Problema polítiku neʼebé kumpre Bíblia nia profesia

Ema ohin loron haketak malu duni tanba sira-nia opiniaun neʼebé la hanesan kona-ba buat polítiku nian. Sira haksesuk malu makaʼas kona-ba lei sira neʼebé kona moris loroloron nian, no fó sai ho hirus sira-nia opiniaun neʼebé la hanesan. Iha governu, ema neʼebé halo lei no ukun-naʼin sira la konkorda malu no lakohi rende an kona-ba sira-nia hakarak. Buat sira-neʼe hamosu problema polítiku no hanetik governu nia kbiit atu halo sira-nia serbisu.

Maibé, problema polítiku neʼebé akontese iha Estadus Unidus no Bretaña ka Reinu Unidu, iha signifikadu boot. Tanbasá? Tanba Bíblia hatete nanis katak problema polítiku neʼe sei akontese duni iha nasaun rua neʼe nia laran, no iha tempu hanesan mak Maromak harii governu ida neʼebé sei hadiʼa situasaun tomak iha rai.

Problema polítiku nian “iha loron sira-neʼe nia rohan”

Bíblia fó sai profesia ida neʼebé interese tebes, neʼe hakerek iha livru Daniel. Iha profesia neʼe, Maromak hatudu “kona-ba buat neʼebé sei akontese iha loron sira-neʼe nia rohan”, no neʼe refere ba tempu iha futuru, bainhira mudansa importante ida neʼebé sei kona ema hotu.—Daniel 2:28.

Maromak fó sai profesia neʼe ba liurai Babilónia liuhusi mehi ida. Iha mehi neʼe, liurai haree estátua ida neʼebé boot tebetebes neʼebé halo husi besi oioin. Depois neʼe, profeta Daniel esplika katak husi estátua neʼe nia ulun toʼo ain neʼe reprezenta ukun-naʼin sira neʼebé iha kbiit boot, maibé depois neʼe lakon sira-nia kbiit durante iha ema nia istória.a Ikusmai, fatuk boot ida neʼebé reprezenta Ukun ka governu neʼebé Maromak mak harii sei xoke hodi harahun tomak estátua neʼe.—Daniel 2:36-45.

Tuir profesia neʼe, Maromak nia Ukun sei troka ema nia governu hotu. Ukun neʼe mak hanesan deʼit ho Ukun neʼebé Jesus hanorin ninia dixípulu sira atu husu iha sira-nia orasaun, nia dehan: “Halo Ita-nia Ukun toʼo mai rai.”—Mateus 6:10.

Maibé husi profesia neʼe, estátua nia parte neʼebé mak fó sai kona-ba problema polítiku? Haree katak estátua neʼe nia ain mak “halo husi besi kahur ho rai-mean”. (Daniel 2:33) Parte ain neʼe úniku tanba la hanesan ho parte seluk husi estátua neʼebé halo husi besi diʼak oioin, neʼe hatudu katak sei iha ema nia ukun boot ida neʼebé la hanesan ho ukun sira seluk. Maibé oinsá? Daniel nia profesia esplika kona-ba neʼe:

Tuir profesia neʼe, ain husi estátua neʼe reprezenta ukun boot liu ida neʼebé sei hasoru problema polítiku. Tanba povu neʼebé moris iha ukun neʼe nia okos mak halo fraku ukun neʼe nia kbiit.

Daniel nia profesia sai loos agora daudaun

Ain neʼebé iha estátua neʼe reprezenta ukun neʼebé boot liu iha mundu agora daudaun, neʼe mak aliansa entre Estadus Unidus no Bretaña. Oinsá mak mudansa sira ohin loron prova ida-neʼe?

Estátua neʼe nia ain mak “halo husi besi kahur ho rai-mean”, buat rua neʼe kahur hamutuk mak halo ain neʼe fraku. (Daniel 2:42) Ohin loron, Estadus Unidus no Bretaña nia kbiit sai fraku tanba sira rasik nia povu mak la iha unidade. Porezemplu, buat neʼebé hanesan husi nasaun rua neʼe mak sira-nia sidadaun rasik iha rai laran mak kontra hasoru malu. No povu mós halo protesta ho violénsia kona-ba sira-nia direitu. Ukun-naʼin sira neʼebé povu mak hili, sira la iha hanoin neʼebé hanesan kona-ba oinsá atu halaʼo povu nia hakarak. No mós tanba povu haketak malu, dala ruma governu rua neʼe labele implementa sira-nia lei sira ho susesu.

Mai ita aprende liután kona-ba parte seluk husi Daniel nia profesia no oinsá buat sira-neʼe sai loos agora daudaun:

Profesia: “Ukun neʼe sei la iha unidade, maski nuneʼe parte balu husi ukun neʼe sei toos hanesan besi.”—Daniel 2:41.

Signifikadu: Maski sira la iha unidade kona-ba buat polítiku, maibé Estadus Unidus no Bretaña mantein nafatin sira-nia forsa militár neʼebé forte tebetebes. Tan neʼe mak sira bele uza sira-nia kbiit neʼebé iha forsa hanesan besi.

Sai loos

Iha 2023, Estadus Unidus no Reinu Unidu gasta osan ba forsa militár makaʼas liu fali nasaun 12 neʼebé tuir sira iha lista kona-ba gasta osan ba militár.—Stockholm International Peace Research Institute.

“Relasaun entre Reinu Unidu no Estadus Unidus kona-ba defende sira-nia rai . . sai metin liu fali nasaun sira seluk nia relasaun ba malu no sira mós uza teknolojia no ideia foun liu nasaun sira seluk. . . . Ami serbisu hamutuk, ami hamriik hamutuk, hasoru ami-nia inimigu hamutuk.”—Strategic Command, U.K. Ministry of Defence, Abríl 2024.

Profesia: “No hanesan ninia ain-fuan halo husi besi kahur ho rai-mean, nuneʼe mós ukun neʼe sei forte iha parte balu no fraku iha parte seluk.”—Daniel 2:42.

Signifikadu: Maski Estadus Unidus no Bretaña iha forsa, maibé sira labele halo buat hotu neʼebé sira hakarak tanba sira-nia sistema demokrasia hanetik sira atu kumpre planu hotu.

Sai loos

“Matenek-naʼin polítiku nian balu dehan Amérika nia sistema polítiku hanetik sira atu halaʼo buat neʼebé sira koʼalia ona ba mundu no sira mós labele halo planu kona-ba seguransa no sistema negósiu nian.”—“The Wall Street Journal.”

“Tanba problema polítiku nian iha Bretaña mak aat liu fali tempu uluk, neʼe impede duni ukun-naʼin sira. Tan neʼe governu nia serbisu-naʼin sira labele halo mudansa neʼebé sira presiza halo atu ajuda povu.”—Institute for Government.

Profesia: “Sira [katak ema nia ukun] sei kahur ho povu. Maibé sira sei la belit hamutuk.”—Daniel 2:43.

Signifikadu: Neʼe katak ema baibain kaer kbiit uitoan iha governu, maibé rezultadu mak ukun-naʼin sira no ema neʼebé vota ba governu neʼe ladún kontente.

Sai loos

“Ohin loron dalan neʼebé Amérika haree kona-ba buat polítiku mak nafatin negativu deʼit.”—Pew Research Center.

“Husi tinan 50 liubá toʼo agora ema Bretaña nia fiar ba sira-nia governu no ukun-naʼin sira sai menus tebetebes.”—“National Centre for Social Research.”

Oinsá mak Daniel nia profesia sai loos iha futuru

Tuir Daniel nia profesia, Estadus Unidus no Bretaña nia ukun mak sei nafatin sai ukun boot liu iha tempu neʼebé Maromak nia Ukun mai no halakon ema nia governu hotu.—Daniel 2:44.

Iha livru Apokalipse mós fó sai profesia neʼebé akontese mós iha tempu hanesan, Bíblia dehan katak “liurai sira iha mundu tomak” sei halibur hamutuk atu kontra hasoru Maromak Jeováb iha funu Armagedon, neʼe katak “funu iha Maromak neʼebé Kbiit Boot Liu Hotu nia loron boot”. (Apokalipse 16:14, 16; 19:19-21) Iha funu neʼe, Jeová sei halakon ema nia governu hotu no mós hasai ukun-naʼin hotu neʼebé estátua iha Daniel nia profesia reprezenta.

Atu aprende liután, haree informasaun “Saida mak funu Armagedon?”

Hetan benefísiu husi Daniel nia profesia kona-ba problema polítiku

Bíblia fó sai informasaun neʼebé loos kona-ba problema polítiku nian ohin loron iha Estadus Unidus no Bretaña, no ida-neʼe sei ajuda ita atu iha hanoin neʼebé loos kona-ba buat neʼebé akontese agora.

• Ikusmai ita sei komprende tanbasá Jesus hakarak ninia dixípulu sira atu nafatin neutrál kona-ba mundu neʼe nia situasaun polítiku nian. (João 17:16) No ita mós sei komprende liután tanbasá Jesus neʼebé Maromak hili atu sai nuʼudar liurai ba ninia Ukun, hatete: “Haʼu-nia Ukun laʼós parte husi mundu neʼe.”—João 18:36.

• Ita sei sente laran-manas kona-ba esperansa katak lakleur tan Maromak nia Ukun sei troka buat hotu no lori bensaun furak ba ema hotu tuir buat neʼebé Maromak promete ona.—Apokalipse 21:3, 4.

• Ita bele fiar metin katak iha futuru, ita sei la presiza hanoin barak katak problema entre nasaun sira sei book sira halo buat ruma neʼebé bele halakon mundu neʼe.—Salmo 37:11, 29.

Daniel nia profesia hatudu katak aliansa entre Estadus Unidus no Bretaña neʼebé reprezenta liuhusi estátua neʼe nia ain mak ema nia ukun ikus neʼebé sei domina mundu. Depois ida-neʼe lakon tiha governu perfeitu ida sei Ukun husi lalehan neʼe mak Maromak nia Ukun!

Atu hatene liután kona-ba saida mak Maromak nia Ukun sei halo ba ema hotu, haree vídeo Saida mak Maromak nia Ukun?