-
Pergunta 13: Bíblia dehan saida kona-ba serbisu?Bíblia Sagrada Tradusaun Mundu Foun
-
-
PERGUNTA 13
Bíblia dehan saida kona-ba serbisu?
“Ó haree ona ema neʼebé matenek kona-ba ninia serbisu ka lae? Nia sei la hamriik iha ema baibain nia oin, maibé nia sei hamriik iha liurai sira-nia oin.”
“Ema neʼebé naʼok keta naʼok tan, maibé nia tenke halo serbisu makaʼas. Nia tenke halo serbisu neʼebé diʼak ho ninia liman, atu nuneʼe nia iha buat ruma atu fahe ba ema neʼebé presiza.”
“Ema hotu tenke han-hemu no haksolok ho rezultadu hotu husi sira-nia serbisu makaʼas. Neʼe mak prezente husi Maromak.”
-
-
Pergunta 14: Oinsá mak ita bele uza didiʼak ita-nia osan no sasán?Bíblia Sagrada Tradusaun Mundu Foun
-
-
PERGUNTA 14
Oinsá mak ita bele uza didiʼak ita-nia osan no sasán?
“Ema neʼebé hadomi deʼit ksolok sei sai kiak; ema neʼebé hadomi tua-uvas no mina sei la sai riku.”
“Ema neʼebé empresta sei sai atan ba ida neʼebé fó-empresta.”
“Se ema ida hakarak harii uma-andár, nia sei tuur uluklai hodi sura ninia osan, loos ka lae? Nia halo nuneʼe hodi bele hatene se nia iha osan toʼo atu halo hotu uma neʼe. Se nia la halo nuneʼe karik, nia sei tau deʼit uma nia fundasaun maibé labele halo toʼo hotu, no ema neʼebé haree sei goza nia, hodi dehan: ‘Ema neʼe hahú atu harii maibé labele halo toʼo hotu.’”
“Kuandu ema sira-neʼe bosu ona, nia hatete ba ninia dixípulu sira: ‘Halibur tiha hahán neʼebé resin, atu nuneʼe labele soe estraga deʼit.’”
-
-
Pergunta 15: Oinsá mak ita bele moris kontente?Bíblia Sagrada Tradusaun Mundu Foun
-
-
PERGUNTA 15
Oinsá mak ita bele moris kontente?
“Diʼak liu han modo-tahan bikan ida hamutuk ho domin duké han naʼan neʼebé diʼak liu hamutuk ho odi.”
“Haʼu, Jeová, mak imi-nia Maromak, haʼu hanorin imi kona-ba buat neʼebé diʼak liu ba imi, no dirije imi iha dalan neʼebé imi tenke laʼo bá.”
“Ksolok ba sira neʼebé hatene katak sira presiza Maromak nia matadalan, tanba Ukun lalehan mak sira-nian.”
“Imi tenke hadomi imi-nia maluk hanesan imi-nia an rasik.”
“Buat neʼebé imi hakarak ema halo ba imi, halo mós nuneʼe ba sira.”
“Ksolok ba sira neʼebé rona Maromak nia liafuan no halo tuir!”
“Maski ema ida hetan rikusoin barak, ninia moris la mai husi buat neʼebé nia iha.”
“Tan neʼe, se ita iha ai-han no roupa, ita tenke kontente ho buat sira-neʼe.”
“Kontente liu atu fó duké simu.”
-
-
Pergunta 16: Oinsá mak ita bele tahan hasoru susar?Bíblia Sagrada Tradusaun Mundu Foun
-
-
PERGUNTA 16
Oinsá mak ita bele tahan hasoru susar?
“Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.”
“Ema badinas nia planu sei hetan duni susesu, maibé ema hotu neʼebé ansi sei sai kiak duni.”
“Keta taʼuk, tanba haʼu hamutuk ho ó. Keta laran-taridu, tanba haʼu mak ó-nia Maromak. Haʼu sei hametin ó, sin, haʼu sei ajuda ó, haʼu sei kaer metin ó ho haʼu-nia liman-loos justisa nian.”
“Imi ida-neʼebé mak hodi hanoin resin bele hanaruk ninia moris ba tempu uitoan tan?”
“Keta hanoin resin kona-ba loron aban, tanba loron aban iha ninia susar rasik. Loron ida-idak iha ninia problema rasik.”
“Buka-hatene loloos buat sira neʼebé importante liu.”
“Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.”
-
-
Pergunta 17: Oinsá mak Bíblia bele ajuda ita-nia família?Bíblia Sagrada Tradusaun Mundu Foun
-
-
PERGUNTA 17
Oinsá mak Bíblia bele ajuda ita-nia família?
LAʼEN/AMAN SIRA
“Laʼen sira tenke hadomi sira-nia feen hanesan sira-nia isin rasik. Ema neʼebé hadomi ninia feen hadomi ninia an rasik, tanba la iha mane ida neʼebé odi ninia isin rasik, maibé nia fó-han no hafolin ninia isin . . . Laʼen ida-idak tenke hadomi ninia feen hanesan ninia an rasik.”
“Aman sira, keta halo imi-nia oan sai laran-hirus, maibé kontinua haboot sira ho dixiplina no ho hanorin neʼebé tuir Jeová nia hakarak.”
FEEN SIRA
“Feen mós tenke hatudu respeitu kleʼan ba ninia laʼen.”
“Imi feen sira, hakruʼuk ba imi-nia laʼen, tanba neʼe mak buat neʼebé diʼak tuir Naʼi nia haree.”
OAN SIRA
“Oan sira, halo tuir imi-nia inan-aman bá hodi tuir Naʼi nia hakarak, tanba ida-neʼe mak hahalok loos. ‘Hatudu respeitu ba imi-nia inan-aman’, ida-neʼe mak ukun-fuan primeiru neʼebé fó sai hamutuk ho promesa ida neʼebé dehan: ‘Atu imi bele hetan buat diʼak no imi bele moris naruk iha rai.’”
“Imi oan sira, halo tuir imi-nia inan-aman iha buat hotu, tanba ida-neʼe halo Naʼi kontente tebes.”
-