Filipe 4:6, 7—“Imi keta laran taridu kona ba buat ruma”

“Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.”—Filipe 4:6, 7, Tradusaun Mundu Foun.

“Imi keta laran taridu kona ba buat ruma. Iha buat hotu, harohan no hamulak ba hodi fo agradese; hatoʼo imi nia harohan ba Maromak. Nuneʼe, Maromak dame nian sei rai hela imi nia fuan no laran iha Kristu Jesus.”—Filipe 4:6, 7, Liafuan diak ba imi, segunda edisaun.

Signifikadu husi Filipe 4:6, 7

Dala ruma Maromak nia atan sira mós sente laran-taridu no hanoin barak demais. Maibé hodi halo orasaun, sira bele sente kalma. Maromak promete atu halo sira sente dame iha laran, no neʼe sei ajuda sira atu tahan susar no proteje sira-nia hanoin no emosaun. Versíkulu 6 temi kona-ba orasaun hanesan saida mak sira bele hatoʼo hodi hetan dame neʼebé mai husi Maromak.

Ita bele husu ajuda husi Maromak kona-ba buat espesífiku ruma “iha situasaun hotu”. Maibé, buat neʼebé ita husu iha ita-nia orasaun tenkesér tuir Maromak nia hakarak neʼebé hakerek ona iha Bíblia.—1 João 5:14.

Ita mós bele harohan, neʼe katak ita hatoʼo orasaun ho laran ba Maromak atu husu ninia ajuda. Ita bele halo orasaun hanesan neʼe bainhira ita estrese ka hasoru perigu ruma. Neʼe mak buat neʼebé uluk Jesus halo. (Ebreu 5:7) Baibain ema halo orasaun hanesan neʼe dala barak, laʼós dala ida deʼit.

Ita mós bele fó agradese ba Maromak kona-ba buat neʼebé nia halo ona mai ita no mós buat neʼebé nia sei halo iha aban-bainrua. Bainhira ita hanoin didiʼak kona-ba buat neʼebé Maromak halo ona mai ita, neʼe ajuda ita atu nafatin sente haksolok.—1 Tesalónika 5:16-18.

Maromak hatán ita-nia orasaun sira hodi fó ita dame. “Maromak nia dame” bele halo ita sente kalma nafatin tanba ita iha relasaun belun ho Maromak. (Roma 15:13; Filipe 4:9) Dame neʼe mak “aas liu ema nia hanoin hotu” tanba neʼe mai husi Maromak no bele ajuda ita liu fali buat neʼebé ita imajina.

Versíkulu neʼe hatete katak Maromak nia dame sei proteje ita-nia laran. Liafuan “proteje” tradús husi liafuan Gregu neʼebé iha ligasaun ho tropa neʼebé proteje sidade ida. Hanesan neʼe mós, Maromak nia dame proteje ema nia emosaun no dalan atu hanoin. Neʼe ajuda ema neʼe atu la sai estrese demais ho problema oioin.

Maromak nia dame proteje ita “liuhusi Kristu Jesus” tanba liuhusi Jesus mak ita bele hetan relasaun diʼak ho Maromak. Jesus fó ninia moris nuʼudar sakrifísiu atu kasu ita-nia sala. Se ita iha fiar ba Jesus, ita bele hetan bensaun oioin husi Maromak. (Ebreu 11:6) Jesus mós sai hanesan “dalan” ba Maromak kuandu ita halo orasaun. Jesus dehan: “Ema ida labele hakbesik ba Aman se la liu husi haʼu.”—João 14:6; 16:23.

Kontestu husi Filipe 4:6, 7

Livru Filipe husi Bíblia mak karta ida neʼebé apóstolu Paulo hakerek ba ema Kristaun sira iha sidade Filipe.a Iha kapítulu 4, Paulo anima maluk sira iha kongregasaun atu haksolok nafatin, no nia husu obrigadu ba laran-luak neʼebé sira hatudu, tanba neʼe halo nia haksolok. (Filipe 4:4, 10, 18) Nia esplika oinsá mak orasaun bele ajuda sira atu hetan Maromak nia dame, no nia mós fó sai kona-ba buat diʼak saida deʼit mak sira presiza hanoin no halo atu bele hetan ajuda husi “Maromak dame nian”.—Filipe 4:8, 9.