Ema Kristaun hotu mak Kristaun neʼebé loos ka lae?

EMA Kristaun hamutuk naʼin-hira iha mundu tomak? Tuir livru Atlas of Global Christianity, iha tinan 2010 maizumenus iha ema naʼin biliaun 2,3. Maibé, livru neʼe mós dehan katak ema sira-neʼe fahe ba grupu oioin hamutuk 41.000 liu, neʼebé sira ida-idak iha ninia doutrina no dalan rasik. Tanba iha relijiaun barak tebes mak temi sira-nia an nuʼudar “Kristaun”, neʼe halo ema barak konfuzaun no karik la kontente. Karik sira hanoin, ‘Ema neʼebé dehan sira-nia an Kristaun mak ema Kristaun duni ka lae?’

Mai ita haree toʼok ezemplu ida. Ema neʼebé ba rai seluk presiza fó-hatene ninia nasionalidade ba imigrasaun fronteira nian. Nia mós tenke prova ida-neʼe hodi hatudu dokumentu legál ruma, hanesan pasaporte. Nuneʼe mós, hodi dehan deʼit katak fiar ba Kristu la toʼo. Ema Kristaun neʼebé loos tenke iha sinál neʼebé identifika katak nia ema Kristaun duni. Sinál neʼe mak saida?

Liafuan “Kristaun” ema uza dala primeiravés lakleur depois tinan 44 Era Comum. Hakerek-naʼin Bíblia naran Lucas hatete katak: “Iha Antiokia mak dixípulu sira simu naran Kristaun ba dala primeiru tuir Maromak nia hakarak.” (Apóstolu 11:26) Sira neʼebé temi nuʼudar ema Kristaun mak Jesus nia dixípulu sira. Oinsá mak ema ida bele sai Jesus nia dixípulu? Livru The New International Dictionary of New Testament Theology esplika: “Laʼo tuir Jesus nuʼudar dixípulu katak sakrifika ita-nia moris tomak ba nia.” Tan neʼe, ema Kristaun neʼebé loos mak ema neʼebé halo tuir Jesus ho laran tomak, tanba Jesus mak ida neʼebé hun ba Kristaun loos nia hanorin sira.

Ohin loron iha duni ema Kristaun neʼebé loos ka lae? Saida mak Jesus hanorin kona-ba sinál husi ema Kristaun neʼebé loos? Ami konvida ita atu haree didiʼak ba ninia resposta husi Bíblia. Iha tópiku sira tuirmai, ita sei haree buat lima neʼebé Jesus fó sai kona-ba identidade husi ema Kristaun neʼebé loos. Ita sei haree oinsá mak ema Kristaun iha tempu uluk halo tuir buat neʼebé Jesus hanorin. No ohin loron, ema Kristaun ida-neʼebé mak halo tuir buat neʼebé Jesus hanorin.

“Sempre halo tuir haʼu-nia liafuan”

“Se imi sempre halo tuir haʼu-nia liafuan, imi mak haʼu-nia dixípulu duni, no imi sei hatene lia-loos, no lia-loos sei halo imi livre”.​—JOÃO 8:31, 32.

Neʼe katak sá: Jesus nia “liafuan” katak ninia hanorin sira, no ninia hanorin sira mai husi ida neʼebé aas liu hotu. Jesus dehan: “Aman neʼebé haruka haʼu mai mak fó ona mandamentu kona-ba saida mak haʼu sei dehan no koʼalia.” (João 12:49) Iha ninia orasaun ba ninia Aman Jeová iha lalehan, Jesus hatete: “Ita-nia liafuan mak lia-loos.” Jesus sempre temi Maromak nia Liafuan kuandu hanorin. (João 17:17; Mateus 4:4, 7, 10) Tan neʼe, ema Kristaun neʼebé loos ‘sempre halo tuir ninia liafuan’, neʼe katak sira fiar Maromak nia Liafuan Bíblia nuʼudar “lia-loos” no sira hatudu ida-neʼe liuhusi sira-nia hahalok.

Ema Kristaun tempu uluk hafolin Maromak nia liafuan: Apóstolu Paulo hafolin Maromak nia Liafuan hanesan buat neʼebé Jesus halo. Nia hakerek: “Eskritura hotu mai husi Maromak no neʼe diʼak.” (2 Timóteo 3:16) Mane sira neʼebé simu knaar atu hanorin maluk Kristaun seluk tenke “kaer metin ba Maromak nia liafuan neʼebé ema bele tau fiar”. (Tito 1:7, 9) Ema Kristaun tempu uluk simu avizu atu la simu “filozofia no hanorin bosok neʼebé la iha folin, neʼebé tuir deʼit ema nia lisan no tuir mundu nia hanoin, laʼós tuir Kristu”.​—Koloso 2:8.

Ohin loron sé mak hafolin Bíblia? Tuir Dogmatic Constitution on Divine Revelation, husi Vatikanu neʼebé halaʼo iha tinan 1965 no temi iha Catechism of the Catholic Church, dehan katak: “Igreja Katólika nia hanorin laʼós mai deʼit husi Bíblia. Tan neʼe, tenke simu no respeitu igreja nia tradisaun sagradu no mós Bíblia.” Informasaun ida husi livru Maclean’s temi pastór ida husi Toronto, Kanadá nia liafuan. Pastór neʼe dehan katak sira-nia hanorin la presiza bazeia ba Bíblia no buat neʼebé Jesus hanorin iha tinan 2000 liubá, tanba sira rasik iha ideia oioin neʼebé diʼak tebes.

Kona-ba Testemuña ba Jeová, livru New Catholic Encyclopedia hatete: “Sira haree Bíblia deʼit mak nuʼudar hun ba sira-nia hanorin no sira-nia hahalok.” Mane ida iha rai-Kanadá koʼalia ba Testemuña ba Jeová ida neʼebé fó koñese ninia an. Mane neʼe hatudu ba Testemuña neʼe nia Bíblia no dehan: “Haʼu hatene ona imi mak sé, tanba baibain imi sempre lori ida-neʼe.”

“Laʼós parte husi mundu neʼe”

“Mundu odi sira, tanba sira laʼós parte husi mundu neʼe, hanesan haʼu mós laʼós parte husi mundu neʼe.”​—JOÃO 17:14.

Neʼe katak sá: Jesus hatudu katak nia laʼós parte husi mundu neʼe hodi neutrál kona-ba konflitu sosiál no polítiku iha tempu neʼebá. Jesus esplika: “Se haʼu-nia Ukun mak parte husi mundu neʼe, haʼu-nia atan sira sei halo funu atu la husik ema Judeu sira kaer haʼu. Maibé tuir loloos, haʼu-nia Ukun laʼós husi mundu neʼe.” (João 18:36) Nia mós husu ema neʼebé laʼo tuir nia atu hasees an husi buat naran deʼit neʼebé la tuir Maromak nia Liafuan.​—Mateus 20:25-27.

Ema Kristaun iha tempu uluk laʼós parte husi mundu neʼe: Tuir hakerek-naʼin ida naran Jonathan Dymond dehan katak ema kristaun iha tempu uluk “lakohi halo funu, maski iha konsekuénsia naran deʼit hanesan mate, tama komarka ka ema hamoe sira”. Sira hili liu atu hetan terus duké la halo tuir sira-nia fiar. Sira mós la hanesan ho ema seluk tanba sira-nia morál. Pedro fó-hatene ba ema Kristaun sira: “Agora sira sai konfuzaun tanba imi la hola parte tan hamutuk ho sira hodi tuir sira-nia dalan moris nian neʼebé arbiru no aat, tan neʼe sira koʼalia aat kona-ba imi.” (1 Pedro 4:4) Istória-naʼin naran Will Durant hakerek katak ema jentiu sira neʼebé buka deʼit ksolok, naran-boot no buka kontente ba sira-nia an, la gosta ema Kristaun sira tanba sira halo tuir Bíblia.

Ohin loron sé mak laʼós parte husi mundu neʼe? Kona-ba ema Kristaun neʼebé neutrál, livru New Catholic Encyclopedia hatete: “Se ema neutrál no lakohi envolve an iha funu tan deʼit ninia konxiénsia, neʼe buat neʼebé la loos tuir morál.” Informasaun ida husi jornál Reformierte Presse hatete katak tuir relatóriu husi organizasaun direitus umanus iha Áfrika, hatudu katak igreja hotu partisipa iha funu iha tinan 1994 iha Ruanda, só deʼit Testemuña ba Jeová mak la partisipa.

Mestre eskola sekundária ida koʼalia kona-ba hahalok krime neʼebé Nazi sira halo, no nia dehan katak “la iha grupu, ka organizasaun neʼebé koʼalia kontra lia-bosok, no kondisaun aat neʼebé akontese iha tempu neʼebá”. Maibé kuandu nia koʼalia tiha ho ema husi United States Holocaust Memorial Museum, agora nia hatene ona katak Testemuña ba Jeová sira kaer metin ba sira-nia fiar maski ema Nazi trata sira iha dalan aat tebes.

Oinsá kona-ba sira-nia morál? Livru U.S. Catholic hatete: “Maioria husi joven Katólika sira ohin loron la konkorda ho igreja nia hanorin kona-ba moris hamutuk antes kaben. Livru neʼe mós temi kona-ba diákonu igreja ida nia liafuan neʼebé dehan: “Husi ema neʼebé mai rejistu atu halaʼo kazamentu, sira neʼebé hela hamutuk ona antes kaben mak porsentu 50 liu.” Livru The New Encyclopædia Britannica hatete katak Testemuña ba Jeová sira “kaer metin ba sira-nia morál neʼebé aas kona-ba relasaun seksuál no moris kaben nian.”

“Hadomi malu”

“Haʼu fó ba imi ukun-fuan foun ida, katak imi hadomi malu. Hanesan haʼu hadomi ona imi, imi mós tenke hadomi malu. Se imi hadomi malu, ema hotu sei hatene katak imi mak haʼu-nia dixípulu.”​—JOÃO 13:34, 35.

Neʼe katak sá: Jesus husu ninia dixípulu sira atu hatudu domin ba malu hanesan nia mós hadomi ona sira. Oinsá mak Jesus halo nuneʼe? Nia hadomi ema hotu maski ema seluk iha tempu neʼebá hatudu hahalok diskriminasaun makaʼas. (João 4:7-10) Tanba domin, Jesus sakrifika ninia tempu no enerjia atu bele ajuda ema seluk. (Marcos 6:30-34) Jesus hatudu hahalok domin iha dalan neʼebé boot liu hotu. Nia dehan: “Haʼu mak bibi-atan diʼak. Bibi-atan diʼak entrega ninia moris atu salva ninia bibi-malae sira.”​—João 10:11.

Oinsá mak ema Kristaun iha tempu uluk hatudu domin ba malu: Iha tempu uluk, ema Kristaun bolu malu nuʼudar maun ka alin. (1 Pedro 3:8) Ema husi nasaun oioin bele sai ema Kristaun tanba sira fiar katak “ema Judeu no ema Gregu hanesan deʼit. Iha Naʼi ida deʼit ba ema hotu”. (Roma 10:11, 12) Liutiha Pentekostes tinan 33 Era Comum, dixípulu sira iha Jeruzalein “faʼan sira-nia sasán no rikusoin, no fahe neʼe ba ema hotu hodi tuir ema ida-idak nia presiza”. Atu halo saida? Atu sira neʼebé foin hetan batizmu bele hela kleur iha Jeruzalein no kontinua “aprende husi apóstolu sira”. (Apóstolu 2:41-45) Saida mak motiva dixípulu sira-neʼe? Maizumenus tinan 200 liutiha kuandu apóstolu sira mate hotu ona, hakerek-naʼin ida naran Tertuliano temi buat neʼebé nia rona kona-ba ema Kristaun: “Sira hadomi malu tebetebes . . . no sira prontu sakrifika sira-nia moris atu ajuda malu.”

Ohin loron sé mak hatudu domin hanesan neʼe? Livru The History of the Decline and Fall of the Roman Empire (1837) dehan katak durante tinan atus ba atus, ema neʼebé temi sira-nia an nuʼudar Kristaun “hatudu hahalok violénsia ba malu, no neʼe aat liu fali saida mak ema neʼebé iha relijiaun seluk halo ba sira”. Tuir peskiza ida iha Estadus Unidus dehan katak, ema barak neʼebé bolu sira-nia an Kristaun hatudu diskriminasaun ba ema husi rasa seluk. Ema husi relijiaun ida mós la interese kona-ba saida mak akontese ho ema neʼebé relijiaun hanesan ho sira husi nasaun seluk, no neʼe halo sira la iha motivasaun atu ajuda malu.

Iha tinan 1997, ekipa ida husi Testemuña ba Jeová bá Repúblika Demokrátika Kongu hodi lori ai-moruk, ai-han, no roupa atu ajuda sira-nia maluk Testemuña ba Jeová no ema seluk iha neʼebá. Testemuña ba Jeová sira iha Europa fó kontribuisaun sasán ho folin osan dolar Amerikanu millaun ida atu bele ajuda sira-nia maluk Testemuña. Iha tinan 2004, depois anin-boot kona sidade Florida dala haat iha fulan rua nia laran, ulun-naʼin ba komisaun neʼebé ajuda iha tempu emerjénsia iha Florida haree ho didiʼak katak sira-nia sasán hotu uza iha dalan neʼebé loos. Nia dehan katak la iha organizasaun seluk neʼebé organiza an didiʼak hanesan Testemuña ba Jeová, no nia oferese se Testemuña ba Jeová sira presiza sasán ruma, sira prontu atu fó.

“Haʼu fó-hatene tiha ona Ita-nia naran”

“Haʼu fó-hatene tiha ona Ita-nia naran ba ema sira neʼebé Ita fó mai haʼu husi mundu neʼe. . . . Haʼu fó sai tiha ona Ita-nia naran ba sira no sei kontinua fó sai naran neʼe.”​—JOÃO 17:6, 26.

Neʼe katak sá: Jesus fó-hatene Maromak nia naran hodi uza naran neʼe iha ninia serbisu haklaken. Bainhira Jesus lee husi Eskritura sira, ita bele fiar katak nia sempre temi Maromak nia naran. (Lucas 4:16-21) Nia hanorin dixípulu sira halo orasaun nuneʼe: “Aman, halo Ita-nia naran sai santu.”​—Lucas 11:2.

Ema Kristaun tempu uluk uza Maromak nia naran: Apóstolu Pedro fó-hatene ba katuas sira iha Jeruzalein katak Maromak hili ona “povu ida . . . atu lori ninia naran”. (Apóstolu 15:14) Apóstolu no dixípulu sira seluk fó sai katak “ema hotu neʼebé bolu Jeová nia naran sei hetan salvasaun”. (Apóstolu 2:21; Roma 10:13) Sira mós uza naran neʼe bainhira sira hakerek Eskritura lian Gregu nian. Livru antigu Judeu nian ida neʼebé hakerek kona-ba lei sira dehan katak, ema sira neʼebé kontra ema Kristaun sunu ema Kristaun sira-nia livru, hanesan livru Mateus, Marcos, Lucas no João, maski livru sira-neʼe hakerek Maromak nia naran.

Ohin loron sé mak uza Maromak nia naran? Tradusaun Bíblia Revised Standard Version dehan katak: “Sala ba igreja Kristaun atu uza naran ruma hodi refere ba Maromak, tanba la presiza atu halo diferensa entre Maromak loos ho maromak sira seluk, no antes Jesus moris, relijiaun Judeu para ona atu uza Maromak nia naran.” Tan neʼe tradusaun Bíblia neʼe troka Maromak nia naran ho títulu, “NAʼI”. Vatikanu mós dehan ba ninia bispu sira katak: “Bainhira haree Maromak nia naran ho tetragrama YHWHa iha knananuk no orasaun sira, labele temi naran neʼe.”

Ohin loron sé mak uza no haklaken kona-ba Maromak nia naran? Bainhira Sergey sei joven no iha Kirgizistaun, nia haree filme neʼebé temi kona-ba Maromak nia naran Jeová. Durante maizumenus tinan sanulu, nia la rona tan naran neʼe. Ikusmai kuandu Sergey muda ba Amérika, nia hasoru Testemuña ba Jeová naʼin-rua neʼebé hatudu Maromak nia naran husi Bíblia. Sergey kontente tebes tanba hasoru relijiaun ida neʼebé uza naran Jeová. Buat neʼebé interese mak, disionáriu ida dehan katak Maromak Jeová mak Maromak neʼebé aas liu hotu no Maromak ida deʼit neʼebé Testemuña ba Jeová sira adora.

[Nota-rodapé]

“Ema sei haklaken liafuan diʼak kona-ba Maromak nia Ukun”

“Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.”​—MATEUS 24:14.

Neʼe katak sá: Lucas neʼebé hakerek evanjellu ida hatete katak Jesus “laʼo husi sidade ba sidade no husi knua ba knua hodi haklaken no fó sai liafuan diʼak kona-ba Maromak nia Ukun”. (Lucas 8:1) Jesus rasik hatete: “Haʼu tenke haklaken mós liafuan diʼak kona-ba Maromak nia Ukun iha sidade sira seluk, tanba neʼe mak Maromak haruka haʼu mai.” (Lucas 4:43) Nia haruka ninia dixípulu sira atu haklaken liafuan diʼak iha sidade no suku sira no nia dehan ba sira: “Imi sei sai haʼu-nia testemuña . . . toʼo rai sira neʼebé dook liu iha mundu.”​—Apóstolu 1:8; Lucas 10:1.

Ema Kristaun iha tempu uluk haklaken liafuan diʼak: Jesus nia dixípulu sira halo lalais buat neʼebé Jesus hatete ba sira: “Loroloron iha templu no husi uma ba uma, sira la para atu hanorin no haklaken liafuan diʼak kona-ba Kristu, katak Jesus.” (Apóstolu 5:42) Laʼós grupu kiʼik deʼit mak haklaken maibé ema hotu iha kongregasaun mós haklaken. Istória-naʼin ida hatete katak “hakerek-naʼin ida naran Celso, neʼebé ema primeiru atu hakerek kontra hasoru ema Kristaun, goza katak ema neʼebé serbisu atu tesi bibi-fulun, serbisu kona-ba sapatu, no mós serbisu kona-ba prepara animál nia kulit, no povu baibain neʼebé la eskola mak haklaken-naʼin kona-ba evanjellu neʼebé laran-manas”. Jean Bernardi hakerek iha ninia livru The Early Centuries of the Church hatete: “Ema Kristaun tenke bá no koʼalia ba ema naran deʼit no iha fatin naran deʼit, iha estrada, sidade, jardín, no iha uma sira. Sira haklaken iha mundu tomak . . . maski ema simu ka la simu.”

Ohin loron sé mak haklaken liafuan diʼak? Padre ida naran David Watson husi igreja Anglikanu hatete: “Ema ladún iha interese kona-ba Maromak tanba igreja la hanorin no haklaken kona-ba Maromak nia Liafuan.” José Luis Pérez Guadalupe hakerek iha ninia livru Why Are the Catholics Leaving? kona-ba atividade sira neʼebé igreja Evanjelista, Adventista, no igreja sira seluk halo no nia dehan katak “sira la haklaken husi uma ba uma”. Kona-ba Testemuña ba Jeová nia hakerek: “Sira haklaken beibeik husi uma ba uma.”

Jonathan Turley fó sai ninia hanoin iha relatóriu Cato Supreme Court Review, 2001-2002 hodi dehan: “Kuandu temi kona-ba Testemuña ba Jeová, ema barak sei hanoin kedas kona-ba sira mak haklaken-naʼin neʼebé mai vizita ita-nia uma iha tempu naran deʼit. Testemuña ba Jeová sira haklaken husi uma ba uma laʼós atu fó sai deʼit sira-nia fiar, maibé neʼe mak parte ida husi sira-nia fiar.”

[Kaixa]

Sé mak ema Kristaun neʼebé loos?

Bazeia ba buat neʼebé ita foin aprende, sé mak ema Kristaun neʼebé loos? Maski iha relijiaun barak tebes mak dehan sira mak ema Kristaun neʼebé loos, maibé hanoin-hetan saida mak Jesus dehan: “Laʼós ema hotu neʼebé dehan mai haʼu: ‘Naʼi, Naʼi’, sei tama ba Ukun lalehan nian, maibé ema neʼebé halo tuir haʼu-nia Aman iha lalehan nia hakarak.” (Mateus 7:21) Ema Kristaun neʼebé loos mak ema sira neʼebé halo tuir Maromak nia hakarak. Se Ita koñese ona no halibur hamutuk ho ema Kristaun neʼebé loos, Ita bele moris ba nafatin. Ami konvida Ita atu husu Testemuña ba Jeová neʼebé fó livru neʼe ba Ita, hodi bele hatene liután informasaun kona-ba bensaun sira husi Maromak nia Ukun.​—Lucas 4:43.