu neʼe, ema barak neʼebé hela iha fatin izoladu iha área Saskatchewan rona ba liafuan diʼak ba dala primeiru. Porezemplu, señora Graham neʼebé hela iha knua izoladu rona rádiu CHUC no hakerek karta atu husu livru sira kona-ba Bíblia. Irmaun George Naish konta: “Ami sente katak señora neʼe ezije atu hatene liután kona-ba Bíblia, tan neʼe ami haruka livru kompletu husi série Studies in the Scriptures.” Lakleur, señora Graham komesa haklaken ba ema neʼebé hela iha fatin neʼebé dook.

APRENDE LIA-LOOS IMPORTANTE

Livru Haklaken 1 Marsu 1925 fó sai informasaun importante ho títulu “Nasaun ida harii ona”. Tanbasá neʼe importante? Ba tempu balu, Estudante Bíblia hatene ona katak Satanás iha organizasaun ida neʼebé inklui anju aat sira iha lalehan no mós sistema relijiaun, ekonomia, no polítiku iha mundu neʼe. Maibé liuhusi informasaun neʼe, “atan laran-metin no matenek” ajuda irmaun-irmán sira atu komprende katak Jeová mós iha organizasaun ida. (Mt 24:45) Organizasaun neʼe la hanesan duni ho Satanás nia organizasaun, no organizasaun rua neʼe kontra malu. Liután neʼe, irmaun-irmán sira-neʼe komprende katak Maromak nia Ukun harii ona iha tinan1914 no iha tinan neʼe “funu mosu iha lalehan”, rezultadu mak Satanás no anju aat sira soe tun mai mundu no sira labele bá fali lalehan.—Apok 12:​7-9.

Ema balu sente susar atu simu kumpriensaun foun neʼe. Tan neʼe, revista neʼe mós hatete: “Se iha lee-naʼin ruma neʼebé sente susar atu konkorda ho kumpriensaun foun neʼe, ami anima sira atu hein ba Naʼi ho pasiénsia no kontinua serbí nia ho laran-metin.”

Tom Eyre husi Bretaña, neʼebé serbí nuʼudar kolportór (agora bolu nuʼudar pioneiru), esplika kona-ba Estudante Bíblia barak nia reasaun ba revista neʼe, hodi hatete: “Irmaun sira kontente bainhira rona esplikasaun ba Apokalipse kapítulu 12. Kuandu ami komprende katak Maromak nia Ukun harii ona iha lalehan, ami sente laran-manas atu fahe liafuan diʼak neʼe ba ema seluk. Neʼe book ami atu haklaken liután, no hametin ami-nia fiar katak Jeová sei halo buat oioin neʼebé furak liután iha futuru.”

FÓ SASIN KONA-BA JEOVÁ

Ohin loron, Testemuña ba Jeová hatene didiʼak Isaias 43:10 neʼebé hatete: “Jeová dehan: ‘Imi mak haʼu-nia testemuña, sin, haʼu-nia atan neʼebé haʼu hili ona.’” Maski nuneʼe, antes tinan 1925, ita-nia publikasaun sira ladún temi eskritura neʼe. Maibé situasaun hanesan neʼe troka. Durante tinan 1925 iha edisaun 11 husi Livru Haklaken neʼebé esplika kona-ba Isaias 43:10 no 12!

Iha fulan-Agostu nia rohan tinan 1925, Estudante Bíblia sira tuir reuniaun boot iha Indianapolis, Indiana (iha Estadus Unidus). Programa ba reuniaun boot fó sai liafuan benvindu husi irmaun Joseph F. Rutherford, neʼebé hatete: “Reuniaun boot neʼe sei ajuda ita atu hetan . . . forsa husi Naʼi hodi bele haklaken fali ho badinas nuʼudar ninia testemuña.” Durante loron ualu iha reuniaun boot neʼe, rona-naʼin hotu hetan anima atu fó sasin kona-ba Jeová iha oportunidade hotu.

Iha loron-sábadu, 29 Agostu, irmaun Rutherford hatoʼo diskursu ho tema “Konvite atu haklaken liután”. Nia esplika tanbasá importante tebes atu haklaken, hodi dehan: “Jeová hatete ba ninia povu . . . : ‘Imi mak haʼu-nia testemuña . . . no haʼu mak Maromak.’ Tuirmai, Jeová haruka sira ho lian makaʼas hodi dehan: ‘Tau sinál ida ba povu sira.’ Só Maromak nia povu deʼit mak bele sai ninia testemuña tanba sira hetan ajuda husi ninia espíritu.”—Isa 43:12; 62:10.

Bainhira irmaun Rutherford remata tiha ninia diskursu, nia lee rezolusaun ida ho títulu “Mensajen kona-ba esperansa”. Rezolusaun neʼe fó sai katak Maromak nia Ukun deʼit mak lori esperansa neʼebé loos kona-ba “dame, moris diʼak, saúde diʼak, liberdade, no haksolok ba nafatin”. Rona-naʼin hotu konkorda ho laran ida deʼit. Ikusmai, rezolusaun neʼe tradús ba língua balu no print nuʼudar panfletu maizumenus millaun 40 no fahe iha mundu tomak.

Maski Estudante Bíblia la troka kedas sira-nia naran ba Testemuña ba Jeová, maibé sira komesa rekoñese katak importante tebes atu fó sasin kona-ba Jeová.

VIZITA FALI

Nuʼudar Estudante Bíblia sai barak ba beibeik, organizasaun anima sira atu vizita fali ema neʼebé hatudu interese. Bainhira halaʼo ona kampaña atu fahe panfletu Mensajen kona-ba esperansa, jornál Bulletina fó matadalan: “Vizita fali ema neʼebé imi fó ona panfletu Mensajen kona-ba esperansa.”

Jornál Bulletin Janeiru 1925 fó sai esperiénsia husi Estudante Bíblia ida iha Plano, Texas, neʼebé dehan: “Ami hakfodak tanba kuandu ami bá vizita fali ba dala balu, ema nia reasaun mak diʼak liu se kompara ho tempu neʼebé ami haklaken ba dala primeiru. Ami vizita ona knua ida iha ami-nia área dala lima iha tinan sanulu nia laran. . . . Foin lalais neʼe, irmán Hendrix no haʼu-nia inan haklaken fali iha área neʼe no fahe livru barak liu fali uluk.”

Kolportór ida iha Panamá mós hakerek: “Bainhira haʼu fila fali ba dala segundu ka terseiru, ema barak neʼebé uluk lakohi simu mós troka sira-nia hahalok. Iha tinan neʼe, haʼu uza tempu barak liu atu vizita fali ema neʼebé uluk haʼu haklaken ona, no haʼu hetan esperiénsia diʼak barak.”

HATEKE BA FUTURU

Iha tinan 1925 nia rohan, irmaun Rutherford hakerek karta ba kolportór hotu hodi esplika kona-ba serbisu haklaken iha tinan neʼe no buat neʼebé sira presiza halo iha tinan tuirmai. Nia hatete: “Durante tinan neʼe, Ita iha priviléjiu atu fó kmaan ba ema neʼebé triste. Serbisu haklaken neʼe lori ksolok ba Ita . . . Iha tinan 1926, Ita sei iha oportunidade barak atu fó sasin kona-ba Maromak no ninia Ukun, no hatudu sai sé mak Maromak nia atan neʼebé loos. . . . Mai ita fó hahiʼi ba ita-nia Maromak no Liurai.”

Nuʼudar tinan 1925 besik atu remata, irmaun sira halo planu atu halo luan Betel iha Brooklyn. Iha tinan 1926, sira komesa halo projetu konstrusaun neʼebé boot liu fali projetu neʼebé sira halo antes neʼe.