Mate

Ema mate iha neʼebé?

“Ó mak rai-rahun no ó sei fila fali ba rai-rahun.” —Gênesis (Kejadian) 3:19.

EMA HANOIN OINSÁ?

Ema balu hanoin katak ema mate bá lalehan, infernu, ka purgatóriu. Balu fiar katak ita moris fali nuʼudar ema seluk ka nuʼudar animál. No ema neʼebé la fiar relijiaun hanoin ema mate la bá fatin ida no la bele moris filafali.

SAIDA MAK BÍBLIA HANORIN?

Eclesiastes (Pengkhotbah) 9:10 hatete katak “la iha serbisu, ka planu, ka koñesimentu ka matenek iha rate, fatin neʼebé ó sei bá”. Bíblia mós esplika saida mak akontese ba ema no animál kuandu sira mate. Bíblia hatete: “Sira hotu sei bá fatin ida. Sira hotu mai husi rai-rahun, no sira hotu fila fali ba rai-rahun.”—Eclesiastes (Pengkhotbah) 3:20.

Saida mak ema mate nia kondisaun?

“Nia iis kotu, nia fila fali ba rai; iha loron neʼe kedas ninia hanoin hotu lakon.” —Salmo (Mazmur) 146:4.

EMA HANOIN OINSÁ?

Ema hanorin katak ema mate bá neʼebé, ida-neʼe depende ba ninia hahalok uluk bainhira nia sei moris iha mundu. Se nia hahalok diʼak, ninia kolen mak kontente ba nafatin iha lalehan, maibé se nia hahalok aat, nia terus iha ahi ba nafatin. Ema fiar katak atubele fila ba Maromak nia kadunan santu, ita-nia sala sira tenkesér hamoos uluklai. Sira neʼebé la moos la bele bá lalehan no sira terus ba nafatin.

SAIDA MAK BÍBLIA HANORIN?

Ema mate la sente kontente ka terus. Neʼe duni, sira la bele sente buat ida, no sira mós la bele ajuda ka halo aat ba ema moris. Eclesiastes (Pengkhotbah) 9:5, 6 hatete: “Ema neʼebé moris hatene katak sira sei mate; maibé ema neʼebé mate ona, sira la hatene buat ida . . . Sira-nia domin no sira-nia ódiu no sira-nia laran-moras lakon hotu tiha, no sira mós la halo tan serbisu iha loro-matan okos.”

Iha ka lae esperansa ba ema mate?

“Se ema ida mate nia bele moris fali ka lae? Loron hotu-hotu ba haʼu- nia serbisu obrigasaun nian, haʼu sei hein, toʼo tempu neʼebé haʼu sai livre.”—Jó (Ayub) 14:14.

EMA HANOIN OINSÁ?

Ema barak fiar katak, kuandu Maromak haruka ema ida ba infernu, la iha ona esperansa ba nia. Ema dehan terus neʼe la iha rohan. Ba sira neʼebé iha purgatóriu, sira-nia sala tenkesér hamoos tiha ho ahi mak foin bele moris haksolok iha lalehan.

SAIDA MAK BÍBLIA HANORIN?

Hanesan ema neʼebé toba sei hadeer fali, nuneʼe mós sira neʼebé mate ona, Maromak nia Oan-Mane, Jesus sei halo sira moris hiʼas fali iha mundu. Bíblia hatete: “Keta hakfodak kona-ba neʼe, tanba oras sei toʼo mai kuandu ema hotu neʼebé iha rate laran sei rona nia lian no sai husi rate.” (João 5:26, 28, 29) Se ema hatudu hahalok diʼak husi tempu moris-hiʼas nian, Maromak sei fó ba sira moris rohan-laek.a