Informasaun atu uza hamutuk livru Moris Kristaun no Haklaken
3-9 JUÑU
RIKUSOIN HUSI BÍBLIA | GALÁSIA 4-6
“‘Istória neʼebé sai hanesan símbolu’ mós kona ita”
(Galásia 4:24, 25) Buat sira-neʼe mak istória neʼebé sai hanesan símbolu, tanba feto rua neʼe reprezenta aliansa rua, aliansa ida husi Foho Sinai, neʼe hanesan Agar neʼebé fó moris ba oan nuʼudar atan. 25 Agar reprezenta Sinai, foho ida iha Arábia, no nia hanesan ho Jeruzalein agora nian, tanba nia sai atan hamutuk ho ninia oan sira.
it-1-E p. 1018 par. 2
Agar
Apóstolu Paulo esplika katak Agar reprezenta nasaun Izraél neʼebé iha relasaun ho Jeová liuhusi aliansa Ukun-Fuan neʼebé fó sai iha Foho Sinai. Aliansa neʼe hamosu “oan nuʼudar atan”. Tanba ema Izraél sala-naʼin, nasaun neʼe labele kumpre kritériu ba aliansa neʼe. Iha aliansa neʼe nia okos, ema Izraél la sai nasaun neʼebé livre maibé merese mate tanba sira-nia situasaun nuʼudar sala-naʼin. Tan neʼe, sira hanesan atan. (Jo 8:34; Rom 8:1-3) Jeruzalein neʼebé iha apóstolu Paulo nia tempu hanesan ho Agar tanba sidade Jeruzalein neʼebé reprezenta nasaun Izraél sai nuʼudar atan hamutuk ho ninia oan sira. Maibé ema Kristaun sira neʼebé Maromak hili ho espíritu santu mak “Jeruzalein lalehan” nia oan sira, “Jeruzalein lalehan nian” mak Maromak nia feen simbóliku. Jeruzalein ida-neʼe hanesan ho Sara, feto neʼebé livre, tanba Jeruzalein ida-neʼe nunka sai atan. Maibé hanesan Isaac hetan susar husi Ismael, hanesan neʼe mós ho “Jeruzalein lalehan” nia oan sira, neʼebé sai livre ona liuhusi Oan-Mane, sira mós hetan terus husi Jeruzalein atan nia oan sira. Maski nuneʼe, Agar no ninia oan duni sai tiha, neʼe reprezenta Jeová la simu ona Izraél nuʼudar nasaun ida.—Gal 4:21-31; haree mós Jo 8:31-40.
(Galásia 4:26, 27) Maibé Jeruzalein lalehan nian mak livre, no nia mak ita-nia inan. 27 Tanba hakerek nanis ona: “Oh feto neʼebé labele iha oan, haksolok bá; oh feto neʼebé la sente moras tuur-ahi nian, haklalak bá ho haksolok; tanba feto neʼebé ninia laʼen soe hela, nia iha oan barak liu fali feto neʼebé iha laʼen.”
Hatudu fiar neʼebé metin ba Maromak nia Ukun
11 Promesa ba aliansa Abraão nian sai loos bainhira Abraão nia bei-oan sira tama ona iha rai promete nian. Maibé, Bíblia hatete katak aliansa neʼe sei sai loos iha dalan seluk tan. (Gal 4:22-25) Apóstolu Paulo esplika katak parte prinsipál husi Abraão nia bei-oan mak Jesus Kristu, parte segundu mak ema kose-mina naʼin-144.000. (Gal 3:16, 29; Apk 5:9, 10; 14:1, 4) Feto mak Maromak nia organizasaun parte lalehan nian, kriatura espíritu sira neʼebé laran-metin deʼit mak iha laran. Feto neʼe bolu mós nuʼudar “Jeruzalein lalehan nian”. (Gal 4:26, 31) Iha aliansa Abraão nian promete katak feto nia bei-oan neʼe sei lori bensaun ba ema toʼo tempu neʼebé la bele sura.
(Galásia 4:28-31) Agora maun-alin sira, imi mak oan liuhusi promesa hanesan mós ho Isaac. 29 Maibé hanesan iha tempu neʼebá, oan neʼebé moris mai tuir isin hahú fó-terus ba oan neʼebé moris mai liuhusi Maromak nia espíritu, nuneʼe mós ho ohin loron. 30 Maski nuneʼe, Eskritura dehan saida? “Duni sai atan-feto neʼe no ninia oan-mane, tanba atan-feto neʼe nia oan sei la simu liman-rohan hamutuk ho feto neʼebé livre nia oan-mane.” 31 Tan neʼe, maun-alin sira, ita laʼós atan-feto neʼe nia oan, maibé feto neʼebé livre nia oan.
Keʼe no hetan buat murak husi Bíblia
(Galásia 4:6) Tanba imi mak Maromak nia oan sira, Maromak haruka ona ninia espíritu ba ita-nia laran, espíritu neʼe mak iha ninia Oan-Mane. Espíritu neʼe book ita atu hatete: “Abba, Aman!”
w09-E 4/1 p. 13
Hakarak hatene?
Tanbasá iha Jesus nia orasaun nia bolu Jeová nuʼudar “Abba, Aman”?
Liafuan Aramaiku ‘abba’ bele signifika “aman” ka “Oh, aman”. Liafuan neʼe mosu dala tolu iha Bíblia, no sempre parte ba orasaun no refere ba Aman lalehan nian, Jeová. Liafuan neʼe iha signifika saida?
Livru ida (The International Standard Bible Encyclopedia) hatete: “Iha Jesus nia tempu, labarik sira bolu sira-nia aman ‘abba’. Liafuan neʼe atu refere ba relasaun neʼebé besik no respeitu entre oan no aman.” Neʼe mak liafuan neʼebé nakonu ho domin no liafuan primeiru neʼebé baibain oan aprende. Jesus uza liafuan neʼe bainhira nia harohan makaʼas ba ninia Aman. Iha jardín Getsémani, iha oras balu nia laran antes nia mate, Jesus halo orasaun ba Jeová hodi dehan, “Abba, Aman”.—Mc 14:36.
Livru neʼe mós hatete katak iha ema Judeu sira-nia livru husi tempu Gregu no Roma nian, ema baibain sei nunka bolu Maromak hodi uza liafuan ‘Abba’, tanba ema hanoin neʼe la hatudu respeitu.” Maski nuneʼe, tanba “Jesus . . . uza liafuan neʼe bainhira nia halo orasaun, neʼe apoia buat neʼebé Jesus hatete, katak nia iha relasaun besik tebes ho Maromak”. Liafuan “Abba” mós mosu iha eskritura rua husi apóstolu Paulo nia karta, neʼe hatudu duni katak ema Kristaun iha tempu uluk mós uza liafuan neʼe iha sira-nia orasaun.—Rom 8:15; Gal 4:6.
(Galásia 6:17) Husi ohin ba oin, ema ida keta halo susar tan mai haʼu, tanba haʼu iha marka iha haʼu-nia isin nuʼudar Jesus nia atan ida.
w10-E 11/1 p. 15
Hakarak hatene?
Karik apóstolu Paulo koʼalia kona-ba saida bainhira nia dehan: “Haʼu iha marka iha isin nuʼudar Jesus nia atan ida”?—Gal 6:17.
Ba ema kristaun sira neʼebé hela iha apóstolu sira-nia tempu, Paulo nia liafuan karik bele iha signifika oioin. Porezemplu, besi manas uza iha tempu uluk atu tau marka ba dadur sira husi funu, ema neʼebé naʼok iha templu sira, no atan neʼebé halai husi ninia naʼi. Bainhira tau marka hanesan neʼe ba ema, neʼe iha signifikadu negativu.
Maski nuneʼe, marka sira laʼós deʼit kona-ba buat neʼebé la diʼak. Ema iha tempu uluk uza marka atu hatudu sira mak membru ba suku ka relijiaun ruma. Porezemplu tuir livru ida, “ema Síria hatudu sira-nia laran-metin ba maromak Hadad no Atárgatis hodi tau marka ho besi manas iha sira-nia liman-fukun no kakorok . . . Ema neʼebé tuir Dionísio tau marka modelu hanesan ai-tahan”.—Theological Dictionary of the New Testament.
Ema balu ohin loron hanoin katak Paulo refere ba kanek sira neʼebé nia iha tanba hetan terus durante halaʼo ninia serbisu haklaken. (2Ko 11:23-27) Karik Paulo koʼalia kona-ba dalan neʼebé nia halaʼo ninia moris, laʼós kona-ba sinál neʼebé hatudu nia mak hanesan ema Kristaun.
TREINU KONA-BA HAKLAKEN
Pergunta husi lee-naʼin
Se ema kristaun ida nia toman atu haree pornografia sai aat liután, ida-neʼe bele sai razaun atu kongregasaun hasai nia ka lae?
Sin, bele. Tan neʼe mak importante tebes atu hadook an husi pornografia hotu. Ida-neʼe inklui livru sira, filme, vídeo, no fatin iha internét neʼebé hatudu pornografia.
Ohin loron, pornografia iha fatin hotu iha mundu tomak. Ema neʼebé haree pornografia aumenta ba beibeik tanba internét halo fasil ba sira atu haree. Ema balu, maski joven ka ferik-katuas ona, haree tiha ona pornografia neʼebé mosu derrepente deʼit iha sira-nia oin iha komputadór. Maibé, ema seluk neʼebé uza internét, sira rasik bá buka fatin neʼebé hatudu pornografia. Karik sira sente katak sira bele halo ida-neʼe tanba sira mesak iha uma ka iha serbisu-fatin no la iha ema ida neʼebé haree sira. Tanbasá mak pornografia perigu tebes ba ema kristaun?
Razaun importante ida mak Jesus nia avizu: “Ema neʼebé hateke ba feto ida hodi kaan nia, nia halo ona sala-foʼer ho nia iha nia laran.” (Mt 5:28) Tuir loloos, relasaun seksuál entre feen ho laʼen mak buat ida neʼebé bele halo sira haksolok hamutuk. (Prv 5:15-19; 1Ko 7:2-5) Maibé, pornografia hatudu hahalok seksuál neʼebé imorál no book ema atu iha hanoin kona-ba sala-foʼer, no kona-ba ida-neʼe mak Jesus fó avizu mai ita. Nuneʼe, ema neʼebé lee livru ka haree filme kona-ba pornografia, ida-neʼe kontra Maromak nia ukun-fuan, neʼebé dehan: “Neʼe duni, imi sei oho hakarak rai neʼe nian neʼebé book imi-nia laran, hanesan sala-foʼer, hanoin foʼer, hakarak foʼer, laran-aat, laran karak-teen, neʼebé hanesan adora lulik.”—Kol 3:5.
Maibé, oinsá se ema kristaun ida haree pornografia dala ida ka dala rua deʼit? Se nia halo ida-neʼe, nia tau nia an iha situasaun neʼebé perigozu, hanesan Asaf neʼebé hakerek salmu ida mós hasoru, nia dehan: “Maibé kona-ba haʼu, haʼu-nia ain besik atu hadook an, haʼu-nia hakat besik kois atu monu.” Se ema kristaun ida haree livru, filme, ka internét neʼebé hatudu mane ka feto molik ka mane ho feto neʼebé halo relasaun seksuál, ema kristaun neʼe la bele iha laran ka konxiénsia neʼebé moos no la bele sente dame ho Maromak, no bele sente hanesan Asaf, neʼebé hatete: “Haʼu sente laran-taridu loron tomak, no dadeer-dadeer haʼu simu konsellu.”—Sal 73:2, 14.
Ema kristaun neʼebé haree pornografia presiza rekoñese katak hahalok ida-neʼe kona ninia relasaun rasik ho Jeová no ema neʼe tenke hetan ajuda husi katuas sira iha kongregasaun. Bíblia hatete: “Imi toman ema ruma halo sala karik, imi sira neʼebé iha espíritu loos sei lori nia ho laran-kmaus ba dalan loos.” (Gal 6:1) Irmaun katuas ida ka rua bele fó ajuda ba nia tuir ninia presiza. Sira bele halo orasaun ba nia hodi fiar katak Jeová sei halo nia sai diʼak fali no ninia sala “sei hetan perdua”. (Tgo 5:13-15) Ema hotu neʼebé hetan ajuda husi katuas sira no para haree pornografia, sira-nia relasaun ho Jeová sai metin liután, hanesan Asaf.—Sal 73:28.
Maibé, apóstolu Paulo hatete katak ema balu neʼebé halo sala, sira “la arrepende an husi hahalok neʼebé lamoos, no sala-foʼer, no hahalok arbiru deʼit”.a (2Ko 12:21, MF) Profesór ida, naran Marvin R. Vincent, hatete katak liafuan lia-gregu neʼebé tradús nuʼudar “hahalok neʼebé lamoos” iha arti buat neʼebé foʼer tebetebes neʼebé ita hakribi. Triste katak pornografia balu laʼós deʼit hatudu mane ho feto molik neʼebé halo sala-foʼer, maibé hatudu hahalok seksuál entre mane ho mane, feto ho feto, ema ho animál, ema boot ho labarik, ema barak neʼebé halo buat seksuál hamutuk, ema neʼebé estraga feto, halo buat seksuál hodi uza violénsia ka kesi metin ema atu halo buat seksuál. Apóstolu Paulo hatete katak ema balu iha ninia tempu, sira “iha nakukun laran” no “sira saran tiha an ba moris neʼebé la hatene moe, no ba hahalok foʼer oioin ho laran karak-teen nian.”—Éf 4:18, 19.
Iha Galasia 5:19, Paulo mós temi kona-ba “hanoin aat [“hahalok neʼebé lamoos”, MF]”. Matenek-naʼin ida husi rai-Bretaña hatete katak liafuan “hanoin aat” ka “hahalok neʼebé lamoos” mak kona-ba hakarak seksuál neʼebé la naturál. Ita hotu nuʼudar ema kristaun hatene katak pornografia neʼebé hatudu hahalok sala-foʼer oioin neʼebé foin temi mak foʼer tebetebes no bele halo ema iha hakarak seksuál neʼebé la naturál. Tan neʼe, iha Galasia 5:21, Paulo hatete katak ema neʼebé halo hahalok lamoos hanesan neʼe “sei la simu Maromak nia reinu nuʼudar liman-rohan”. Tan neʼe, ema neʼebé iha toman atu haree pornografia neʼebé foʼer tebes ba tempu kleur no la arrepende an hodi hapara toman aat neʼe, kongregasaun tenke hasai ema neʼe atu proteje kongregasaun no atu kongregasaun sai moos nafatin.—1 Kor 5:5, 11.
Maibé, diʼak atu hatene katak ema balu neʼebé uluk monu ba toman aat atu haree pornografia neʼebé foʼer tebes hetan ajuda husi irmaun katuas sira no halo mudansa iha sira-nia moris. Jesus hatete ba ema kristaun iha Sardes: “Hamoris fali buat uitoan neʼebé sei hela, neʼebé atu mate ona. . . . Hanoin ba buat neʼebé ó simu tiha no rona. Kaer metin nia bá, hodi hakribi ó-nia sala. Ó la hadeer karik, haʼu sei mai hanesan naʼok-teen ida, hodi la fó-hatene iha sá oras ó sei hein haʼu.” (Apk 3:2, 3) Ida-neʼe hatudu katak ema bele arrepende an no halai-sees husi perigu neʼebé pornografia lori mai.—Jud 22, 23.
Maski nuneʼe, diʼak liu mak atu ita ida-idak halo desizaun neʼebé metin atu labele besik pornografia. Sin, mai ita hadook an husi pornografia naran deʼit!
10-16 JUÑU
RIKUSOIN HUSI BÍBLIA | ÉFESO 1-3
“Jeová nia arranju atu lori unidade”
(Éfeso 1:8, 9) Maromak fó ba ita ninia laran-diʼak neʼebé boot hamutuk ho matenek no kbiit atu komprende 9 bainhira nia fó sai ba ita segredu santu kona-ba ninia hakarak. Segredu santu neʼe tuir buat neʼebé halo nia kontente no nia rasik deside ona atu
it-2-E p. 837 par. 4
Segredu santu
Mesias nia Ukun. Iha apóstolu Paulo nia karta sira, nia esplika segredu santu kona-ba Kristu. Iha Éfeso 1:9-11 nia hatete katak Maromak fó sai “segredu santu” kona-ba Ninia hakarak, no nia dehan: “Segredu santu neʼe tuir buat neʼebé halo nia kontente no nia rasik deside ona atu organiza buat hotu iha tempu neʼebé deside tiha ona nia rohan, atu halibur buat hotu hamutuk iha Kristu, inklui buat sira iha lalehan no iha rai. Sin, buat hotu halibur iha Kristu. Ami ida deʼit ho nia no ami sei simu liman-rohan, tanba Maromak hili nanis ona ami tuir ninia hakarak. Nia kumpre buat hotu hanesan nia deside ona tuir ninia hakarak”. “Segredu santu” neʼe mak kona-ba governu ida, neʼe mak Maromak nia Ukun liuhusi Mesias. Paulo temi kona-ba “buat sira iha lalehan”, neʼe mak sira neʼebé atu Ukun iha lalehan hamutuk ho Kristu. ‘Buat sira iha rai’ neʼe mak povu neʼebé sei hela iha rai. Jesus hatudu ba ninia dixípulu sira katak segredu santu mak kona-ba Maromak nia Ukun bainhira nia dehan ba sira: “Ba imi, Maromak ajuda imi atu komprende segredu santu kona-ba ninia Ukun.”—Mc 4:11.
(Éfeso 1:10) organiza buat hotu iha tempu neʼebé deside tiha ona nia rohan, atu halibur buat hotu hamutuk iha Kristu, inklui buat sira iha lalehan no iha rai. Sin, buat hotu halibur iha Kristu.
Jeová halibur ninia família
3 Buat hotu neʼebé Jeová halo, nia halo atu kumpre ninia hakarak. Tan neʼe, iha tempu neʼebé loos, Maromak komesa atu halo arranju hodi “halibur” ninia kriatura hotu atu sai família ida deʼit. (Lee Efeso 1:8-10.) Ninia arranju neʼe iha parte rua. Parte primeiru mak halibur ema kose-mina hodi prepara sira atu moris iha lalehan hodi serbisu hamutuk ho Jesus Kristu nuʼudar sira-nia Ulun. Ida-neʼe komesa ona iha loron Pentekostes 33 kuandu Jeová hahú halibur ema neʼebé sei ukun hamutuk ho Kristu iha lalehan hodi kose mina ba sira ho espíritu santu. (Aps 2:1-4) Liuhusi Jesus nia sakrifísiu, Maromak bolu sira nuʼudar ema loos neʼebé merese atu simu moris. Ho nuneʼe, ema kose-mina sira hatene katak sira sai ona “Maromak nia oan” hakiak.—Rom 3:23, 24; 5:1; 8:15-17.
4 Parte segundu mak halibur no prepara ema neʼebé atu moris iha mundu foun hodi simu Kristu nia ukun. Ema neʼebé tama uluk mundu foun mak “ema-lubun boot”. (Apk 7:9, 13-17; 21:1-5) Tuirmai, durante Kristu nia Ukun ba Tinan Rihun Ida, Maromak sei fó moris-hiʼas ba ema rihun ba rihun neʼebé mate ona atu sira moris hamutuk ho ema-lubun boot neʼe. (Apk 20:12, 13) Iha tempu neʼebá, ema-lubun boot no ema neʼebé moris hiʼas fali, sira hotu sei sai ida deʼit nuʼudar ‘buat neʼebé iha rai’. Hanoin toʼok kona-ba tempu neʼe, ita sei iha oportunidade barak atu hatudu ita-nia unidade! Liutiha tinan rihun ida, Maromak sei husik Satanás atu koko ema iha rai ba dala ikus, no ikusmai sira neʼebé laran-metin nafatin sei sai “Maromak nia oan”.—Rom 8:21; Apk 20:7, 8.
Keʼe no hetan buat murak husi Bíblia
(Éfeso 3:13) Tan neʼe, haʼu husu imi atu la rende an tan deʼit susar sira neʼebé haʼu hetan tanba ajuda imi, tanba susar sira-neʼe lori glória ba imi.
Keta husik buat ida hanetik ita atu hetan glória
15 Kuandu ita laran-metin nafatin atu halo tuir Jeová nia hakarak, ida-neʼe bele ajuda ema seluk atu hetan glória husi Maromak. Paulo hakerek ba kongregasaun iha Éfeso, hodi dehan: “Haʼu husu imi, keta laran la metin tanba deʼit susar neʼebé haʼu hetan tanba imi; haʼu-nia susar mak imi-nia kmanek [“glória”, MF].” (Éf 3:13) Tanbasá mak Paulo hatete katak ninia susar mak “glória” ba maluk kristaun iha Éfeso? Hodi serbí ninia maluk sira maski hasoru susar oioin, Paulo hatudu katak serbisu ba Maromak mak buat neʼebé iha folin boot liu ba ema kristaun. Se Paulo husik susar oioin atu halo nia rende an karik, ninia maluk kristaun sira sei hanoin katak relasaun diʼak ho Jeová, serbisu haklaken, no sira-nia esperansa ladún importante. Paulo nia ezemplu kona-ba laran-metin hatudu katak serbí nuʼudar ema kristaun mak buat neʼebé folin-boot maski halo sakrifísiu naran deʼit.
(Éfeso 3:19) no hatene kona-ba Kristu nia domin neʼebé boot liu fali koñesimentu, hodi nuneʼe imi bele sai nakonu ho Maromak nia hahalok neʼebé nia fó.
cl-E p. 299 par. 21
“Hatene kona-ba Kristu nia domin”
21 Liafuan Gregu neʼebé tradús “hatene”, signifika hatene “liuhusi esperiénsia”. Se ita hatudu domin hanesan ho Kristu hodi la hanoin an deʼit maibé hakaʼas an ajuda ema, hanoin sira, no fó perdua ba sira husi laran, ita bele hatene didiʼak Jesus nia sentimentu. Liuhusi esperiénsia, ita sei “hatene kona-ba Kristu nia domin neʼebé boot liu fali koñesimentu”. No la haluha katak nuʼudar ita hakaʼas an sai hanesan Jesus, ita sei hakbesik liután ba ida neʼebé Jesus halo tuir ho perfeitu, ita-nia Maromak domin nian, Jeová.
17-23 JUÑU
RIKUSOIN HUSI BÍBLIA | ÉFESO 4-6
“Uza kompletu ekipamentu funu nian husi Maromak”
(Éfeso 6:11-13) Uza kompletu ekipamentu funu nian husi Maromak atu nuneʼe imi bele hamriik metin hodi kontra Diabu nia lasu sira, 12 tanba ita halo funu laʼós kontra raan no isin, maibé kontra governu sira, kontra sira neʼebé iha podér, kontra ukun-naʼin sira iha mundu neʼebé nakukun no kontra anju aat sira iha lalehan. 13 Tan razaun neʼe, uza kompletu ekipamentu funu nian husi Maromak, atu imi bele tahan iha loron neʼebé aat, no bainhira imi kumpre tiha ona buat hotu, imi bele hamriik metin.
Joven sira—Hamriik metin hodi kontra Diabu
APÓSTOLU PAULO kompara ema kristaun hanesan soldadu. Ita halo daudauk funu, no ita-nia inimigu iha duni! Ita-nia funu laʼós hasoru ema, maibé hasoru Satanás ho anju aat sira. Sira mak funu-naʼin neʼebé matenek. Karik ita sente ita la bele manán funu neʼe, liuliu se ita mak joven. Maibé joven bele funu manán hasoru inimigu ho forsa boot sira-neʼe ka lae? Bele tanba iha joven balu neʼebé manán daudauk. Oinsá? Tanba sira hetan forsa husi Jeová. Sira “tau hatais funu nian hotu husi Maromak” hanesan soldadu hodi prepara an ba funu.—Lee Éfeso 6:10-12.
(Éfeso 6:14, 15) Tan neʼe, hamriik metin bá, hodi kesi metin sintu lia-loos nian iha imi-nia knotak, no halo hahalok loos hanesan taka imi-nia hirus-matan ho besi, 15 no sai prontu atu haklaken liafuan diʼak dame nian hanesan uza sapatu iha imi-nia ain.
Joven sira—Hamriik metin hodi kontra Diabu
4 Lia-loos neʼebé ita aprende husi Maromak nia Liafuan mak hanesan sintu ida atu proteje ita husi hanorin falsu sira. (Jo 8:31, 32; 1Jo 4:1) Se ita mak hadomi liután lia-loos husi Maromak nia Liafuan, neʼe sei halo fasil ba ita atu lori besi neʼebé taka ita-nia hirus-matan ho hahalok neʼebé loos ka Jeová nia morál sira. (Sal 111:7, 8; 1Jo 5:3) No se ita mak komprende didiʼak lia-loos husi Maromak nia Liafuan, ita mós sei brani liután atu hamriik metin hodi defende lia-loos husi ema sira neʼebé kontra ita.—1Pe 3:15.
7 Jeová nia morál neʼebé loos mak hanesan besi hirus-matan nian neʼebé bele proteje ita-nia “laran”. (Prv 4:23) Soldadu nunka hakarak troka besi neʼe ho besi neʼebé fraku. Hanesan neʼe mós, ita sei nunka hakarak troka Jeová nia morál neʼebé loos ho ita rasik nia hanoin kona-ba saida mak loos. Neʼe tanba ita-nia matenek latoʼo atu proteje ita-nia laran. (Prv 3:5, 6) Tan neʼe mak ita tenke fó atensaun beibeik ba besi hirus-matan nian hodi proteje nafatin ita-nia laran.
10 Soldadu Roma sira hatais sapatu neʼebé ajuda sira hodi halo funu, sapatu simbóliku neʼebé ita hatais ajuda ita “atu haklaken liafuan diʼak dame nian”. (Isa 52:7; Rom 10:15) Maski nuneʼe, ita presiza aten-brani atu bele haklaken. Bo neʼebé tinan 20 hatete: “Uluk haʼu taʼuk atu haklaken ba kolega eskola sira. Karik tanba haʼu sente moe. Se haʼu hanoin fali, haʼu la hatene tanbasá haʼu presiza moe. Ohin loron haʼu gosta haklaken ba ema neʼebé tinan hanesan haʼu.”
(Éfeso 6:16, 17) Laʼós neʼe deʼit, imi mós tenke lori eskudu boot fiar nian, hodi imi bele hamate rama-oan hotu neʼebé lakan ho ahi husi aat-naʼin. 17 No mós taka kapasete salvasaun nian, no lori surik espíritu nian, neʼe katak Maromak nia liafuan.
w18.05 p. 29-31 par. 13, 16, 20
Joven sira—Hamriik metin hodi kontra Diabu
13 Saida mak “rama-oan ho ahi” neʼebé Satanás uza hodi ataka ita? Karik nia uza lia-bosok kona-ba Jeová hodi ataka Ita. Satanás hakarak ita atu sente katak Jeová la hanoin ita no nia la hadomi Ita. Ida tinan 19 dehan: “Dala barak haʼu sente Jeová dook husi haʼu no nia lakohi sai haʼu-nia Belun.” Irmán neʼe halo saida bainhira sentimentu neʼe mosu? Nia dehan: “Reuniaun sira hametin tebes haʼu. Uluk, haʼu nunka fó komentáriu iha reuniaun, tanba haʼu hanoin ema lakohi rona haʼu-nia komentáriu sira. Maibé agora haʼu prepara didiʼak no koko atu fó komentáriu rua ka tolu. Neʼe la fasil, maibé haʼu sente diʼak bainhira fó tiha komentáriu sira. Irmaun-irmán sira fó laran-manas tebes ba haʼu. Bainhira fila husi reuniaun, haʼu hatene Jeová hadomi haʼu.”
16 Hanesan kapasete bele proteje soldadu nia kakutak, ita-nia “esperansa salvasaun nian” mós bele proteje ita-nia neon no kbiit atu hanoin. (1Ts 5:8; Prv 3:21) Esperansa ajuda ita atu tau fokus ba Jeová nia promesa sira no atu la sai laran-kraik kona-ba ita-nia problema sira. (Sal 27:1, 14; Aps 24:15) Maibé se ita hakarak esperansa neʼe atu proteje ita, ita tenke fiar duni ba esperansa neʼe. Ita tenke tau “kapasete” iha ita-nia ulun, laʼós lori deʼit iha liman.
20 Apóstolu Paulo kompara Maromak nia Liafuan hanesan surik ida. Jeová fó ona surik neʼe mai ita. Maibé ita presiza aprende uza surik neʼe ho matenek hodi defende ita-nia fiar ka hadiʼa dalan neʼebé ita hanoin. (2Ko 10:4, 5; 2Ti 2:15) Oinsá mak ita bele aumenta matenek atu uza surik neʼe? Sebastian neʼebé tinan 21 hatete: “Bainhira haʼu lee Bíblia, haʼu sempre hakerek versíkulu ida husi kapítulu ida-idak. Haʼu halo lista kona-ba haʼu-nia eskritura favoritu sira.” Halo nuneʼe ajuda nia atu komprende liután Jeová nia hanoin. Daniel neʼebé temi uluk hatutan: “Bainhira haʼu lee Bíblia, haʼu hili versíkulu balu neʼebé haʼu bele uza hodi ajuda ema iha serbisu haklaken. Haʼu haree ema rona ho didiʼak bainhira sira haree katak Ita respeitu tebes Bíblia no hakaʼas an atu ajuda sira.”
Keʼe no hetan buat murak husi Bíblia
(Éfeso 4:30) No mós, keta halo Maromak nia espíritu santu triste, tanba liuhusi espíritu neʼe mak Maromak tau sinál ba imi toʼo loron neʼebé imi sai livre husi imi-nia isin liuhusi Jesus nia sakrifísiu.
it-1-E p. 1128 par. 3
Santu
Espíritu santu. Jeová sempre kontrola no dirije ninia forsa, ka espíritu neʼe, no ninia espíritu santu sempre halaʼo ninia hakarak. Espíritu neʼe moos, sagradu no ketak hodi Maromak bele uza ba buat diʼak. Tan neʼe bolu nuʼudar “espíritu santu”. (Sal 51:11; Lc 11:13; Rom 1:4; Éf 1:13) Bainhira Maromak fó ninia espíritu santu ba ema ida, forsa neʼe bele halo ema neʼe hatudu hahalok santu no moos. Se ema ida hatudu hahalok neʼebé sala no foʼer, neʼe hanesan halo “triste” Maromak nia espíritu santu. (Éf 4:30) Maski espíritu santu laʼós Maromak ka ema, maibé tanba espíritu santu mai husi Maromak, no neʼe mak forsa neʼebé Maromak uza atu halaʼo ninia hakarak, tan neʼe, se ita halo espíritu santu “triste”, neʼe hanesan halo Jeová triste. Se ema ida halo beibeik hahalok sala, neʼe sei “hanetik Maromak nia espíritu nia serbisu” iha ema neʼe. (1Ts 5:19) Se ema neʼe kontinua halo hahalok sala, nia bele halo Maromak nia espíritu santu “triste” no rezultadu mak Maromak bele sai fali ema neʼe nia inimigu. (Isa 63:10) Ema neʼebé halo triste espíritu santu karik sei koʼalia aat hasoru espíritu santu, no neʼe mak sala neʼebé Jesus Kristu dehan labele hetan perdua iha tempu agora, no mós iha tempu neʼebé atu mai.—Mt 12:31, 32; Mc 3:28-30.
(Éfeso 5:5) Tanba imi rasik hatene no rekoñese ida-neʼe, katak ema neʼebé halo sala seksuál ka hatudu hahalok la moos ka kaan-teen, neʼebé hanesan ho adora estátua, sei la simu liman-rohan iha Kristu no Maromak nia Ukun.
it-1-E p. 1006 par. 2
Kaan-teen
Hatudu sai liuhusi hahalok. Hahalok kaan-teen bele haree ho klaru bainhira ema ida hatudu sai ninia hakarak neʼebé demais kona-ba sala. Bíblia nia hakerek-naʼin ida, Tiago, hatete katak hakarak neʼebé sala, bainhira sai buras ona ikusmai sei hamosu sala. (Tgo 1:14, 15) Tan neʼe, ema neʼebé kaan-teen ita bele hatene liuhusi ninia hahalok sira. Apóstolu Paulo hatete katak ema neʼebé kaan-teen hanesan ho adora lulik. (Éf 5:5) Tanba kaan demais, nia halo buat neʼebé nia kaan sai hanesan maromak ida, tanba nia tau ida-neʼe uluk liu fali serbisu haklaken no adorasaun ba Kriadór.—Rom 1:24, 25.
24-30 JUÑU
RIKUSOIN HUSI BÍBLIA | FILIPE 1-4
“Keta hanoin resin kona-ba buat ida”
(Filipe 4:6) Keta hanoin resin kona-ba buat ida, maibé iha situasaun hotu husu ajuda husi Maromak liuhusi orasaun no harohan no mós fó agradese,
“Maromak nia dame neʼebé aas liu ema nia hanoin hotu”
10 Saida mak bele ajuda ita atu iha “Maromak nia dame” duké sai “laran-taridu”? Husi Paulo nia liafuan neʼebé nia hakerek ba irmaun-irmán sira iha Filipe hatudu katak, se ita mak hanoin barak kona-ba problema ida, halo orasaun bele ajuda ita. Tan neʼe bainhira ita sai laran-taridu, diʼak atu halo deʼit orasaun. (Lee 1 Pedro 5:6, 7.) Kuandu ita halo orasaun ba Jeová, ita tenke fiar metin katak nia hanoin ita. Hatoʼo beibeik agradese ba Jeová kona-ba bensaun neʼebé ita hetan. No keta haluha katak Jeová bele “halo barak liu fali buat hotu neʼebé ita husu no hanoin”.—Éf 3:20.
(Filipe 4:7) no Maromak nia dame neʼebé aas liu ema nia hanoin hotu sei proteje imi-nia laran no imi-nia kbiit atu hanoin liuhusi Kristu Jesus.
“Maromak nia dame neʼebé aas liu ema nia hanoin hotu”
7 Bainhira irmaun sira iha Filipe lee Paulo nia karta, karik sira barak sei hanoin-hetan buat neʼebé akontese ba Paulo ho Silas, no kona-ba oinsá Jeová ajuda Paulo ho Silas iha dalan neʼebé sira nunka hanoin. Maibé Paulo atu hanorin saida ba sira? Katak sira lalika hanoin barak. Halo orasaun no tuirmai sira sei hetan Maromak nia dame. Paulo hatete ba sira katak Maromak nia dame “aas liu ema nia hanoin hotu”. Neʼe katak sá? Bíblia balu uza liafuan “aas liu fali ita-nia mehi hotu” ka “diʼak liu fali ema nia planu hotu”. Tan neʼe Paulo nia liafuan hatudu katak “Maromak nia dame” furak liu fali buat hotu neʼebé ita hanoin. Dala ruma ita la hatene dalan atu rezolve problema sira, maibé Jeová hatene, no nia bele uza dalan neʼebé ita nunka hanoin.—Lee 2 Pedro 2:9.
“Maromak nia dame neʼebé aas liu ema nia hanoin hotu”
16 Oinsá mak “Maromak nia dame neʼebé aas liu ema nia hanoin hotu” bele ajuda ita? Bíblia hatete katak dame neʼe sei “proteje” ita-nia laran ho neon. (Flp 4:7) Iha lia orijinál, “proteje” mak liafuan neʼebé refere ba grupu soldadu ida neʼebé hetan knaar atu tau matan ba sidade. Ema sira neʼebé hela iha sidade Filipe mós hetan protesaun husi grupu soldadu neʼe. Tan neʼe ema bele toba ho seguru iha kalan tanba sira hatene katak sidade neʼe hetan daudauk protesaun. Hanesan neʼe mós bainhira ita iha “Maromak nia dame”, ita la presiza hanoin barak tan, ita-nia laran no neon bele sai hakmatek. Ita hatene katak Jeová hanoin ita no nia hakarak ita atu manán hasoru susar sira. (1Pe 5:10) Hodi hatene kona-ba neʼe bele proteje ita atu la sai laran-taridu ka laran-tun.
Keʼe no hetan buat murak husi Bíblia
(Filipe 2:17) Haʼu sai ona hanesan sakrifísiu hemu nian neʼebé fui iha imi-nia sakrifísiu nia leten, katak imi-nia serbisu santu neʼebé imi halo tanba imi-nia fiar mak book imi, maski nuneʼe haʼu kontente no haksolok hamutuk ho imi hotu.
it-2-E p. 528 par. 5
Sakrifísiu
Sakrifísiu hemu nian. Sakrifísiu hemu nian oferese hamutuk ho sakrifísiu sira seluk, liuliu bainhira ema Izraél hela tiha iha rai neʼebé Maromak promete. (Núm 15:2, 5, 8-10) Neʼe mak sakrifísiu tua-uvas no fakar iha altár leten. (Núm 28:7, 14; kompara ho Éx 30:9; Núm 15:10) Apóstolu Paulo hakerek karta ba ema iha Filipe: “Haʼu sai ona hanesan sakrifísiu hemu nian neʼebé fui iha imi-nia sakrifísiu nia leten, katak imi-nia serbisu santu neʼebé imi halo tanba imi-nia fiar mak book imi, maski nuneʼe haʼu kontente no haksolok hamutuk ho imi hotu.” Iha eskritura neʼe nia uza sakrifísiu hemu nian atu hatudu katak nia fó ninia an tanba maluk Kristaun. (Flp 2:17) Lakleur antes nia mate, nia hakerek karta ba Timóteo: “Haʼu sai ona hanesan sakrifísiu hemu nian neʼebé fui daudaun iha altár leten, no tempu atu haʼu sai livre besik loos ona”.—2Ti 4:6.
(Filipe 3:11) hodi haree se haʼu bele hetan moris-hiʼas uluk nian husi mate.
w07-E 1/1 p. 26-27 par. 5
“Moris-hiʼas uluk nian” komesa daudaun!
5 Tuirmai, ema neʼebé Maromak hili ho espíritu santu atu sai membru husi “Izraél Maromak nian”, tenke hamutuk ho Naʼi Jesus Kristu iha lalehan, no iha neʼebá sira “sei hamutuk ho Naʼi ba nafatin”. (Gal 6:16; 1Ts 4:17) Akontesimentu neʼe hanaran “moris-hiʼas uluk nian” ka “moris-hiʼas primeiru”. (Flp 3:10, 11; Apk 20:6) Depois moris-hiʼas neʼe remata, neʼe mak tempu atu fó moris-hiʼas ba ema rihun ba rihun iha mundu hodi hetan moris rohan-laek iha Paraízu. Maski ita-nia esperansa atu bá lalehan ka iha mundu, ita hakarak tebes atu hatene kona-ba “moris-hiʼas primeiru”. Moris-hiʼas neʼe hanesan saida? Bainhira mak neʼe akontese?
[Nota-rodapé]
a Atu hatene saida mak la hanesan entre “hahalok neʼebé lamoos, no sala-foʼer, no hahalok arbiru deʼit”, haree Menara Pengawal, 15 Jullu 2006, pájina 29-31.