Jeremias 29:11—“Haʼu hatene haʼu-nia planu neʼebé haʼu halo kona-ba imi”

“Jeováa dehan: ‘Haʼu hatene didiʼak buat neʼebé haʼu hakarak ba imi, haʼu hakarak fó imi dame, laʼós fó-terus, haʼu hakarak fó imi futuru kapás no esperansa.’”—Jeremias 29:11, Tradusaun Mundu Foun.

“Hau hatene Hau nia planu nebee Hau halo kona ba imi, hatete NAI, planu dame nian no laos planu aat, hodi foo ba imi futuru ida nebee iha esperansa.”—Jeremias 29:11, Bíblia Kadi Kapasidade.

Signifikadu husi Jeremias 29:11

Maromak Jeová promete ba ninia atan sira katak nia sei fó futuru neʼebé nakonu ho dame. Maski liafuan neʼe hatoʼo ba ema iha tempu uluk, Maromak nia hanoin ba ninia povu ohin loron mós hanesan. Nia mak “Maromak neʼebé fó esperansa”. (Roma 15:13) Tuir loloos, nia rai hela promesa hanesan neʼe iha Bíblia hodi “fó ita esperansa” ba futuru neʼebé diʼak.—Roma 15:4.

Kontestu husi Jeremias 29:11

Liafuan neʼe mak parte husi karta neʼebé haruka ba ema Izraél iha Babilónia neʼebé husik Jeruzalein no sai dadur.b (Jeremias 29:1) Maromak hatete ba sira katak sira sei hela iha Babilónia ba tempu kleur no sira sei presiza harii uma, halo toʼos, no haboot oan. (Jeremias 29:4-9) Maibé Maromak hatutan tan: “Bainhira tinan 70 iha Babilónia remata ona, haʼu sei tau fali atensaun ba imi, no haʼu sei kumpre haʼu-nia promesa hodi lori imi fila fali ba [Jeruzalein].” (Jeremias 29:10) Sin, Maromak promete katak nia sei la haluha sira no sira-nia esperansa atu fila fali ba sira-nia rai sei sai loos.—Jeremias 31:16, 17.

Maromak kumpre ninia promesa ba ema Izraél. Hanesan nia fó-hatene nanis, Liurai Ciro husi Pérsia manán Babilónia. (Isaias 45:1, 2; Jeremias 51:30-32) Depois neʼe, Ciro husik ema Judeu atu fila fali ba sira-nia rai. Liutiha tinan 70 depois sira sai dadur, sira bele fila fali ba Jeruzalein.—2 Krónikas 36:20-23; Ezras 3:1.

Promesa iha Jeremias 29:11 sai loos ona, no neʼe fó esperansa ba ita ohin loron neʼebé tau fiar ba Maromak nia promesa. Neʼe inklui promesa kona-ba mundu tomak sai nakonu ho dame liuhusi Jesus Kristu, liurai ba Maromak nia Ukun.—Salmo 37:10, 11, 29; Isaias 55:11; Mateus 6:10.

Hanoin neʼebé sala kona-ba Jeremias 29:11

Hanoin neʼebé sala: Maromak iha “planu” espesífiku ba ema ida-idak.

Faktu: Maromak husik ema atu hili rasik buat neʼebé sira sei halo. Maromak hatoʼo liafuan iha Jeremias 29:11 ba ema Izraél iha Babilónia nuʼudar grupu ida, no ninia hakarak mak sira iha futuru neʼebé nakonu ho dame nuʼudar grupu. (Jeremias 29:4) Maibé Maromak husik ema ida-idak foti desizaun atu hetan benefísiu husi Ninia promesa. (Deuteronómio 30:19, 20; Jeremias 29:32) Ema neʼebé buka Maromak bele halo ida-neʼe hodi harohan ba nia ho laran.—Jeremias 29:12, 13.