Eskola Gilead lori benefísiu ba irmaun-irmán hotu

Tinan-tinan, irmaun-irmán sira iha mundu tomak neʼebé serbí Maromak tempu-tomak simu konvite atu tuir Eskola Gilead iha Sentru Edukasaun husi Watchtower iha Patterson, Novaiorke.a Iha eskola neʼe, irmaun-irmán sira aprende oinsá atu halaʼo sira-nia knaar iha Jeová nia organizasaun ho diʼak liután. No treinamentu neʼebé sira hetan bele ajuda sira atu hametin kongregasaun no sukursál sira iha mundu tomak.

Eskola Gilead mak eskola internasionál. Porezemplu, iha klase númeru 147 neʼebé halaʼo iha tinan 2019, irmaun-irmán naʼin-56 husi nasaun 29 mak tuir klase neʼe. Irmaun-irmán sira neʼebé tuir eskola neʼe serbí ona tempu-tomak nuʼudar ema Betel, katuas área, misionáriu, ka pioneiru espesiál.

Antes hahú klase foun ba Eskola Gilead, presiza halo preparasaun ba tempu kleur. Porezemplu, Departamentu Viajen iha sede-jerál mak presiza sosa billete aviaun nian ba irmaun-irmán sira neʼebé tuir Eskola Gilead. Osan atu sosa billete ba irmaun-irmán estranjeiru husi klase númeru 147 atu bele bá-mai Patterson mak maizumenus dolar 1.075 kada ema. Irmaun-irmán sira husi Illa Salomão neʼebé tuir Eskola Gilead presiza saʼe aviaun dala haat atu bele toʼo iha Patterson no tuirmai saʼe aviaun dala tolu atu fila fali ba Illa Salomão. Sira halo viajen dook maizumenus hamutuk kilómetru 35.400. No osan neʼebé uza atu sosa billete mak dolar 2.300 kada ema. Atu poupa osan, Departamentu Viajen iha sede-jerál uza programa komputadór ida atu buka billete aviaun neʼebé baratu liu. Bainhira sira hetan ona billete aviaun neʼebé ladún karun, sira sei booking temporáriu ida-neʼe, no programa neʼe kontinua buka billete neʼebé baratu liu durante semana ka fulan balu nia laran. Departamentu Viajen mós uza pontus husi billete aviaun neʼebé ema fó nuʼudar kontribuisaun atu bele sosa billete.

Eskola Gilead nia estudante barak presiza vistu atu bele tama ba Estadus Unidus. Tan neʼe, Departamentu Legál iha sede-jerál ajuda irmaun-irmán sira-neʼe atu hetan vistu estudante nian. Gastu atu trata vistu no osan atu halo rejistu mak maizumenus dolar 510 kada estudante.

Benefísiu saida mak ita bele hetan husi irmaun-irmán sira neʼebé hetan treinamentu iha Eskola Gilead? Katuas kongregasaun ida husi rai ida iha Ázia naran Hendra Gunawan tuir kongregasaun neʼebé hanesan ho feen-laʼen neʼebé tuir ona Eskola Gilead. Nia hatete: “Uluk la iha pioneiru regulár iha ami-nia kongregasaun. Maibé depois feen-laʼen neʼe toʼo iha neʼe, sira-nia laran-manas no hahalok diʼak hadaʼet ba haklaken-naʼin seluk, no haklaken-naʼin sira-neʼe deside atu komesa serbí nuʼudar pioneiru regulár. Liutiha tempu balu, irmán ida husi ami-nia kongregasaun mós tuir Eskola ba Haklaken-naʼin Tempu-Tomak.”

Irmaun Sergio Panjaitan neʼebé serbí iha Betel ida iha rai ida iha Ázia mak serbisu hamutuk ho irmaun ida no irmán naʼin-haat neʼebé gradua husi Gilead. Nia dehan: “Treinu neʼebé sira hetan laʼós deʼit bensaun ba sira, maibé mós bensaun ba ami hotu. Sira aprende buat barak. Maski nuneʼe, duké sente katak sira mak importante liu, sira fahe buat neʼebé sira aprende. Neʼe fó laran-manas ba ami, no ami mós bele fó laran-manas ba ema seluk.”

Oinsá organizasaun bele taka gastu ba eskola neʼe? Liuhusi osan kontribuisaun ba serbisu iha mundu tomak, neʼebé irmaun-irmán sira fó liuhusi dalan oioin neʼebé temi iha website donate.jw.org. Obrigadu ba imi-nia kontribuisaun neʼebé imi fó ho laran-luak, no neʼe ajuda ona irmaun-irmán husi mundu tomak neʼebé tuir eskola neʼe.