Protesaun ba feto—Saida mak Bíblia hatete?

“Bainhira haʼu sei kiʼik, haʼu-nia maun abuza haʼu loroloron iha dalan fíziku no liuhusi liafuan. Depois haʼu kaben, haʼu-nia banin-feto trata aat haʼu. Haʼu-nia banin-feto no banin-mane trata haʼu hanesan atan ida. Haʼu luta hasoru hakarak atu oho an.”—Madhu,a Índia.

Organizasaun Saúde Mundiál hatete: “Violénsia ba feto akontese beibeik iha mundu tomak.” Iha mundu neʼe, maizumenus feto ida husi feto naʼin-tolu mak hetan violénsia iha dalan fíziku no seksuál iha sira-nia moris.

Se ida-neʼe akontese ona ba Ita, karik neʼe halo Ita sente la seguru, Ita hanoin katak fatin hotu neʼebé Ita bá, ema sei koʼalia liafuan neʼebé hakanek Ita-nia laran, halo violénsia no abuzu seksuál ba Ita. Tanba mundu nakonu ho hahalok aat ba feto sira, karik Ita sente ema maioria hanoin katak ‘Feto la importante’. Maibé Maromak hafolin feto sira ka lae?

Maromak hanoin oinsá kona-ba feto sira?

Eskritura: “[Maromak] kria sira mane no feto.”—Génesis 1:27.

Neʼe katak sá: Maromak kria mane no feto. Ba Maromak, mane no feto merese hetan respeitu. Liután neʼe, Maromak hakarak laʼen ida atu “hadomi ninia feen hanesan ninia an rasik”, no labele kontrola ninia feen ho liafuan kroʼat no violénsia. (Éfeso 5:33; Koloso 3:19) Klaru katak Maromak hakarak feto sira moris ho seguru.

“Haʼu hetan abuzu seksuál husi haʼu-nia família kuandu haʼu sei kiʼik. Bainhira haʼu tinan 17, haʼu-nia patraun ameasa atu hasai haʼu husi serbisu-fatin se haʼu la halo relasaun seksuál ho nia. Bainhira haʼu sai boot, haʼu-nia laʼen, inan-aman no viziñu sira la hafolin haʼu. Maibé ikusmai haʼu aprende kona-ba ita-nia Kriadór, Maromak Jeová.b Maromak Jeová respeitu feto sira. Neʼe halo haʼu fiar metin katak Nia hadomi no hafolin haʼu.”—Maria, Arjentina.

Saida mak bele ajuda Ita atu sai diʼak fali?

Eskritura: “Iha mós belun neʼebé laran-metin liu fali maun-alin.”—Provérbios 18:24.

Neʼe katak sá: Belun neʼebé diʼak sei apoia Ita. Diʼak atu fó sai Ita-nia sentimentu ba ema neʼebé Ita tau fiar, se Ita sente katak neʼe sei ajuda Ita.

“Durante tinan 20 nia laran, haʼu la fó-hatene ema ida katak haʼu hetan abuzu seksuál. Rezultadu mak haʼu sai boot ho sentimentu la kontente, laran-taridu, no depresaun. Maibé bainhira konta haʼu-nia esperiénsia aat neʼe ba ema ida neʼebé prontu rona, haʼu sente kmaan tebetebes.”—Elif, Turkia.

Eskritura: “Entrega imi-nia laran-susar hotu ba [Maromak], tanba nia hanoin imi.”—1 Pedro 5:7.

Neʼe katak sá: Bainhira Ita halo orasaun, Maromak rona duni. (Salmo 55:22; 65:2) Tanba nia hanoin Ita, nia bele ajuda Ita fiar katak Ita mak folin-boot tebes.

“Hodi aprende kona-ba Jeová, neʼe ajuda kura neineik-neineik haʼu-nia sentimentu laran-kanek. Agora haʼu bele halo orasaun ba Maromak hodi fó sai haʼu-nia sentimentu hotu ba nia. Nia hanesan belun ida neʼebé komprende tebes haʼu-nia sentimentu.”—Ana, Belize.

Maromak sei hapara hahalok aat neʼebé ema halo ba feto sira ka lae?

Eskritura: “Jeová . . . sei hatudu justisa ba oan-kiak sira no ba sira neʼebé hetan terus, atu nuneʼe ema iha rai labele tan halo sira taʼuk.”—Salmo 10:​17, 18.

Neʼe katak sá: Maromak sei halakon hahalok la justisa hotu, inklui hahalok aat no violénsia ba feto sira.

“Hodi hatene katak lakleur tan Jeová sei halakon hahalok aat neʼebé ema halo ba feto sira, neʼe hanesan ai-moruk ida neʼebé halo kalma haʼu. Neʼe halo haʼu sente dame iha haʼu-nia laran.”—Roberta, Méxiku.

Atu aprende liután kona-ba esperansa husi Bíblia, razaun tanbasá ita bele tau fiar ba ida-neʼe, no oinsá Testemuña ba Jeová uza Bíblia atu ajuda ema seluk, Ita bele husu atu hetan vizita husi Testemuña.

Download versaun print nian.