BRINKEDU ró kiʼik ida iha Jordão nia liman haree hanesan folin-kiʼik deʼit, maibé Jordão hafolin tebes ida-neʼe. Nia dehan: “Bainhira haʼu sei labarik, katuas ida naran Russell fó ida-neʼe mai haʼu. Nia mak ami-nia família nia belun.” Depois Russell mate mak Jordão foin hatene katak Russell fó ajuda barak ba Jordão nia avó-mane no inan-aman iha tempu susar. Jordão hatete: “Tanba haʼu hatene ona buat neʼebé Russell halo ba ami-nia família, prezente kiʼik neʼe sai folin-boot liután mai haʼu.”

Neʼe hatudu katak, ba ema balu, karik prezente ida haree hanesan la iha folin, maibé prezente neʼe bele iha folin-boot ba ema neʼebé simu no hafolin tebes ida-neʼe. Kona-ba prezente ida neʼebé folin-boot tebes, Bíblia dehan: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar iha nia sei la lakon maibé hetan moris rohan-laek.”​—João 3:16.

Prezente neʼebé lori moris rohan-laek! Iha prezente seluk neʼebé diʼak liu ka lae? Maski ema balu la rekoñese katak prezente neʼe iha folin-boot, maibé ema kristaun neʼebé loos hafolin tebes ida-neʼe. (Salmo [Mazmur] 49:8; 1 Pedro 1:18, 19) Entaun, tanbasá mak Maromak fó ninia Oan-Mane mai ita nuʼudar prezente?

Apóstolu Paulo esplika ida-neʼe hodi dehan: “Liuhusi ema ida mak sala tama iha mundu, no mate tanba sala. Nuneʼe mate habelar ba ema hotu tanba ema hotu sala.” (Roma 5:12) Ema primeiru, Adão, halo sala ho neon hodi kontra hasoru Maromak, tan neʼe nia hetan kastigu-mate. Liuhusi Adão, mate habelar ba ninia oan no bei-oan hotu iha mundu tomak.

“Sala nia kolen mak mate, maibé prezente neʼebé Maromak fó mak moris rohan-laek liuhusi Kristu Jesus ita Naʼi.” (Roma 6:23) Atu salva ema husi sala no mate, Maromak haruka ninia Oan-Mane Jesus Kristu mai toʼo mundu no fó ninia moris perfeitu nuʼudar sakrifísiu. Neʼe loke dalan ba sira neʼebé tau fiar ba Jesus nia sakrifísiu atu hetan moris rohan-laek.​—Roma 3:24.

Bainhira koʼalia kona-ba bensaun hotu neʼebé ema sei hetan liuhusi Jesus Kristu, apóstolu Paulo hakerek: “Obrigadu ba Maromak tanba ninia prezente boot liu neʼebé nia fó ona ba ita.” (2 Korinto 9:15) Sin, Jesus nia sakrifísiu mak Maromak nia prezente ida neʼebé furak tebes. Maibé tanbasá mak prezente neʼe folin-boot tebes? Oinsá mak prezente neʼe la hanesan ho Maromak nia prezente seluk?a No prezente neʼe book ita atu halo saida? Favór ida, lee informasaun tuirmai neʼe atu bele hetan resposta husi Bíblia.

SÉ MAK FÓ IDA-NEʼE?

Prezente balu iha folin-boot tanba mai husi ema-boot ruma ka ema neʼebé Ita respeitu. Karik Ita mós hafolin prezente ruma husi Ita-nia família ka belun neʼebé Ita hadomi, hanesan ho Jordão neʼebé hafolin prezente kiʼik husi Russell. Oinsá ho Jesus nia sakrifísiu?

Primeiru, Bíblia hatete katak Maromak mak “haruka ninia Oan-Mane mesak ba mundu atu ita bele hetan moris liuhusi nia”. (1 João 4:9) Maromak mak boot liu hotu, tan neʼe mak ninia prezente sai espesiál duni. Kona-ba Maromak, ema ida neʼebé hakerek salmu dehan: “Ita, neʼebé naran Jeová, Ita deʼit mak Maromak Aas Liu Hotu iha mundu tomak.”—Salmo (Mazmur) 83:18.

Segundu, Maromak mak ita-nia “Aman”. (Isaías [Yesaya] 63:16) Oinsá? Nia mak fó moris mai ita. Nia mós tau matan didiʼak ba ita hanesan aman ida neʼebé tau matan didiʼak ninia oan sira. Iha tempu antigu, Maromak bolu ninia povu nuʼudar Efraim, no hatete: “Efraim mak haʼu-nia oan-mane neʼebé folin-boot, haʼu-nia oan doben . . . Haʼu hanoin nia. No haʼu sei hatudu duni laran-sadiʼa ba nia.” (Jeremias [Yeremia] 31:20) Maromak mós sente hanesan neʼe ba ninia atan sira ohin loron. Nia mak ita-nia Aman no Belun, laʼós deʼit ita-nia Kriadór. Bainhira Ita hanoin kona-ba neʼe, ninia prezente sai folin-boot tebes ba Ita, loos ka lae?

TANBASÁ MAK NIA FÓ IDA-NEʼE?

Ita hafolin prezente husi ema neʼebé fó ho laran, laʼós tanba obriga an. Ema hanesan neʼe la hein atu Ita selu fali nia.

Maromak fó ninia Oan-Mane ba ita tanba nia hadomi ita. Bíblia hatete: “Iha dalan neʼe mak Maromak hatudu nia domin mai ita, basá nia haruka ninia Oan-Mane mesak ba mundu.” Nia halo ida-neʼe “atu ita bele hetan moris liuhusi nia”. (1 João 4:9) Maromak tenke halo nuneʼe ka lae? Lae! Jesus nia sakrifísiu mak prezente ida neʼebé Maromak fó ho “laran-diʼak neʼebé boot”.—Roma 3:24.

Tansá mak ita bele hatete hanesan neʼe? Bíblia esplika: “Maromak hatudu nia domin ba ita nuneʼe: Kristu mate ba ita kuandu ita sei sala-naʼin hela.” (Roma 5:8) Domin mak book Maromak atu salva ema sala-naʼin neʼebé la iha esperansa. Ita la merese atu hetan domin hanesan neʼe, no ita mós la bele selu fali ba Maromak. Prezente neʼe hatudu sai Maromak nia domin neʼebé boot liu hotu.

SAKRIFÍSIU SAIDA MAK NIA PRESIZA HALO?

Se ema ida halo sakrifísiu boot atu fó prezente ida ba Ita, ka nia prontu atu fó ba Ita buat neʼebé nia hafolin tebes, neʼe book Ita atu hafolin liután prezente neʼe.

Maromak “fó ninia Oan-Mane mesak”. (João 3:16) Ba Maromak, la iha buat seluk neʼebé mak folin-boot liu. Durante tinan rihun ba rihun, Jesus serbisu hamutuk ho Maromak hodi kria lalehan no rai, no nia mak ‘ida neʼebé Maromak gosta tebes’. (Provérbios [Amsal] 8:30) Jesus mak Maromak nia “oan doben” no “ilas husi Maromak neʼebé matan la haree”. (Koloso 1:13-15) Maromak ho Jesus iha relasaun neʼebé besik tebetebes.

Maski nuneʼe, Maromak “husik nia Oan-Mane atu hetan terus”. (Roma 8:32) Sin, Maromak Jeová fó mai ita buat neʼebé folin-boot liu ba nia.

NEʼE MAK BUAT NEʼEBÉ ITA PRESIZA DUNI

Prezente ida bele iha folin-boot se prezente neʼe mak buat neʼebé Ita presiza duni. Imajina toʼok, Ita hetan moras todan no la iha osan atu selu tratamentu neʼebé Ita presiza. Maibé iha ema ida neʼebé prontu atu selu Ita-nia tratamentu no ikusmai neʼe salva Ita-nia moris. Ita sente agradese tebes ba ema neʼe, loos ka lae?

“Iha Adão ema hotu mate, nuneʼe mós iha Kristu ema hotu sei hetan moris.” (1 Korinto 15:22) Nuʼudar Adão nia bei-oan, ita hotu sei “mate”, no ita la bele halai-sees husi ida-neʼe. Ita la iha kbiit atu hadame malu ho Maromak no sai livre husi sala. Liután neʼe, ita mós la iha kbiit atu salva ita-nia an no ema seluk. Bíblia hatete: “Sira ida mós la bele sosa fali maun-alin ida ka selu folin ba Maromak atu sosa fali ninia maun-alin . . . sira la iha kbiit atu selu ida-neʼe.” (Salmo [Mazmur] 49:7, 8) Tan neʼe, ita presiza duni atu hetan ajuda, se lae, ita la iha esperansa.

Ho domin boot, Jeová prontu atu selu “tratamentu” neʼebé ita presiza, hodi nuneʼe ita hotu “sei hetan moris” liuhusi Jesus. Oinsá? Bíblia dehan: “Jesus nia raan hamoos ita-nia sala hotu.” Sin, ita bele hetan perdua ba ita-nia sala no moris ba nafatin hodi tau fiar ba Jesus nia raan neʼebé fakar ona. (1 João 1:7; 5:13) Oinsá ho ema neʼebé mate ona? “Tanba mate mosu liuhusi ema ida, nuneʼe mós moris-hiʼas husi mate mosu liuhusi ema ida [Jesus].”—1 Korinto 15:21.a

Jesus nia sakrifísiu mak prezente husi Maromak neʼebé aas liu hotu, no Nia fó ida-neʼe tanba domin neʼebé boot. Maromak Jeová mós halo sakrifísiu neʼebé boot liu hotu atu fó prezente neʼe, no ida-neʼe mak buat neʼebé ita presiza duni atu sai livre husi sala no mate. Sin, la iha prezente seluk neʼebé folin-boot liu.

SE ITA hetan prezente neʼebé espesiál tebes, neʼe book ita atu hatudu agradese. Loron ida, bainhira Jesus kura mane naʼin-sanulu neʼebé iha moras todan, mane ida deʼit mak “fila fali hodi fó hahiʼi ba Maromak ho lian makaʼas”. Jesus dehan: “Ema naʼin-sanulu mak hetan isin-diʼak, loos ka lae? Entaun, sira naʼin-sia seluk iha neʼebé?” (Lucas 17:12-17) Saida mak ita bele aprende? Importante tebes atu hatudu agradese, maibé fasil ba ita atu haluha hahalok diʼak neʼebé ema seluk halo ona ba ita.

Jesus nia sakrifísiu mak prezente neʼebé boot liu hotu husi Maromak. Entaun, iha dalan saida deʼit mak ita bele hatudu agradese ba prezente neʼe?

• Hatene didiʼak Maromak. Maski Maromak fó ninia Oan ba ema hotu, maibé neʼe la dehan katak ema hotu sei hetan duni moris rohan-laek. Iha Jesus nia orasaun ba Maromak, nia hatete: “Neʼe mak moris rohan-laek: Katak sira hatene didiʼak Ita, Maromak loos mesak deʼit, no ida neʼebé Ita haruka mai, Jesus Kristu.” (João 17:3) Se Ita rona katak mane ida salva Ita-nia moris bainhira Ita sei kiʼik, Ita hakarak hatene liután kona-ba mane neʼe no tanbasá mak nia salva Ita, loos ka lae? Maromak Jeová, neʼebé fó prezente boot atu salva Ita-nia moris, hakarak Ita atu hatene didiʼak nia no mós sai ninia belun. Bíblia hatete: “Hakbesik ba Maromak, no nia sei hakbesik ba imi.”—Tiago 4:8.

• 

  Hatudu fiar ba Jesus nia sakrifísiu. “Ema neʼebé hatudu fiar ba Oan-Mane hetan moris rohan-laek.” (João 3:36) Ita presiza “hatudu fiar” liuhusi hahalok. (Tiago 2:17) Tan neʼe, Ita presiza aprende kona-ba Maromak nia hakarak ba Ita, no moris tuir Ninia hakarak.a Halo orasaun ba Maromak hodi husu perdua atu bele sente laran moos iha Ninia oin. Hakbesik ba Maromak hodi la duvida katak ema hotu neʼebé hatudu fiar ba Jesus nia sakrifísiu sei hetan moris diʼak ho dame ba nafatin!—Ebreu 11:1.

• 

  Tuir reuniaun atu komemora Jesus nia mate. Jesus haruka ninia dixípulu sira atu komemora ninia mate tinan ida dala ida hodi hanoin-hetan ninia sakrifísiu. Bainhira nia hahú serimónia neʼe, nia hatete: “Kontinua halo ida-neʼe hodi hanoin haʼu.” (Lucas 22:19) Iha tinan 2017, Testemuña ba Jeová sei komemora Jesus nia mate iha loron-tersa, 11 Abríl, depois loro-matan monu. Reuniaun neʼe halaʼo maizumenus ba oras ida, no ita sei rona diskursu neʼebé esplika kona-ba Jesus nia mate no oinsá mak ida-neʼe lori bensaun ba ita ohin loron no iha futuru. Tinan kotuk, maizumenus ema naʼin-20.000.000 mak asiste komemorasaun neʼe iha mundu tomak. Ho laran-haksolok, ami konvida Ita atu halibur hamutuk ho ami hodi hatudu agradese ba Maromak nia prezente neʼebé boot liu hotu.