Mensajen husi Maromak nia Liafuan—Esperansa ba Refujiadu!

Tinan-tinan, ema millaun ba millaun tenke husik sira-nia hela-fatin atu bele hetan protesaun. Ita hasoru daudaun situasaun susar hanesan neʼe ka lae? Se nuneʼe, fiar ba katak Ita la presiza hasoru neʼe mesak. Maromak fó esperansa kona-ba moris neʼebé diʼak liu no Ita bele aprende ida-neʼe husi Eskritura Sagrada.

Christos Stylianides husi Ajénsia ba Uniaun Europeiaa hatete:“Maski refujiadu sira no ema neʼebé tenke husik sira-nia hela-fatinb presiza ajuda iha tempu neʼe kedas, maibé sira mós presiza . . . esperansa ba futuru.” Esperansa bele ajuda ema atu nafatin iha hanoin pozitivu kona-ba sira-nia futuru. Maski esperansa mak importante, maibé refujiadu sira mós presiza hetan kmaan hodi bele tahan situasaun susar.

“Uluk bainhira haʼu tenke husik haʼu-nia rai no família, haʼu sente laran-kanek no hanoin haʼu sei nunka bele tahan ida-neʼe. Haʼu sente taʼuk, triste tebes no laran-taridu.”—Emmanuel, Haití.

Ita mós sente hanesan neʼe ka lae? Se Ita tenke husik Ita-nia hela-fatin, Ita presiza hetan kmaan no esperansa. Oinsá mak Maromak nia Liafuan Bíblia, bele ajuda Ita?

Hetan kmaan husi Maromak nia Liafuan

Bíblia hatete: “Jeovác . . . hadomi ema estranjeiru.”—Deuteronómio 10:17, 18.

Bíblia hatete: “Jeová besik ba ema hotu neʼebé bolu nia.”—Salmo 145:18.

Bíblia hatete: “Maromak neʼebé loos nunka halo buat neʼebé aat . . . Ida neʼebé Kbiit boot liu hotu sempre halo tuir justisa.”—Job 34:10, 12.

Neʼe katak laʼós Maromak mak fó susar mai Ita. Nia la fó kastigu mai Ita, no nia mós la fó susar mai Ita hodi koko Ita.

Esperansa husi Maromak nia Liafuan

Bíblia esplika saida mak Maromak sei halo ba ita iha futuru. Haree toʼok oinsá esperansa neʼe ajuda ona ema neʼebé tenke husik sira-nia hela-fatin.

Bíblia hatete: “[Maromak] sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras.”—Apokalipse 21:4.

Neʼe katak Ita sei la hetan tan terus. Maromak promete atu rezolve problema hotu neʼebé ohin loron halakon ema nia esperansa.

“Maromak sei halakon buat hotu neʼebé la justisa no buat aat hotu neʼebé haleʼu ita. Esperansa neʼe ajuda haʼu atu fokus ba tempu neʼebé terus hotu sei lakon.”—Karla, Elsalvadór.

Bíblia hatete: “Ema sei la hanoin tan buat uluk nian, no buat sira-neʼe sei la rai nafatin iha ema nia laran.”—Isaias 65:17.

Neʼe katak ema sei la hanoin-hetan tan buat aat neʼebé akontese iha tempu uluk. Maromak promete katak nia sei halakon memória aat hotu neʼebé ohin loron halo Ita sente laran-taridu.

“Bíblia promete katak ita sei la hanoin-hetan tan kona-ba terus no susar hotu neʼebé ita hasoru. Esperansa neʼe ajuda haʼu atu tahan susar hotu neʼebé haʼu hasoru agora, tanba lakleur tan haʼu hatene katak buat sira-neʼe hotu sei la iha tan.”—Natalia, Ukránia.

Bíblia hatete: “Maromak iha lalehan sei harii ukun ida neʼebé sei . . . harahun no halakon liurai hotu nia ukun.”—Daniel 2:44.

Neʼe katak Ukun perfeitu ida iha lalehan sei ukun mundu tomak. Lakleur tan Maromak sei halakon ema nia governu hotu no troka fali ho ninia Governu rasik. Governu neʼe sei lori dame no seguru neʼebé loos hamutuk ho justisa no moris neʼebé diʼak ba ema hotu.—Miqueias 4:3, 4.

“Haʼu sente kontente hodi hatene katak hahalok hanesan hanehan ema, diskriminasaun no rasizmu sei la iha tan. Lakleur tan Jeová nia Ukun sei halakon problema sira-neʼe hotu.”—Mustafa, Médiu Oriente.

Matenek husi Maromak nia Liafuan

Bíblia nia matenek bele ajuda Ita nuʼudar Ita tahan susar sira neʼebé Ita hasoru. Neʼe mós bele ajuda Ita ho Ita-nia situasaun foun, hanesan lakon Ita-nia sasán sira. Haree oinsá mak prinsípiu sira tuirmai ajuda refujiadu sira:

Bíblia hatete: “Maski ema ida hetan rikusoin barak, ninia moris la mai husi buat neʼebé nia iha.”—Lucas 12:15.

Oinsá mak liafuan matenek sira-neʼe ajuda Ita tahan: Ita sente hakfodak no triste tebes ho buat neʼebé Ita lakon ona. Maibé se Ita uza tempu atu hanoin oinsá Ita-nia moris mak folin-boot liu fali buat neʼebé Ita lakon ona, karik neʼe sei ajuda Ita atu la triste demais ho buat sira-neʼe.

“Moris mak importante liu fali sasán sira. Iha situasaun balu, pozisaun ka osan labele ajuda Ita.”—Natalia, Ukránia.

Bíblia hatete: “Keta dehan: ‘Tanbasá mak loron uluk nian diʼak liu fali agora?’”—Eclesiastes 7:10.

Oinsá mak liafuan matenek sira-neʼe ajuda Ita tahan: Ita-nia situasaun agora daudaun mak susar duni, maibé koko atu la kompara ida-neʼe ho Ita-nia situasaun uluk, tanba karik neʼe bele halo Ita sai hirus.

“Hodi simu haʼu-nia situasaun agora, neʼe bele ajuda haʼu atu kontinua iha hanoin pozitivu.”—Eli, Ruanda.

Bíblia hatete: “Se ita iha ai-han no roupa, ita tenke kontente ho buat sira-neʼe.”—1 Timóteo 6:8.

Oinsá mak liafuan matenek sira-neʼe ajuda Ita tahan: Koko atu kontente ho presiza loroloron nian neʼebé Ita iha. Hodi sai kontente, Ita sei hamenus estrese no neʼe sei ajuda Ita atu sai kalma.

“Bíblia ajuda haʼu atu iha hanoin neʼebé loos, atu la fokus ba buat neʼebé Ita lakon. Haʼu no haʼu-nia feen kontente atu bele moris no iha fatin neʼebé seguru.”—Ivan, Ukránia.

Bíblia hatete: “Neʼe duni, buat hotu neʼebé imi hakarak ema halo ba imi, imi mós tenke halo ba sira.”—Mateus 7:12.

Oinsá mak liafuan matenek sira-neʼe ajuda Ita tahan: Ita bele iha relasaun diʼak ho ema seluk se Ita hakaʼas an atu hatudu pasiénsia no laran-diʼak. Se Ita halo nuneʼe, neʼe sei halo fasil ba ema seluk atu simu Ita ho diʼak.

“Ema barak gosta bainhira Ita trata sira ho respeitu, laran-diʼak no domin. Hahalok sira-neʼe bele ajuda Ita atu iha relasaun diʼak ho ema sira neʼebé hela iha Ita-nia área foun neʼe.”—Angelo, Sri Lanka.

Bíblia hatete: “Iha situasaun hotu husu ajuda husi Maromak . . . no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin.”—Filipe 4:6, 7.

Oinsá mak liafuan matenek sira-neʼe ajuda Ita tahan: Halo orasaun ba Maromak kona-ba Ita-nia sentimentu, Ita-nia presiza sira, no estrese. Orasaun hanesan neʼe bele hamenus Ita-nia estrese nuʼudar Ita sai toman ho Ita-nia situasaun foun.

“Haʼu halo orasaun ba Maromak bainhira haʼu iha problema, no nia hatán haʼu. Buat neʼebé haʼu aprende husi Bíblia ajuda haʼu atu iha dame iha laran.”—Yo, Sudão do Sul.

“Bíblia nia matadalan ajuda haʼu atu hetan dame iha laran, haʼu presiza ida-neʼe atu tahan hasoru situasaun susar.”—Valentina, Ukránia.

“Hodi hatene katak Maromak Jeová promete moris neʼebé diʼak liu hotu, neʼe fó kbiit mai haʼu.”—Emmanuel, Haití

Ita hakarak aprende liután kona-ba Bíblia nia promesa sira neʼebé fó kmaan no esperansa no oinsá Ita bele tau fiar ba promesa sira-neʼe? Husu Testemuña ba Jeová ida vizita Ita. Sira sei kontente atu ajuda Ita.