Salmo 46:10—“Para lai, no hatene katak Haʼu mak Maromak”

“Rende an bá no hatene bá katak haʼu mak Maromak. Haʼu sei hetan hahiʼi iha nasaun sira-nia leet; Haʼu sei simu hahiʼi iha rai.”—Salmo 46:10, Tradusaun Mundu Foun.

“Para lai, no hatene katak Hau mak Maromak, ema sira sei hasae Hau iha nasaun sira nia leet, no sira sei hasae Hau iha mundu!”—Salmo 46:10, Bíblia Kadi Kapasidade.

Signifikadu husi Salmo 46:10

Maromak anima ema hotu atu adora nia no rekoñese ninia direitu atu ukun mundu. Ema hotu neʼebé hakarak moris ba nafatin presiza rekoñese Maromak nia kbiit no autoridade.—Apokalipse 4:11.

“Rende an bá no hatene bá katak haʼu mak Maromak”. Bíblia balu tradús parte primeiru husi eskritura neʼe nuʼudar “para” ka “nonook”. Ema balu hanoin sala katak neʼe mak mandamentu atu nonook iha igreja hodi hatudu respeitu. Maski nuneʼe, fraze iha lian Ebraiku neʼebé tradús nuʼudar “Rende an bá no hatene bá katak haʼu mak Maromak” hatudu katak Maromak Jeováa anima nasaun hotu atu la halo tan buat neʼebé kontra ninia hakarak no rekoñese katak Jeová deʼit mak merese simu adorasaun.

Ita bele hetan ideia neʼebé atu hanesan iha Salmo 2. Maromak promete katak nia sei hasoru ema neʼebé kontra Jeová. Maibé ema neʼebé simu Maromak nia autoridade sei sadere ba ninia matadalan, forsa, no matenek. Sira “buka protesaun husi nia”, tan neʼe sira sente kontente no seguru, liuliu iha tempu susar.—Salmo 2:9-12.

“Haʼu sei hetan hahiʼi iha nasaun sira-nia leet; Haʼu sei simu hahiʼi iha rai.” Iha tempu uluk, Maromak Jeová simu hahiʼi bainhira nia uza ninia forsa boot atu proteje ninia povu. (Éxodo 15:1-3) Iha futuru, bainhira ema hotu iha rai adora Maromak no hakruʼuk ba ninia autoridade, Maromak sei simu hahiʼi iha dalan neʼebé boot liu.—Salmo 86:9, 10; Isaias 2:11.

Kontestu husi Salmo 46:10

Referénsia ida bolu Salmo 46 nuʼudar “knananuk ida atu hahiʼi Maromak nia kbiit, ida neʼebé uza kbiit boot atu defende ninia povu”. Bainhira kanta Salmo 46, Maromak nia povu hatudu sai sira-nia fiar ba Jeová nia kbiit atu proteje sira no ajuda sira. (Salmo 46:1, 2) Liafuan neʼe fó-hanoin ba sira katak Jeová sempre hamutuk ho sira.—Salmo 46:7, 11.

Atu hametin sira-nia fiar ba Maromak Jeová nia kbiit atu proteje sira, liafuan iha Salmo neʼe anima sira atu hanoin kona-ba buat furak oioin neʼebé Jeová halo ona. (Salmo 46:8) Salmo neʼe mós book ema atu hanoin kona-ba Maromak nia kbiit atu hapara funu. (Salmo 46:9) Iha Bíblia nia tempu, Jeová hapara funu hodi proteje ninia povu husi nasaun inimigu sira. Maibé Bíblia promete katak lakleur tan Maromak sei halo ida-neʼe iha dalan boot liu bainhira nia hapara funu hotu iha mundu tomak.—Isaias 2:4.

Jeová ajuda ninia povu toʼo ohin loron ka lae? Sin. Loloos, apóstolu Paulo anima ema Kristaun atu sadere ba Jeová hodi simu ajuda. (Ebreu 13:6) Buat neʼebé hakerek iha Salmo 46 hametin ita-nia fiar ba Maromak nia kbiit atu proteje ita. Salmo neʼe ajuda ita atu haree Maromak nuʼudar “ita-nia fatin protesaun no ita-nia kbiit”.—Salmo 46:1.

Haree vídeo badak neʼe hodi komprende kona-ba livru Salmo.