Benvindu ba Eskola Serbisu Kristaun

EMA rihun ba rihun iha rai 200 liu, hola parte ona iha Eskola Serbisu Kristaun nian semana-semana no sira hetan hanorin diʼak barak husi eskola neʼe. Sira balu mak ema foun, no sira seluk hola parte iha eskola neʼe ba tinan barak ona. Eskola neʼe halaʼo ona iha kongregasaun 100.000 liu no ema neʼebé hola parte iha eskola neʼe iha idade neʼebé la hanesan, sira mai husi rasa oioin no iha matenek oioin. Sira hotu simu hanorin husi eskola neʼe, no lalika selu.

Kuandu eskola neʼe komesa halaʼo iha kongregasaun husi Testemuña ba Jeová iha tinan 1943, eskola neʼe nia objetivu mak “atu prepara ‘ema neʼebé laran-metin’, neʼebé rona ona Maromak nia Liafuan no hatudu ona katak sira fiar ida-neʼe ‘hodi sira bele hanorin ema seluk’ . . . atu sira ida-idak . . .  sai prontu liu atu fó sai sira-nia fiar iha ema nia oin”. (Course in Theocratic Ministry, pájina 4) No toʼo ohin loron, objetivu ba eskola neʼe sei hanesan.

Ita-nia kbiit atu koʼalia mak hanesan prezente husi Maromak. Entaun, oinsá mak ita hotu bele uza didiʼak prezente neʼe? Bíblia hatán: “Kriatura hotu neʼebé moris hahiʼi Jah bá!” (Salmo [Mazmur] 150:6) Kuandu ita halo ida-neʼe, ita sei halo ita-nia Aman iha lalehan sente haksolok. Ita hatudu ba nia katak ita agradese tebes ba ninia laran-diʼak no domin. Tan neʼe mak ema kristaun sira sempre simu avizu atu ‘hasaʼe nafatin sakrifísiu hahiʼi nian ba Maromak, katak, uza sira-nia ibun hodi fó sai iha ema hotu nia oin kona-ba ninia naran’. (Ebreu 13:15) Tanba ami hakarak atu ajuda ita uza didiʼak kbiit neʼebé Maromak fó ba ita atu hahiʼi nia, entaun ami fó benvindu ba ita tanba agora ita hola parte ona iha Eskola Serbisu Kristaun nian.

Maski iha eskola neʼe ita sei aprende barak liu kona-ba oinsá atu lee iha ema nia oin no oinsá atu koʼalia no hanorin ho didiʼak, maibé tuir loloos Eskola Serbisu Kristaun nian sei hanorin ita buat barak tan. Nuʼudar ita hola parte iha eskola neʼe, ida-neʼe sei ajuda ita atu aumenta ita-nia matenek kona-ba lee mesak, rona no hanoin-hetan, estuda, halo riset, halibur no organiza informasaun neʼebé ita hetan, dalan diʼak atu koʼalia ho ema, hatán ba pergunta sira, no hakerek buat neʼebé ita hanoin. Iha eskola neʼe, ita sei uza Bíblia no mós ita-nia livru sira. Nuʼudar ita halo nakonu ita-nia neon ho lia-loos folin-boot neʼebé ita hetan iha Bíblia laran, ita sei aprende atu iha hanoin hanesan Maromak nian. Ida-neʼe sei lori buat diʼak barak ba ita-nia moris tomak! Matenek-naʼin ida naran William Lyon Phelps neʼebé hanorin iha universidade hakerek katak Maromak nia Liafuan mak iha folin-boot duni, nia dehan: “Ema hotu neʼebé hatene didiʼak Bíblia mak ema neʼebé matenek. . . . Haʼu fiar katak aprende Bíblia maski la bá universidade mak folin-boot liu fali duké bá universidade maibé la aprende Bíblia.”

Oinsá atu hetan buat diʼak husi eskola neʼe

Tuir loloos, atu hetan buat diʼak husi hanorin sira neʼebé ita simu iha Eskola Serbisu Kristaun nian, ita rasik tenke hakaʼas an. Apóstolu Paulo haruka ninia maluk kristaun naran Timóteo hodi dehan: “Hanoin didiʼak kona-ba buat sira-neʼe; fó ó-nia an tomak ba buat sira-neʼe, atu nuneʼe ema hotu bele haree ho momoos oinsá ó laʼo ba oin.” (1 Timóteo 4:15) Entaun, saida deʼit mak ita rasik presiza halo?

Se bele, keta falta hodi tuir reuniaun Eskola Serbisu Kristaun nian semana-semana. Uza didiʼak ita-nia livru neʼe, Aprende husi Eskola Serbisu Kristaun nian. Hakerek ita-nia naran iha fatin neʼebé ami prepara ona iha pájina primeiru. Sempre lori livru neʼe kuandu tuir reuniaun eskola nian. Kuandu ita lee, tau marka ba informasaun neʼebé ita sente katak bele ajuda ita. Uza parte iha livru neʼe nia ninin atu hakerek informasaun sira neʼebé ita aprende durante eskola neʼe.

Kuandu ita prepara ba eskola neʼe semana-semana, la haluha katak Bíblia mak livru neʼebé importante liu neʼebé uza iha eskola neʼe. Entaun, uza tempu atu lee parte Bíblia nian neʼebé temi iha programa eskola nian ba semana neʼe. No se ita mós bele lee uluk informasaun sira kona-ba parte ida-idak iha programa neʼe, ida-neʼe bele lori buat diʼak ba ita.

Durante eskola, karik iha mós oportunidade ba rona-naʼin sira atu hola parte hodi fó komentáriu. Entaun, hakaʼas an atu apoia ida-neʼe. Kuandu ita fó komentáriu, ida-neʼe sei ajuda duni ita atu hanoin-hetan buat neʼebé ita rona no mós uza ida-neʼe iha ita-nia moris rasik.

Ema ida-idak neʼebé hola parte iha eskola neʼe sei hetan oportunidade atu halaʼo sira-nia knaar iha kongregasaun nia oin. Entaun, uza didiʼak oportunidade ida-idak neʼebé ita simu. Hakaʼas an atu halo tuir didiʼak lisaun eskola nian neʼebé fó ona ba ita. Ita mós sei simu konsellu neʼebé sei ajuda ita atu laʼo ba oin. Diʼak atu simu ajuda sira hanesan neʼe. Hakerek iha ita-nia livru sujestaun neʼebé ita simu neʼebé bele ajuda ita atu laʼo ba oin. Tanba susar ba ema atu haree nia an rasik hanesan ema seluk haree, entaun sujestaun diʼak sira-neʼe no mós konsellu neʼebé tuir Bíblia bele ajuda duni ita atu laʼo ba oin. Maski ita hola parte iha eskola neʼe ba tinan barak ona, maibé ita hotu presiza nafatin sujestaun no konsellu sira.—Provérbios (Amsal) 1:5.

Ita hakarak kontinua laʼo ba oin ka lae? Ita bele, se ita rasik hakaʼas an. Lee uluk informasaun husi diskursu eskola nian ida-idak neʼebé estudante sei hatoʼo. Nuneʼe, se ema ruma la halo nia knaar, karik ita bele sai prontu atu taka nia fatin, no ida-neʼe sei fó ba ita esperiénsia barak liután. Kuandu ema seluk hatoʼo diskursu, rona didiʼak oinsá sira fó sai informasaun sira-neʼe. Ita hotu bele aprende husi ita-nia maluk sira.

Liután neʼe, se ita iha tempu, diʼak atu estuda nanis livru neʼe no ida-neʼe sei ajuda ita atu laʼo ba oin. Karik ita bele haree uluk informasaun iha tópiku 15 tuirmai neʼe. Depois neʼe mak ita bele estuda lisaun ida-idak neʼebé hahú iha pájina 78 kona-ba “Eskola neʼebé fó treinu ba ita nuʼudar diskursu-naʼin no mestre”. Estuda uluk lisaun ida-idak, no koko atu halo treinu neʼebé fó sai iha lisaun ida-idak nia rohan. Tuirmai, uza ida-neʼe iha serbisu haklaken. Hodi halo nuneʼe sei ajuda duni ita atu laʼo ba oin nuʼudar diskursu-naʼin no nuʼudar mestre ba Maromak nia Liafuan.

Hanorin neʼebé ita simu iha Eskola Serbisu Kristaun nian sei ajuda ita atu halo buat neʼebé importante liu iha ita-nia moris. Ita hotu moris tanba Maromak nia hakarak, entaun hodi hahiʼi nia mak objetivu ba ita-nia moris. Maromak Jeová merese duni atu simu hahiʼi. (Apokalipse 4:11) Hanorin neʼebé ita simu iha eskola neʼe mak dalan neʼebé ajuda ita atu hahiʼi Maromak, hodi nuneʼe ita bele iha hanoin neʼebé loos, hatudu hahalok neʼebé matenek, no koʼalia ho didiʼak kona-ba lia-loos folin-boot neʼebé iha Bíblia laran.