Klima neʼebé aat tebes—Bíblia bele ajuda Ita tahan ka lae?

Klima neʼebé aat tebes fó impaktu ba Ita-nia moris ka lae? Klima hanesan neʼe bele lori perigu no hamosu dezastre oioin. Porezemplu, anin-fuik halo tasi saʼe, no udan boot hamosu inundasaun, halo rai halai, no dala ruma rai-lakan bele halo ahi han rai. No mós iha klima seluk tan neʼebé lori perigu ba ema nia moris, hanesan udan la tau ba tempu kleur, rai manas makaʼas, no jelu-rahun ho anin-fuik.

Iha fatin barak iha mundu tomak, klima neʼebé hamosu dezastre oioin aumenta ba beibeik no sai aat liután. Reportajen husi Federação Internacional da Cruz Vermelha e do Crescente Vermelho dehan: “Ohin loron ema neʼebé sai vítima husi dezastre naturais aumenta barak liután. Inundasaun, anin-fuik, no rai-maran akontese beibeik, no neʼe halo ema barak mate, ema seluk lakon sira-nia serbisu no hela-fatin.”

Akontesimentu sira hanesan neʼe halo ema terus laʼós deʼit iha dalan fíziku, maibé mós iha dalan emosaun. Karik sira hetan trauma tanba lakon sira-nia sasán, uma, ka aat liu mak ema neʼebé sira hadomi mate.

Se Ita mak sai vítima husi klima neʼebé aat tebes, Bíblia bele ajuda Ita atu tahan hasoru ida-neʼe. Bíblia nia liafuan fó kmaan, esperansa no matadalan, no neʼe ajuda ona ema barak tebes. (Roma 15:4) Bíblia mós fó resposta ba pergunta importante sira hanesan: Tanbasá mak Maromak husik ida-neʼe akontese? Neʼe mak kastigu husi Maromak ka lae?

Klima neʼebé aat tebes laʼós kastigu husi Maromak

Bíblia hanorin katak terus hotu neʼebé ema hasoru laʼós mai husi Maromak. Bíblia fó sai ho klaru katak “ema labele koko Maromak no nia mós la koko ema ida ho buat neʼebé aat”. (Tiago 1:13) Neʼe katak laʼós Maromak mak hamosu klima aat neʼebé akontese ohin loron.

Bíblia konta duni situasaun balu iha tempu uluk oinsá Maromak uza forsa natureza atu fó kastigu ba ema aat. Maibé akontesimentu sira-neʼe la hanesan ho dezastre neʼebé akontese ohin loron, neʼebé mosu derrepente deʼit no kona ema diʼak no ema aat. Uluk kuandu Maromak hamosu dezastre ruma, nia sempre esplika tanbasá nia halo ida-neʼe no fó avizu nanis atu ema neʼebé laran-loos bele hasees an. Porezemplu, iha Noé nia tempu Maromak esplika nanis tanbasá nia halo Rai-Nabeen. Nia mós fó avizu nanis, no salva Noé no ninia família.—Génesis 6:13; 2 Pedro 2:5.

Atu aprende liután oinsá ita hatene katak dezastre naturais neʼebé akontese ohin loron laʼós kastigu husi Maromak, haree informasaun “Saida mak Bíblia nia hanorin kona-ba dezastre naturais?”

Maromak hanoin ema neʼebé sai vítima husi klima neʼebé aat tebes

Bíblia fó sai katak Maromak Jeováa hanoin ema no komprende ema nia sentimentu. Haree toʼok eskritura tuirmai neʼebé bele fó kmaan mai ita.

• Isaias 63:9: “Durante sira-nia susar hotu, [Maromak] mós sente neon-susar.”

  Neʼe katak: Jeová sente triste bainhira haree ema hasoru susar.

• 1 Pedro 5:7: “Nia hanoin imi.”

  Neʼe katak: Jeová komprende ita-nia situasaun no hakarak ita moris kontente.

Jeová hanoin no komprende ita-nia sentimentu. Neʼe book nia atu ajuda no fó kmaan mai ita liuhusi ninia matadalan sira iha Bíblia. (2 Korinto 1:3, 4) Nia mós promete katak iha futuru dezastre naturais sei la akontese tan.

Ema sei la terus tan tanba klima neʼebé aat

Bíblia fó sai Jeová nia promesa atu ‘fó ita futuru kapás no esperansa’. (Jeremias 29:11) Nia hakarak atu ema moris haksolok iha mundu paraízu no la presiza hanoin barak tan kona-ba klima neʼebé aat.—Génesis 1:28; 2:15; Isaias 32:18.

Maromak sei kumpre ida-neʼe liuhusi ninia Reinu ka Ukun ida neʼebé harii ona iha lalehan, no Jesus mak Liurai ba Ukun neʼe. (Mateus 6:10) Bainhira Jesus iha rai, nia hatudu katak nia iha matenek no kbiit atu kontrola klima no prevene dezastre naturais. (Marcos 4:37-41) Nia sei ukun ho matenek no hanorin ema oinsá atu tau matan mundu. (Isaias 11:2) Iha Jesus nia Ukun okos, ema sei la terus tan tanba klima neʼebé aat.

Karik Ita hanoin, ‘Bainhira mak Jesus sei uza ninia kbiit atu kontrola klima?’ Atu hetan resposta, haree informasaun “Bainhira mak Maromak nia Reinu sei ukun mundu neʼe?”

Oinsá atu tahan hasoru klima neʼebé aat tebes

Bíblia nia matadalan bele ajuda ita antes, durante, no depois klima neʼebé aat akontese.

• 

  Antes klima neʼebé aat akontese: Prepara an.

  Bíblia dehan: “Ema neʼebé matenek haree perigu no subar nia an, maibé ema neʼebé la iha esperiénsia la hasees an no hetan susar.”—Provérbios 22:3.

  Neʼe katak: Hanoin kona-ba perigu saida deʼit mak karik bele akontese hodi nuneʼe Ita bele hatene nanis saida mak Ita sei halo atu proteje Ita-nia an no mós família.

  Esperiénsia: “Tanba ami prepara an nanis, ami bele halai sees bainhira ahi han área besik ami-nia hela-fatin. Ami prepara nanis pasta emerjénsia, no iha laran ami tau ai-moruk no mós roupa. Ema barak sai pániku, maibé ami iha ona buat hotu neʼebé presiza. Tan neʼe haʼu kontente tanba prepara an nanis!”—Tamara, Kalifórnia, Estadus Unidus.

• 

  Durante klima neʼebé aat akontese: Fokus ba buat neʼebé importante liu.

  Bíblia dehan: “Maski ema ida hetan rikusoin barak, ninia moris la mai husi buat neʼebé nia iha.”—Lucas 12:15.

  Neʼe katak: Moris mak importante liu fali rikusoin.

  Esperiénsia: “Bainhira anin boot ida naran Lawinb estraga ami-nia uma, haʼu la hatene atu halo saida. Maibé tempu neʼebá haʼu halo orasaun ba Maromak Jeová ho laran tomak. Haʼu rekoñese katak maski ami lakon sasán barak, maibé ami agradese tanba la lakon ami-nia moris.”—Leslie, Filipinas.

• 

  Depois klima neʼebé aat akontese: Keta hanoin barak kona-ba loron aban.

  Bíblia dehan: “Keta hanoin resin kona-ba loron aban, tanba loron aban iha ninia susar rasik.”—Mateus 6:34.

  Neʼe katak: Keta hanoin demais kona-ba problema neʼebé karik sei akontese iha futuru.

  Esperiénsia: “Bainhira anin boot naran Irma hamosu inundasaun no estraga haʼu-nia uma, haʼu presiza foti desizaun barak no haʼu sente estrese tebes. Haʼu koko halo tuir Bíblia nia konsellu atu fokus deʼit ba loron ohin no la hanoin demais kona-ba loron aban. Haʼu hakfodak tanba ho Jeová nia ajuda haʼu bele duni tahan hasoru situasaun neʼe ho didiʼak.”—Sally, Florida, Estadus Unidus.

Atu hetan informasaun liután, haree “Kuandu dezastre akontese—Saida mak Ita bele halo?”