João haklaken beibeik hodi dehan: ‘Ida neʼebé boot liu haʼu sei mai.’ Bainhira Jesus maizumenus tinan 30, nia sai husi Galileia hodi bá Mota Jordaun, fatin neʼebé João fó batizmu ba ema. Jesus husu João atu fó batizmu ba nia, maibé João dehan: ‘Haʼu labele, Ita mak tenke fó batizmu mai haʼu.’ Jesus dehan ba João: ‘Jeová hakarak ó atu fó batizmu mai haʼu.’ Tuirmai sira tama ba Mota Jordaun no João hatama Jesus nia isin-lolon tomak ba bee laran.

Depois Jesus hetan tiha batizmu, nia halo orasaun. Iha tempu neʼebá, lalehan nakloke no Maromak nia espíritu tun ba nia hanesan manu-pombu ida. Tuirmai Jeová koʼalia husi lalehan: ‘Ó mak haʼu-nia Oan-Mane neʼebé haʼu hadomi, ó halo haʼu-nia laran kontente.’

Bainhira Jeová nia espíritu tun ba Jesus, Jesus sai Kristu, ka Mesias. Agora nia prontu halo serbisu neʼebé Jeová haruka nia atu halo iha mundu.

Depois neʼe Jesus bá rai-fuik no hela iha neʼebá durante loron 40. Bainhira nia fila fali, nia bá hasoru João. Kuandu Jesus hakbesik daudaun ba João, João dehan: ‘Neʼe mak Maromak nia Bibi-Oan neʼebé sei hamoos mundu nia sala.’ Ho liafuan sira-neʼe, João fó sai ba ema katak Jesus mak Mesias. Ó hatene saida mak akontese ba Jesus bainhira nia iha rai-fuik? Ita sei aprende iha istória tuirmai.

Depois hetan tiha batizmu, espíritu santu dirije Jesus ba rai-fuik. Nia la han buat ida durante loron 40 no nia sente hamlaha tebes. Tuirmai Diabu mai no tenta Jesus no dehan: ‘Se ó mak Maromak nia Oan, halo fatuk sira-neʼe sai fali paun.’ Maibé Jesus uza Eskritura sira atu hatán ba Diabu: ‘Hakerek nanis ona, ema la moris deʼit ho paun. Ema presiza rona ba liafuan hotu neʼebé Jeová hatete.’

Tuirmai Diabu sadik Jesus: ‘Se ó mak Maromak nia Oan duni, haksoit tun husi fatin neʼebé aas liu iha templu, tanba hakerek nanis ona, Maromak sei haruka ninia anju sira atu ajuda ó.’ Maibé Jesus dehan: ‘Hakerek nanis ona, ó labele koko Jeová.’

Tuirmai, Satanás hatudu ba Jesus ukun hotu iha mundu, inklui ukun sira-neʼe nia rikusoin no glória, no dehan: ‘Haʼu sei fó ukun sira-neʼe hotu no sira-nia glória ba ó se ó adora haʼu dala ida deʼit.’ Maibé Jesus dehan: ‘Bá dook tiha Satanás! Hakerek nanis ona, ó tenke adora Jeová mesak deʼit.’

Ikusmai Diabu husik Jesus, no anju sira mai no fó hahán ba Jesus. Husi tempu neʼebá, Jesus haklaken liafuan diʼak kona-ba Maromak nia Ukun. Neʼe mak serbisu neʼebé nia tenke halo iha mundu. Ema gosta Jesus nia hanorin no laʼo tuir nia ba fatin hotu neʼebé nia bá.