Mudansa boot kona-ba klima no ita-nia futuru—Saida mak Bíblia dehan?

“Mundu neʼe nakonu ho dezastre tanba mudansa ba klima. Lakleur tan, mundu labele ona sai nuʼudar hela-fatin.”—The Guardian.

Ema iha mundu hasoru problema sériu neʼebé sira rasik mak kria. Sientista barak hanoin katak ema nia atividade oioin halo mundu nia temperatura saʼe, no neʼe fó impaktu aat ba klima no rezultadu mak dezastre naturais oioin mosu. Neʼe inklui buat tuirmai:

• Anin manas, rai maran, no anin boot akontese beibeik no sai makaʼas liután, no buat sira-neʼe hamosu inundasaun no ahi han rai beibeik.

• Jelu iha área Ártiku no foho jelu sira sai nabeen.

• Tasi saʼe.

Problema klima neʼe fó impaktu ba mundu tomak. Reportajen husi New York Times fó sai kondisaun iha rai 193 no dehan: “Planeta neʼe fó sinál hodi husu ita-nia ajuda.” Klima neʼebé oin-seluk halo ema nia moris sai susar toʼo ema balu mate, no Organização Mundial da Saúde (WHO) temi ida-neʼe nuʼudar “problema boot liu neʼebé ameasa ema nia saúde”.

Maski nuneʼe, ita iha razaun atu iha esperansa ba futuru. Bíblia fó-hatene nanis buat neʼebé akontese daudaun ohin loron, no mós razaun tanbasá ita bele hein katak Maromak sei halo buat ruma atu proteje ita-nia futuru.

Mudansa boot kona-ba klima kumpre Bíblia nia profesia ka lae?

Sin. Problema klima neʼebé akontese daudaun tanba mundu nia temperatura saʼe, neʼe kumpre buat neʼebé Bíblia fó-hatene nanis ona.

Profesia: “Iha loron ikus sira sei iha problema barak neʼebé susar atu tahan. Tanba ema sei hadomi deʼit sira-nia an, hadomi osan, . . . la hatudu laran-metin, . . . la rona malu, . . . traidór, ulun-toos.”—2 Timóteo 3:1-4.

Bíblia fó-hatene nanis kona-ba ema nia hahalok oioin neʼebé hamosu problema klima iha mundu. Governu no negósiu-naʼin sira buka uluk osan duké hanoin kona-ba ema nia futuru. Maski sira koko atu hadiʼa situasaun hamutuk, sira labele konkorda malu kona-ba oinsá atu hapara problema neʼe.

Profesia neʼe hatudu katak ita labele hein ba ema atu troka sira-nia hahalok hodi proteje mundu neʼe. Bíblia fó sai katak ema nia hahalok hanoin an “sei sai aat liután”.—2 Timóteo 3:13.

Tanbasá ita bele fiar katak Maromak sei hadiʼa situasaun?

Tuir Bíblia, Maromak Jeováa, ita-nia Kriadór, hanoin tebes kona-ba mundu no ema neʼebé hela iha mundu. Hanoin toʼok eskritura tolu neʼebé fó sai katak Maromak sei hadiʼa situasaun.

1. 1. Maromak “kria rai laʼós saugati deʼit, maibé nia kria rai atu ema bele hela bá”.—Isaias 45:18.

   Maromak sei kumpre ninia objetivu ba mundu neʼe. (Isaias 55:11) Nia sei la husik mundu neʼe sai aat ka sai fatin neʼebé ema labele hela tan.

2. 2. “Ema laran-maus sei simu rai nuʼudar sira-nian, no sira sei hetan ksolok boot ho dame neʼebé barak. Ema laran-loos sira sei simu rai nuʼudar sira-nian, no sira sei moris ba nafatin iha rai.”—Salmo 37:11, 29.

   Maromak promete katak ema sei moris ba nafatin iha rai ho kondisaun neʼebé nakonu ho dame.

3. 3. “Kona-ba ema aat, sira sei lakon husi rai.”—Provérbios 2:22.

   Maromak promete katak nia sei halakon ema neʼebé kontinua halo hahalok aat, neʼe inklui ema neʼebé estraga mundu.

Maromak sei halo saida iha futuru?

Maromak sei kumpre ninia promesa liuhusi governu ida neʼebé ukun mundu tomak. Bíblia temi governu neʼe nuʼudar Maromak nia Ukun. (Mateus 6:10) Governu neʼe sei ukun husi lalehan, no la presiza halo arranju no serbisu hamutuk ho ema nia governu atu hadiʼa mundu nia ambiente. Loloos, Maromak nia Ukun sei troka ema nia governu hotu.—Daniel 2:44.

Maromak nia Ukun sei lori buat diʼak oioin ba ema no mós ba mundu. (Salmo 96:10-13) Haree toʼok saida mak Maromak Jeová sei halo liuhusi ninia Ukun.

• Hadiʼa ambiente

  Bíblia dehan: “Rai-fuik no rai neʼebé maran-dekor sei haksolok, no rai-tetuk maran sei haksolok no sai nakonu ho ai-funan asafraun.”—Isaias 35:1.

  Neʼe hatudu saida kona-ba ita-nia futuru: Jeová sei hadiʼa mundu tomak, inklui parte neʼebé ema estraga makaʼas ona.

• Kontrola klima

  Bíblia dehan: “[Jeová] halo anin-fuik hakmatek; Tasi nia laloran sira mós sai kalma.”—Salmo 107:29.

  Neʼe hatudu saida kona-ba ita-nia futuru: Jeová iha kbiit atu kontrola forsa natureza. Ema sei la hetan terus tan husi klima neʼebé aat.

• Hanorin ema atu tau matan didiʼak mundu

  Bíblia dehan: “Haʼu sei fó ba ó kbiit atu komprende kleʼan no hanorin ó dalan neʼebé ó tenke laʼo bá.”—Salmo 32:8.

  Neʼe hatudu saida kona-ba ita-nia futuru: Jeová fó responsabilidade ba ema atu tau matan mundu. (Génesis 1:28; 2:15) Nia sei hanorin ita oinsá atu tau matan didiʼak buat neʼebé nia kria ona no halaʼo moris iha dalan neʼebé la estraga ambiente.