Provérbios 16:3—“Entrega ó-nia serbisu ba NAʼI”

“Entrega buat hotu neʼebé ó halo ba Jeová nia liman, no ó-nia planu sira sei laʼo ho diʼak.”—Provérbios 16:3, Tradusaun Mundu Foun.

“Entrega o nia servisu ba NAI, no o nia planu sei lao diak.”—Provérbios 16:3, Bíblia Kadi Kapasidade.

Signifikadu husi Provérbios 16:3

Eskritura neʼe ajuda ema neʼebé adora Maromak atu fiar katak sira-nia planu sei susesu se sira tau fiar tomak ba nia hodi buka no halo tuir ninia matadalan.

“Entrega buat hotu neʼebé ó halo ba Jeová nia liman.” Jeováa nia atan sira ho haraik an buka Ninia matadalan antes atu halo desizaun ruma. (Tiago 1:5) Tanbasá? Razaun ida mak tanba ema la iha kbiit atu kontrola akontesimentu oioin neʼebé afeta sira-nia moris. (Eclesiastes 9:11; Tiago 4:13-15) Liután neʼe, sira-nia matenek mós la toʼo atu kumpre sira-nia planu. Tan neʼe, ema barak entrega sira-nia planu ba Maromak. Sira halo nuneʼe hodi husu Maromak nia matadalan liuhusi orasaun no halo tuir Maromak nia hakarak neʼebé fó sai iha ninia Liafuan Bíblia.—Provérbios 3:5, 6; 2 Timóteo 3:16, 17.

Fraze “entrega ó-nia serbisu ba NAʼIb” iha lian orijinál signifika “duir ó-nia serbisu ba NAʼI”. Tuir referénsia ida, liafuan neʼe fó ideia kona-ba “mane ida neʼebé lori naha todan iha ninia kotuk entrega naha neʼe ba ema seluk neʼebé forsa liu”. Ema neʼebé haraik an no sadere ba Maromak bele fiar metin katak Maromak sei ajuda no apoia nia.—Salmo 37:5; 55:22.

Fraze “buat hotu neʼebé ó halo” la dehan katak Maromak sei simu no fó bensaun ba planu hotu neʼebé ema halo. Atu Jeová bele fó bensaun, ita-nia planu tenkesér tuir ninia hakarak. (Salmo 127:1; 1 João 5:14) Maromak sei la haraik bensaun ba ema neʼebé la halo tuir nia. Tuir loloos, “nia estraga ema aat nia planu”. (Salmo 146:9) Iha tempu hanesan, nia apoia ema neʼebé hamtaʼuk nia hodi halo tuir ninia matadalan sira neʼebé hakerek ona iha Bíblia.—Salmo 37:23.

“No ó-nia planu sira sei laʼo ho diʼak.” Tradusaun Bíblia balu tradús fraze neʼe nuʼudar “ó-nia planu sira sei harii metin”. Iha Eskritura Lian Ebraiku ka Testamentu Tuan, liafuan “harii metin” fó ideia kona-ba halo fundasaun, no dala barak liafuan neʼe refere ba Maromak nia serbisu atu kria buat oioin. (Provérbios 3:19; Jeremias 10:12) Maromak mós harii metin ema nia planu bainhira sira halo buat neʼebé loos tuir Ninia haree. Nia sei ajuda sira atu halaʼo moris neʼebé seguru, estavel, no kontente.—Salmo 20:4; Provérbios 12:3.

Kontestu husi Provérbios 16:3

Neʼe mak liafuan husi Liurai Salomão, neʼebé hakerek parte maioria husi livru Provérbios. Nia iha matenek atu fó sai lia-dadolin rihun ba rihun tanba nia simu matenek husi Maromak.—1 Reis 4:29, 32; 10:23, 24.

Salomão hahú kapítulu 16 hodi hahiʼi Maromak nia matenek no fó sai katak Maromak hakribi ema neʼebé foti an. (Provérbios 16:1-5) Tuirmai nia ajuda lee-naʼin sira komprende pontu importante ida neʼebé fó sai beibeik iha livru Provérbios: Ema bele iha matenek neʼebé loos no hetan susesu só deʼit se sira haraik an no halo tuir Maromak nia matadalan. (Provérbios 16:3, 6-8, 18-23) Bíblia temi beibeik lia-loos báziku neʼe.—Salmo 1:1-3; Isaias 26:3; Jeremias 17:7, 8; 1 João 3:22.

Haree vídeo badak neʼe hodi komprende kona-ba livru Provérbios.