Membru foun naʼin-rua ba Grupu Administradór
IHA reuniaun tinan nian neʼebé halaʼo iha 5 Outubru 2024, fó sai anúnsiu espesiál ida katak irmaun Jody Jedele no Jacob Rumph hetan knaar nuʼudar membru ba Grupu Administradór husi Testemuña ba Jeová. Irmaun sira-neʼe serbí Jeová ho laran-metin durante tinan barak ona.
Jody Jedele no ninia feen Damaris
Irmaun Jody Jedele moris iha Missouri iha Estadus Unidus Amérika, no boot iha lia-loos. Ninia família hela iha área neʼebé presiza liután haklaken-naʼin. Nia ransu beibeik ho irmaun-irmán sira neʼebé bá vizita área neʼe atu haklaken. Sira-nia domin no unidade fó impaktu boot ba Jody. Nia hetan batizmu iha 15 Outubru 1983 bainhira sei joven. Nia gosta haklaken, no depois remata ninia eskola sekundária, nia komesa serbí nuʼudar pioneiru regulár iha Setembru 1989.
Bainhira joven, irmaun Jody nia inan-aman lori nia no ninia alin-feto bá vizita Betel. Neʼe book sira atu hakarak serbí iha Betel, no ikusmai irmaun Jody no ninia alin kumpre sira-nia planu espirituál. Irmaun Jody komesa serbí iha Betel Wallkill iha Setembru 1990. Foufoun, nia serbí iha Departamentu hamoos nian no tuirmai iha Departamentu neʼebé tau matan ba família Betel nia saúde.
Maizumenus iha tempu neʼebá, kongregasaun língua Españól sai boot ba daudaun no presiza irmaun sira. Tan neʼe, irmaun Jody muda kongregasaun no komesa aprende língua Españól. Lakleur, nia hasoru irmán Damaris, neʼebé serbí nuʼudar pioneiru iha área neʼebé hanesan. Ikusmai sira kaben, no irmán Damaris tama Betel.
Iha tinan 2005, sira sai husi Betel atu tau matan ba sira-nia inan-aman. Durante tempu neʼe, sira serbí nuʼudar pioneiru regulár. Irmaun Jody ajuda hanorin iha Eskola Serbisu Pioneiru, no nia mós hola parte iha Komisaun neʼebé Komunika ho Ospitál no Grupu atu Arranja Harii Reuniaun-Fatin.
Iha tinan 2013, irmaun Jody no irmán Damaris simu konvite atu serbí fali iha Betel hodi ajuda projetu konstrusaun iha Warwick. Husi tempu neʼebá, sira mós serbí iha Patterson no Wallkill. Irmaun Jody serbisu iha Departamentu Planeamentu no Konstrusaun Lokál no iha Departamentu informasaun kona-ba tratamentu médiku. Iha Marsu 2023, nia hetan knaar nuʼudar ajudante ba Komisaun Serbisu nian. Nuʼudar nia hanoin fali knaar oioin neʼebé nia hetan, nia hatete: “Bainhira hetan knaar foun, dala ruma ita hanoin barak no estrese. Maibé neʼe mak tempu neʼebé ita tenke sadere ba Jeová tanba nia bele halo buat naran deʼit atu kumpre ninia hakarak.”
Jacob Rumph no ninia feen Inga
Irmaun Jacob Rumph moris iha Kalifórnia, Estadus Unidus Amérika. Bainhira nia sei kiʼik, ninia amá ladún tuir reuniaun maibé koko atu hanorin lia-loos husi Bíblia ba nia. No tinan-tinan, Jacob vizita ninia avó-feto neʼebé laran-metin nuʼudar Testemuña, no avó-feto neʼe ajuda nia atu haburas interese ba lia-loos. Bainhira Jacob tinan 13, nia husu irmaun ida atu estuda Bíblia ho nia, no hetan batizmu iha 27 Setembru 1992 kuandu nia sei joven. Ikusmai ninia amá ativu fali no ninia apá no alin sira mós hetan batizmu.
Bainhira joven, irmaun Jacob haree pioneiru sira neʼebé moris kontente. Tan neʼe, depois remata tiha eskola sekundária, nia hahú serbí nuʼudar pioneiru iha Setembru 1995. Iha tinan 2000, nia muda ba Ekuadór atu serbí iha área neʼebé presiza liután haklaken-naʼin. Ikusmai nia hasoru irmán Inga husi Kanadá, neʼebé serbí nuʼudar pioneiru. Depois sira kaben, sira serbí iha knua ida iha Ekuadór neʼebé iha haklaken-naʼin uitoan deʼit. Agora knua neʼe iha kongregasaun ida neʼebé ho haklaken-naʼin barak.
Liutiha tempu balu, irmaun Jacob no irmán Inga hetan knaar nuʼudar pioneiru espesiál no ikusmai nuʼudar katuas área. Iha tinan 2011, sira hetan konvite atu tuir Eskola Gilead klase 132. Depois gradua tiha, sira halaʼo knaar balu iha nasaun oioin, hanesan serbí iha Betel, nuʼudar misionáriu, no mós katuas área. Irmaun Jacob mós hetan priviléjiu atu hanorin iha Eskola ba Haklaken-Naʼin Tempu-Tomak.
Tanba pandemia COVID-19 akontese, irmaun Jacob no irmán Inga fila fali ba Estadus Unidus. Sira serbí iha Betel Wallkill, no irmaun Jacob hetan treinu atu serbí iha Departamentu Serbisu nian. Ikusmai, sira hetan fali knaar atu serbí iha sukursál Ekuadór, no irmaun Jacob sai membru ba komisaun sukursál nian. Iha tinan 2023, sira muda ba Warwick. Iha Janeiru 2024, irmaun Jacob hetan knaar nuʼudar ajudante ba Komisaun Serbisu nian. Nuʼudar nia hanoin fali knaar oioin neʼebé nia hetan, nia hatete: “Buat neʼebé halo ita-nia knaar espesiál mak laʼós fatin, maibé ema neʼebé ita serbí hamutuk.”
Ita agradese ba irmaun sira-neʼe nia serbisu badinas, no ita “kontinua hafolin ema hanesan neʼe”.—Flp 2:29.