Saida mak Bíblia dehan kona-ba krize bee iha mundu tomak?
Ita hotu presiza bee moos atu bele moris. António Guterres, sekretáriu jerál Nasoins Unidas hatete: “Tanba ema hotu iha mundu tomak presiza bee barak liután, ita hasoru krize bee moos.” Agora daudaun ema biliaun ba biliaun labele hetan bee moos.
Strdel/AFP via Getty Images
Loron ida, problema kona-ba bee sei rezolve ka lae? Ka mundu sei hasoru problema neʼe ba nafatin? Saida mak Bíblia dehan kona-ba neʼe?
Saida mak Bíblia promete kona-ba bee iha mundu neʼe
Bíblia hatete katak iha futuru problema kona-ba bee sei rezolve. Loloos, sei iha bee barak tebes neʼebé moos no fresku.
“Bee sei suli iha rai-fuik, no mota sira sei suli iha rai-tetuk maran. Rai-maran neʼebé manas sei sai fali kolan ho duʼut aas, no bee sei suli iha rai neʼebé maran-dekor.”—Isaias 35:6, 7.
Tanbasá mak ita bele fiar Bíblia nia promesa neʼe? Haree toʼok saida mak Bíblia dehan kona-ba dalan ida neʼebé Maromak kria ita-nia planeta mundu neʼe.
Buat neʼebé Bíblia hatete kona-ba mundu no siklu bee nian
“[Maromak] kria rai laʼós saugati deʼit, maibé nia kria rai atu ema bele hela bá.”—Isaias 45:18.
Tanba Maromak kria mundu hodi bele sustenta moris, nia mós halo sistema naturál hodi prodús bee fresku barak.
“[Maromak] dada bee turuk ida-idak saʼe ba leten, sira sai fali abuabu no udan, tan neʼe kalohan sira fakar tun bee, no bee neʼe tun ba ema hotu.”—Job 36:27, 28.
Ho liafuan simples, versíkulu neʼe esplika dalan neʼebé Maromak kria bee atu hafoun an hodi bee sempre iha. Loro-matan hamanas bee iha tasi no rai, no bee nia suar saʼe hodi forma kalohan, depois, udan tun ba rai hodi fó bee moos no fresku ba ema no animál sira.—Eclesiastes 1:7; Amós 5:8.
“Haʼu sei fó duni udan hodi tuir ninia tempu neʼebé loos, no rai sei fó rezultadu, no ai-hun sira iha toʼos sei fó fuan.”—Levítico 26:4.
Ema Izraél antigu mak toʼos-naʼin sira, no Maromak promete atu halo sira-nia toʼos buras hodi fó udan beibeik. Maromak hatene katak atu toʼos sira bele fó fuan, neʼe depende ba udan iha tempu neʼebé loos.
Lakleur tan, Maromak sei halo ba mundu tomak buat neʼebé nia halo ona ba ema Izraél antigu. (Isaias 30:23) Maibé agora daudaun, iha rai barak, problema kona-ba bee aumenta ba beibeik, no neʼe laʼós deʼit kona-ba udan la tun. Saida tan mak Bíblia dehan kona-ba dalan atu rezolve problema ho bee?
Oinsá mak problema kona-ba bee sei remata
Bíblia hatete katak Maromak, liuhusi ninia Reinu ka Ukun sei rezolve problema hotu iha mundu neʼe, inklui mós problema kona-ba bee. (Mateus 6:9, 10) Maromak nia Ukun mak governu ida iha lalehan neʼebé sei ukun mundu tomak. (Daniel 2:44; Apokalipse 11:15) Maromak nia Ukun mós sei halo buat neʼebé ema nia governu labele halo, neʼe mak halakon hun ba problema sira kona-ba bee.
Problema: Mudansa boot iha klima mós kontribui ba problema iha siklu bee nian. Konsekuénsia sira mak inklui rai sai maran-dekor iha fatin balu maibé iha inundasaun boot iha fatin seluk, dala ruma tanba udan boot, ka tanba tasi saʼe.
Solusaun: Maromak nia Ukun sei hafoun fali ita-nia ambiente hodi nuneʼe planeta mundu neʼe bele sai diʼak fali. Maromak promete: “Haree bá! Haʼu halo buat hotu sai foun.” (Apokalipse 21:5) Rai sira neʼebé maran-dekor sei iha bee fresku barak, no ai-horis sira sei sai buras iha fatin oioin. (Isaias 41:17-20) Liuhusi Jesus Kristu, Maromak nia Ukun mós sei kontrola mundu nia forsa natureza sira.
Bainhira Jesus iha rai, nia halo anin boot sai hakmatek, no neʼe ezemplu kiʼik deʼit kona-ba kbiit neʼebé Maromak fó ba Jesus. (Marcos 4:39, 41) Kuandu Jesus Kristu ukun nuʼudar Liurai iha Maromak nia Ukun, dezastre naturais sira sei la iha tan. Ema hotu sei haksolok ho dame neʼebé loos, no la presiza taʼuk tan ba dezastre sira.
Problema: Ema neʼebé hanoin an deʼit no mós kompañia sira neʼebé kaan-teen, sira hafoʼer mota, lagoa, no bee-matan sira, no neʼe mós halo bee moos sai menus.
Solusaun: Maromak sei hamoos mundu neʼe, no halo mota, tasi no rai sai moos fali. Rai neʼe sei sai paraízu. Bíblia uza liafuan hanesan poezia, hodi hatete: “Rai-fuik no rai neʼebé maran-dekor sei haksolok, no rai-tetuk maran sei haksolok no sai nakonu ho ai-funan asafraun.”—Isaias 35:1.
Saida mak sei akontese ba ema neʼebé la hanoin ema seluk no ambiente? Maromak promete “atu halakon sira neʼebé estraga daudaun mundu”.—Apokalipse 11:18; Provérbios 2:21, 22.
Problema: Ema estraga bee lalais liu fali mundu nia prosesu atu prodús bee.
Solusaun: Maromak nia Ukun sei halo Maromak nia hakarak “sai loos iha rai”, laʼós ema kaan-teen sira-nia hakarak. (Mateus 6:9, 10) Maromak nia Ukun sei fó edukasaun diʼak liu hotu ba povu sira. Isaias 11:9 hatete: “Mundu tomak sei nakonu ho koñesimentu kona-ba Jeová.”a Tanba ema iha koñesimentu furak neʼe, no mós tanba sira iha domin boot ba Maromak no ninia kriasaun sira hotu, ema sei tau matan ho didiʼak planeta mundu neʼe.
Atu buka-hatene liután kona-ba saida mak Maromak nia Ukun sei halo, haree informasaun “Saida mak Maromak nia Reinu sei halo?”
Loke livru Isaias kapítulu 35, atu lee kona-ba oinsá mundu sei sai fali paraízu.
Haree vídeo Tanbasá mak Maromak kria mundu? atu aprende liután kona-ba Maromak nia hakarak ba mundu no ema.
a Jeová mak Maromak nia naran. (Salmo 83:18) Haree informasaun “Sé mak Jeová?”