Oinsá atu tahan hasoru problema saúde neʼebé mosu derrepente deʼit?

Derrepente deʼit Ita hasoru problema saúde ka lae? Se nuneʼe, Ita hatene katak problema saúde bele halo Ita sente kole iha dalan mentál, emosaun no mós halo Ita gasta osan barak. Saida mak bele ajuda Ita atu tahan? Oinsá mak Ita bele ajuda família ka belun ruma neʼebé hasoru hela problema saúde? Maski Bíblia laʼós livru médiku nian, maibé Bíblia fó sai prinsípiu oioin neʼebé bele ajuda Ita tahan iha situasaun susar.

Sujestaun atu ajuda Ita tahan hasoru problema saúde

• Buka tratamentu médiku

  Bíblia hatete: “Ema neʼebé isin-diʼak la presiza doutór, maibé ema moras presiza.”—Mateus 9:12.

  Oinsá atu aplika: Buka tratamentu husi doutór sira kuandu presiza.

  Sujestaun: Buka tratamentu médiku neʼebé diʼak liu iha Ita-nia área. Dala ruma, matenek atu konsulta ho doutór oioin atu bele hetan opiniaun seluk kona-ba Ita-nia moras. (Provérbios 14:15) Esplika ho klaru ba doutór sira kona-ba Ita-nia moras. Ita presiza komprende didiʼak sira no Ita mós hakarak sira komprende didiʼak Ita-nia sintoma sira. (Provérbios 15:22) Aprende liután kona-ba Ita-nia moras, inklui mós tratamentu oioin neʼebé karik Ita bele simu. Bainhira ita komprende kona-ba Ita-nia moras, neʼe sei ajuda Ita atu la estrese demais no ajuda Ita foti desizaun diʼak kona-ba tratamentu.

• Mantein toman neʼebé diʼak ba saúde

  Bíblia hatete: “Halo ezersísiu lori buat diʼak uitoan.”—1 Timóteo 4:8, nota-rodapé.

  Oinsá atu aplika: Ita bele hetan benefísiu oioin bainhira Ita mantein toman sira neʼebé diʼak, hanesan halo ezersísiu beibeik.

  Sujestaun: Halo ezersísiu beibeik, han hahán neʼebé saudavel, no toba tuir oras kalan-kalan. Karik Ita presiza halo mudansa tanba Ita-nia problema saúde, maibé matenek-naʼin sira konkorda katak se Ita hakaʼas an atu mantein toman neʼebé diʼak, neʼe sei lori rezultadu diʼak. Maski nuneʼe, Ita lakohi halo buat ruma neʼebé bele halo Ita sai moras liután ka kontra malu ho tratamentu médiku neʼebé Ita halaʼo daudaun.

• Buka ajuda husi ema seluk

  Bíblia hatete: “Belun neʼebé loos hatudu domin iha tempu hotu no nia sai hanesan maun ka alin ida iha tempu susar.”—Provérbios 17:17.

  Oinsá atu aplika: Ita-nia belun sira bele ajuda Ita atu tahan hasoru tempu susar.

  Sujestaun: Koʼalia ho belun neʼebé Ita tau fiar no fó sai Ita-nia sentimentu ba nia. Neʼe bele ajuda hamenus Ita-nia estrese no ajuda Ita sente kontente liu. Karik Ita-nia belun no família hakarak ajuda Ita iha dalan seluk, maibé sira la hatene oinsá. Entaun koʼalia nakloke ba sira kona-ba oinsá sira bele ajuda Ita, maibé labele espera atu sira halo buat neʼebé liu fali sira-nia kbiit, no sempre hatudu agradese ba sira. Maibé iha tempu hanesan, Ita presiza halo regra ruma kona-ba oras no tempu neʼebé ema mai atu vizita Ita hodi nuneʼe Ita la sai kole demais.

• Kontinua iha hanoin neʼebé pozitivu

  Bíblia hatete: “Laran neʼebé kontente mak ai-moruk neʼebé diʼak, maibé laran-triste halakon ema nia forsa.”‏—Provérbios 17:22.

  Oinsá atu aplika: Bainhira Ita hanoin pozitivu no iha esperansa, neʼe bele ajuda Ita kalma nafatin no tahan hasoru Ita-nia problema saúde.

  Sujestaun: Tau fokus ba buat neʼebé Ita bele halo, laʼós buat neʼebé Ita labele halo. Keta kompara Ita-nia an ho ema seluk ka buat neʼebé uluk Ita bele halo antes sai moras. (Galásia 6:4) Hodi halo planu sira neʼebé Ita bele kumpre, neʼe sei ajuda Ita iha hanoin pozitivu nafatin. (Provérbios 24:10) Diʼak atu halo buat ruma ba ema seluk tuir Ita-nia situasaun. Hodi fó ba ema seluk, neʼe ajuda Ita sente kontente no mós ajuda hamenus hanoin neʼebé negativu.—Apóstolu 20:35.

Maromak sei ajuda Ita tahan hasoru problema saúde ka lae?

Bíblia hatudu katak Maromak Jeováa bele ajuda ema atu tahan hasoru problema saúde. Maski Ita la espera katak Maromak sei halo milagre hodi kura Ita, maibé ema neʼebé adora Maromak bele simu ajuda iha dalan sira tuirmai:

Dame. Jeová bele fó “Maromak nia dame neʼebé aas liu ema nia hanoin hotu”. (Filipe 4:6, 7) Dame neʼe bele ajuda Ita atu sente hakmatek no la laran-taridu demais. Maromak fó dame neʼe ba ema neʼebé halo orasaun ba nia no fó sai sira-nia laran-taridu.—1 Pedro 5:7.

Matenek. Jeová bele fó matenek ba Ita atu halo desizaun neʼebé matenek. (Tiago 1:5) Ema ida bele hetan matenek neʼe se nia aprende no halo tuir Bíblia nia prinsípiu sira.

Esperansa kona-ba futuru. Jeová promete katak iha futuru “la iha ema ida iha rai mak sei dehan: ‘Haʼu moras.’” (Isaias 33:24) Promesa neʼe ajuda ema barak atu iha hanoin pozitivu nafatin maski sira iha problema saúde neʼebé grave.—Jeremias 29:11, 12.