Print neʼebé fasil liu atu ajuda “ema oioin”

Maromak Jeová hakarak “ema oioin” atu “hetan koñesimentu neʼebé loos kona-ba lia-loos”. (1 Timóteo 2:3, 4) Maski nuneʼe, ita-nia irmaun-irmán no ema neʼebé ita haklaken bá koʼalia língua atus ba atus. Tinan-tinan, ami print publikasaun besik biliaun rua ba língua sira-neʼe. Oinsá mak ami bele uza osan kontribuisaun ho matenek, bainhira prodús ai-han espirituál ba língua barak?

Ekipamentu print neʼebé diʼak maski iha fatin uitoan

Maizumenus tinan 40 liubá, ami print revista iha rai 40. Depois neʼe ami organiza fali dalan neʼebé ami print no toʼo agora ami print iha rai sia deʼit. Maibé iha tempu hanesan, publikasaun neʼebé ami print ba língua sira-neʼe sai barak liu toʼo besik porsentu 500. Oinsá mak ami bele print publikasaun iha língua barak maibé fatin uitoan deʼit? Buat ida neʼebé importante mak ekipamentu neʼebé kualidade diʼak.

Mákina foun ajuda ami print publikasaun barak iha tempu badak nia laran. Uluk ami presiza gasta tempu barak atu halo mákina prontu atu print buat neʼebé foun. Agora, hodi iha mákina foun, mákina bele sai prontu lalais liu ba dala haat. Ami bele print publikasaun sira ho lalais maski ba língua neʼebé ema balu deʼit mak koʼalia. Publikasaun ida-idak presiza materiál neʼebé uza ba print foun. Iha tinan ida nia laran ami gasta osan besik dolar millaun rua ba materiál neʼebé uza ba print.a Tan neʼe se la presiza print barak, ami hili mákina neʼebé la uza materiál neʼe. Mákina sira-neʼe uza teknolojia leizer atu print publikasaun uitoan no la gasta osan barak.

Husi tinan tolu liubá toʼo agora, ami gasta dolar millaun sanulu liu atu sosa mákina foun atu print no jilid publikasaun ba mundu tomak. Haree toʼok oinsá ami uza ekipamentu neʼe atu prodús Bíblia. Uluk presiza halo hakat 40 liu atu prodús Bíblia depois print ona, inklui suku, tesi, halo kabeer no halo surat-tahan ninin nabilan. Ohin loron presiza hakat sanulu deʼit tanba mákina foun mak halo hakat sira seluk. Uluk ema presiza hiʼit Bíblia neʼebé print no muda ba fatin oioin atu halo hakat tuirmai, maibé agora mákina mak halo ida-neʼe. Ami hamenus ema sira neʼebé halo serbisu sira-neʼe ba porsentu 55 liu. Uluk sukursál Japaun prodús Bíblia 2.000 iha oras ualu nia laran, maibé agora sira bele prodús Bíblia 35.000 iha oras ualu nia laran!

Poupa osan hodi la rai publikasaun sira iha fatin barak

Rezultadu husi mudansa neʼe ajuda ami atu poupa osan kontribuisaun. Porezemplu, agora ami bele print publikasaun uitoan deʼit no troka lalais buat neʼebé atu print, neʼe hamenus publikasaun sira neʼebé presiza rai didiʼak iha sukursál sira. Irmaun Gary neʼebé serbí iha sukursál Estadus Unidus dehan: “Foufoun susar atu komprende oinsá mak print publikasaun uitoan deʼit mak ideia neʼebé diʼak.” Nia hatutan tan: “Iha tinan primeiru bainhira halo tuir mudansa neʼe, ami gasta osan 60.000 liu fali tinan kotuk atu sosa materiál ba print. Maski nuneʼe, ami poupa dolar millaun 1,5 tanba la presiza rai hela publikasaun neʼebé print ona no surat tahan!” Ami bele uza osan neʼe ba buat seluk neʼebé importante hanesan, harii Reuniaun-Fatin no fó ajuda bainhira dezastre.

Tanba neʼe, sukursál bele iha fatin mamuk atu uza ba buat seluk bainhira sira presiza. Tanba halo print iha fatin uitoan deʼit, dala barak bainhira halo konstrusaun ami la presiza fatin neʼebé boot. Porezemplu, iha tinan 2018 sukursál Europa Sentrál no sukursál seluk mak tau matan serbisu atu print publikasaun neʼebé sukursál Bretaña presiza. Neʼe poupa dolar millaun ba millaun bainhira harii sukursál foun iha Chelmsford, Inglaterra.

“Ita hanoin-hetan haʼu!”

Tanba print neʼebé fasil liu, ita ajuda ema barak atu hakbesik ba Jeová. Ami bele print iha língua barak maski presiza print kópia atus balu deʼit. Porezemplu, iha ema na’in-35.000 neʼebé koʼalia lian Wallisiano hela iha rai-Novakaledónia, no Illa Wallis no Futuna. Maibé fulan-Agostu 2024, ita fó sai Bíblia Tradusaun Mundu Foun neʼebé kompletu iha lian Wallisiano. Haklaken-naʼin naran Selafina neʼebé koʼalia lian Wallisiano dehan: “Uluk haʼu lee Bíblia iha lian Fransés, maibé haʼu ladún komprende. Bainhira ami simu Bíblia iha lian Wallisiano, haʼu-nia matan-been suli. Haʼu halo orasaun: ‘Oh Jeová, Ita hanoin-hetan haʼu! Ita la todan ba sorin.’”

Livru Moris Haksolok ba Nafatin kompletu, prodús ona iha lian Sanga maski ema neʼebé koʼalia língua neʼe iha Repúblika Demokrátika Kongu la toʼo ema naʼin-500.000. Irmaun Josué neʼebé iha kongregasaun lian Sanga dehan: “Presiza hakaʼas an atu esplika ka tradús liafuan ruma nia signifika atu estudante Bíblia bele komprende. Maski nuneʼe, dala barak susar ba sira atu komprende. Furak tebes atu hetan livru neʼe iha lian Sanga! Agora haʼu-nia estudante Bíblia bele uza livru neʼe atu komprende saida mak Bíblia hanorin no haʼu la presiza fó esplikasaun neʼebé naruk.”

Agora ami bele tradús no fahe publikasaun ba ema barak no língua barak liután. Ita-nia kontribuisaun, inklui sira neʼebé fó kontribuisaun online liuhusi jw.org, ajuda ami atu halo buat sira-neʼe. Obrigadu barak ba imi-nia laran-luak.