Funu mundiál sei akontese ka lae?—Saida mak Bíblia dehan?

Durante tinan 30 nia laran, ema barak sente katak situasaun entre nasaun sira mak estavel no relasaun entre nasaun sira sai diʼak liután. Maibé buat oioin neʼebé foin lalais akontese halo sira troka sira-nia hanoin.

•  “Izraél no Hezbollah tiru malu iha fronteira Líbanu, neʼe halo ema hanoin barak katak funu iha Gaza sei afeta rai seluk tan iha área neʼebá.”—Reuters, 6 Janeiru 2024.

•  “Grupu barak iha Iraun nia okos ataka fatin oioin, no Iraun komesa fali atu prodús armas nukleár. Buat sira-neʼe hotu lori ameasa ba nasaun sira iha Europa Oeste ho Amérika, liuliu tanba agora daudaun Rúsia no Xina mak apoia Iraun.”—The New York Times, 7 Janeiru 2024.

•  “Rúsia kontinua ataka Ukránia no lori estragu boot iha fatin barak.”—UN News, 11 Janeiru 2024.

•  “Xina nia forsa iha dalan ekonomia no militár aumenta liután, ema Taiwán hametin liután sira-nia identidade, no relasaun entre Xina ho Estadus Unidus sai fraku. Neʼe katak krize bele mosu iha tempu naran deʼit.”—The Japan Times, 9 Janeiru 2024.

Bíblia fó sai buat ruma kona-ba situasaun internasionál neʼebé la estavel ohin loron ka lae? Situasaun neʼe sei hamosu funu mundiál ka lae?

Bíblia fó-hatene nanis kona-ba situasaun ohin loron

Bíblia la temi espesífiku kona-ba funu sira neʼebé akontese daudaun ohin loron. Maibé Bíblia fó-hatene nanis duni kona-ba funu neʼebé akontese iha fatin oioin ohin loron, neʼebé “hasai tiha dame husi rai”.—Apokalipse 6:4.

Livru Daniel fó sai nanis katak “iha tempu nia rohan”, nasaun boot sira sei “dudu malu” ka kompete malu. Akontesimentu hanesan neʼe sei envolve uza forsa militár no gasta “rikusoin” ka osan barak.—Daniel 11:40, 42, 43.

Funu ida neʼebé sei akontese

Bíblia fó sai katak situasaun iha mundu sei sai aat liután no tuirmai mak sei sai diʼak. Jesus fó-hatene nanis kona-ba “terus boot” neʼebé sei akontese, hodi dehan: “Husi mundu hahú toʼo agora seidauk mosu terus hanesan neʼe.” (Mateus 24:21) “Terus boot” neʼe sei lori ba funu ida naran Armagedon, no Bíblia esplika katak neʼe mak “funu iha Maromak neʼebé Kbiit Boot Liu Hotu nia loron boot”.—Apokalipse 16:14, 16.

Maibé Armagedon mak funu neʼebé atu salva ema, laʼós atu halakon ema. Liuhusi funu neʼe, Maromak sei halakon ema nia ukun neʼebé hamosu funu barak. Atu hatene liután oinsá Armagedon sei lori dame ba nafatin, lee informasaun tuirmai neʼe:

•  “Saida mak funu Armagedon?”

•  “Ita hein namanas ba Armagedon”