Tanbasá ema labele moris hamutuk ho dame?​—Saida mak Bíblia dehan?

Ukun-naʼin sira no organizasaun internasionál seidauk bele lori dame ba ema hotu. Komesa husi Funu Mundial Segundu, agora mak iha konflitu boot barak liufali tempu uluk. Maizumenus ema billaun 2, neʼe mak porsentu 25 husi populasaun iha mundu tomak neʼebé hela iha área sira neʼebé iha konflitu.

Tanbasá ema labele lori dame ba mundu? Saida mak Bíblia dehan?

Razaun tolu tanbasá ema labele lori dame ba mundu

1. 1. Ema hatudu atitude neʼebé hanetik sira atu iha dame ho ema seluk. Bíblia fó-hatene nanis ona katak iha ita-nia tempu, “ema sei hadomi deʼit sira-nia an, hadomi osan, gaba an, loko an, . . . la hatudu laran-metin, . . . la rona malu, . . . la kontrola an, siʼak, . . . ulun-toos, foti an”.​—2 Timóteo 3:2-4.

2. 2. Ema ida-idak ka nuʼudar grupu ida la iha abilidade atu rezolve sira-nia problema rasik, se sira la hetan ajuda husi Maromak Jeováa, Kriadór ba mundu tomak. Bíblia fó sai katak “ema neʼebé laʼo mós la iha kbiit atu hili ninia hakat.”—Jeremias 10:23.

3. 3. Ukun-naʼin neʼebé forsa boot no aat tebes, Diabu Satanas mak kontrola mundu neʼe no “lohi ema iha mundu tomak”. (Apokalipse 12:9) Durante “aat-naʼin mak domina mundu tomak”, sei iha funu no konflitu barak.​—1 João 5:19.

Se mak bele lori dame ba mundu?

Bíblia fó konfiansa mai ita katak ema labele lori dame ba mundu, só Maromak mak bele.

• “Jeová dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, no haʼu hakarak fó imi futuru kapás no esperansa.’”​—Jeremias 29:11.

Oinsá mak Maromak sei kumpre promesa neʼe? “Maromak neʼebé fó dame sei harahun Satanás.” (Roma 16:20) Maromak sei uza governu iha lalehan, neʼebé Bíblia temi nuʼudar “Maromak nia Ukun”, atu lori dame ba mundu tomak. (Lucas 4:43) Bainhira Liurai Jesus Kristu ukun mundu tomak, ema sei aprende atu moris ho dame.​—Isaias 9:6, 7.

• Atu aprende liután, haree informasaun “Saida mak Maromak nia Reinu sei halo?”