Saida mak Bíblia dehan kona-ba problema hahán menus ohin loron?

“La iha ema ida mak hamlaha.” Fraze neʼe hatudu sai ukun-naʼin sira-nia golu atu hadiʼa problema boot ida neʼebé ema barak hasoru, neʼe mak fó hahán ba ema hotu iha planeta neʼe.a Maibé, loron ida ema iha mundu neʼe bele sai livre husi problema kona-ba hahán menus ka lae? Saida mak Bíblia dehan?

Bíblia fó-hatene nanis kona-ba rai-hamlaha ohin loron

Bíblia fó sai nanis katak rai-hamlaha sei akontese iha ita-nia tempu agora, neʼebé bolu nuʼudar “loron ikus sira”. (2 Timóteo 3:1) Laʼós Maromak mak halo rai-hamlaha, maibé nia fó avizu nanis mai ita. (Tiago 1:13) Haree toʼok Bíblia nia profesia rua tuirmai neʼe.

“Rai-hamlaha . . . sei mosu iha fatin oioin.” (Mateus 24:7) Bíblia nia profesia neʼe fó sai nanis katak sei iha rai-hamlaha iha fatin barak. Matenek-naʼin sira kona-ba hahán fó sai relatóriu ida hodi dehan: “Mundu nia situasaun sai aat ba daudaun kona-ba rai-hamlaha, no hahán neʼebé ho nutrisaun diʼak mós menus.”b Ema millaun ba millaun iha nasaun barak labele hetan hahán neʼebé sira presiza. Triste katak barak mak mate tanba ida-neʼe.

“Haree kuda metan ida mai. Ida neʼebé saʼe kuda neʼe kaer hela dasin iha ninia liman.” (Apokalipse 6:5) Iha profesia neʼe, kuda no ema neʼebé saʼe kuda reprezenta rai-hamlaha iha loron ikus sira.c Dasin iha ema neʼebé saʼe kuda nia liman mak atu tetu hahán sira atu nuneʼe ema hotu bele hetan hahán uitoan. Nuʼudar kuda halai, iha lian neʼebé fó avizu katak folin ba hahán sei saʼe makaʼas no ema labele estraga hahán. (Apokalipse 6:6) Profesia neʼe fó sai ho klaru problema hahán iha mundu tomak ohin loron, tanba ema barak tebes labele hetan hahán neʼebé ho nutrisaun diʼak.

Oinsá rai-hamlaha sei remata

Matenek-naʼin sira hatete katak ita-nia planeta prodús hahán barak liu fali buat neʼebé ema hotu iha planeta neʼe presiza. Entaun, saida deʼit mak hamosu rai-hamlaha? No saida mak Bíblia hatete kona-ba ita-nia Kriadór Jeovád sei halo atu rezolve problema sira-neʼe?

Problema: Governu sira labele halakon kiak no situasaun la justisa neʼebé halo ema hamlaha.

Solusaun: Maromak nia Ukun neʼebé perfeitu sei troka ema nia governu sira neʼebé la perfeitu. (Daniel 2:44; Mateus 6:10) Ohin loron, ema kiak barak susar atu hetan hahán, maibé Maromak nia Ukun sei troka ida-neʼe. Bíblia hatete kona-ba Jesus Kristu, liurai ba Maromak nia Ukun hodi dehan: “Nia sei salva ema kiak neʼebé halerik atu husu ajuda, no nia sei salva ema kiʼik no mós sira hotu neʼebé la iha ema atu ajuda sira. . . . Sei iha ai-han barak iha rai; foho-tutun sira sei nakonu ho ai-han.”—Salmo 72:12, 16.

Problema: Funu estraga buat barak no halo sistema ekonomia la estavel, neʼebé ikusmai halo susar ba ema atu hetan hahán neʼebé sira presiza.

Solusaun: “[Jeová] sei hapara funu sira iha mundu tomak. Nia halo tohar rama no harahun diman; nia sunu kuda-karreta funu nian.” (Salmo 46:9) Maromak sei harahun armas funu nian hotu no ema neʼebé hamosu funu. Rezultadu mak ema hotu fasil atu hetan hahán. Bíblia promete: “Ema laran-loos sei buras, no dame sei sai barak.”—Salmo 72:7.

Problema: Klima neʼebé aat tebes no dezastre naturais estraga toʼos sira no oho animál sira.

Solusaun: Maromak sei kontrola mundu nia klima hodi kria ambiente neʼebé diʼak ba ai-horis sira atu fó fuan. Bíblia dehan: ”[Jeová] halo anin-fuik hakmatek; tasi nia laloran sira mós sai kalma. . . . Nia halo rai-fuik maran sai fali kolan, no rai-maran sai fali bee-matan. Nia lori ema neʼebé hamlaha hodi hela iha neʼebá . . . Sira kuda fini no kuda uvas iha toʼos neʼebé sei fó fuan barak.”—Salmo 107:29, 35-37.

Problema: Ema neʼebé kaan-teen no halo korrupsaun prodús hahán neʼebé la saudavel ka prevene ema atu labele hetan ai-han.

Solusaun: Maromak nia Ukun sei halakon ema hotu neʼebé la laran-moos no halo korrupsaun. (Salmo 37:10, 11; Isaias 61:8) Bíblia koʼalia kona-ba Maromak Jeová nuʼudar “Ida neʼebé hametin justisa ba sira neʼebé ema hamatak, ida neʼebé fó paun ba ema neʼebé hamlaha”.—Salmo 146:7.

Problema: Tinan-tinan ema estraga hahán porsentu 33 husi mundu neʼe.

Solusaun: Iha Maromak nia Ukun okos, ema sei la estraga hahán. Bainhira Jesus iha rai, nia nunka estraga hahán. Porezemplu, loron ida, nia halo milagre hodi fó hahán ba ema naʼin-5.000 liu. Depois, nia haruka ninia dixípulu sira hodi dehan: “Halibur tiha hahán neʼebé resin, atu nuneʼe labele soe estraga deʼit.”—João 6:5-13.

Tanba Maromak nia Ukun sei halakon problema sira neʼebé hamosu rai-hamlaha, ema hotu sei haksolok ho hahán barak neʼebé diʼak no saudavel. (Isaias 25:6) Atu aprende bainhira mak Maromak nia Ukun sei kumpre ida-neʼe, haree informasaun “Bainhira mak Maromak nia Reinu sei ukun mundu neʼe?”