Ema Kristaun no funu—Saida mak Bíblia dehan?

Konflitu iha Ukránia hatudu ho klaru katak ulun-naʼin Kristaun barak anima ema atu hola parte iha funu. Haree toʼok oinsá sira balu apoia sorin ida no balu fali apoia sorin seluk:

• “Ami sente orgullu no agradese ba ita-nia funu-naʼin hotu neʼebé defende sira rasik nia nasaun Ukránia husi ema neʼebé ataka ita . . . Ami-nia laran, orasaun, no apoiu sempre hamutuk ho imi.”—Metropolita Epifánio I husi Kyiv, The Jerusalem Post, 16 Marsu 2022.

• “Ulun-naʼin ba Igreja Ortodoksu Rúsia halaʼo misa ba soldadu sira iha Rúsia iha loron-domingu no nia anima sira atu defende sira-nia rai, ‘neʼe mak buat neʼebé ema Rúsia bele halo’ nuʼudar Moskovu kontinua kampaña militár iha Ukránia.”—Reuters, 3 Abríl 2022.

Ema Kristaun bele hola parte iha funu ka lae? Saida mak Bíblia dehan?

Saida mak Bíblia dehan

Bíblia hatudu katak ema neʼebé halo tuir Jesus Kristu sei la hola parte iha funu.

• “Hatama fali ó-nia surik ba ninia fatin, tanba ema hotu neʼebé kaer surik sei mate ho surik.”—Mateus 26:52.

  Se ema ida aprova funu ka oho malu iha funu, nia halo tuir duni Jesus nia liafuan ka lae?

• “Haʼu fó ba imi ukun-fuan foun ida, katak imi hadomi malu. Hanesan haʼu hadomi ona imi, imi mós tenke hadomi malu. Se imi hadomi malu, ema hotu sei hatene katak imi mak haʼu-nia dixípulu.”—João 13:34, 35.

  Se ema ida apoia funu, nia hatudu duni domin neʼebé sai nuʼudar sinál husi Jesus nia dixípulu ka lae?

Atu hatene liután, lee informasaun “Apakah Perang Sejalan dengan Kekristenan?”

Ema Kristaun no funu ohin loron

Bele ka lae, ema Kristaun la hola parte iha funu? Bele. Bíblia fó-hatene nanis katak iha “loron ikus sira”, katak iha ita-nia tempu, sei iha ema husi nasaun hotu neʼebé sei “la aprende tan funu” hodi halo tuir Jesus nia hanorin.—Isaias 2:2, 4.

• Atu hatene liután, lee Livru Haklaken ho títulu “Maromak sente oinsá se ema halo funu?”

Lakleur tan, Jeováa nuʼudar “Maromak dame nian” sei uza ninia governu iha lalehan atu salva ninia povu “husi ema neʼebé hanehan sira no husi violénsia”.—Filipe 4:9; Salmo 72:14.

• Atu hatene liután, haree vídeo Saida mak Maromak nia Ukun?