Talily Soa Nisorate i Matio

24 Tamy i Jesosy niakatse boake amy i tempolỳ aoy, le nagnantogne aze i mpiana’e rey mba hanoro aze i tragno amy i tempolỳ ao rey. 2 Le hoe ty Jesosy tamy iareo: “Trea’areo o raha iaby reo? Volagneko ama’areo to vata’e, fa tsy hisy vato hengagne hifanongoa ndra raike ty eo, fa hahomake iaby.”

3 Tamy ireke nitoboke tamy i vohitse Olivay eoy, le nimbama’e mbeo i mpiana’e rey sady nagnontane aze mitokagne tie: “Ambarao anay tie ombia ty hisehoa ze raha iaby zay, naho ty ho famantaragne ty fagnatreha’o vaho ty fotoagne hifaragna ty tontolo toy?”

4 Le izao ty navale i Jesosy iareo: “Mitaoa nareo mba tsy ho voafita o ndatio, 5 satria maro ty ho avy amy ty agnarako, le hirehake tie: ‘Izaho o Kristio’, le maro ty ho voafitake. 6 Haharey aly naho talily miomba ty aly nareo. Ao nareo tsy hatahotse, satria tsy maintsy hiseho ze raha zay, faie mbe tsy ho avy i fara’ey.

7 “Hisy firenena hanafike firenena, le hisy fanjakagne hialy amy ty fanjakagne. Hisy keré vaho horohoron-tane amy ty tane sambe hafa. 8 I raha iaby zay ty ho fanomboha i haoreagney.

9 “Henjehe o ndatio nareo,* le hovonoe iareo. Hoheje ty ndaty amy ty firenena iaby ka nareo noho ty agnarako. 10 Maro ka ty hiala amy ty finoa’e, le ty ila’e hifotetse ty nama’e vaho hifankalaigne. 11 Maro ty mpaminany sandoke ho avy, le hamitake ndaty maro. 12 Noho ty fitomboa ty fandikan-dalàna ka, le hihamanintsigne ty hatea ty ndaty maro. 13 Faie ze miaretse hatrake am-para’e ro ho voavonje. 14 Hotoriegne amy ty tane toy iaby ka ty talily soa i Fanjakagney mba ho vavolombelogne amy ty firenena iaby, vaho izay ho avy i fara’ey.

15 “Naho fa trea’areo amy i toeragne masigney ao areke, i raha mampangorigne mahavy faharavagne nirehafe i Daniela mpaminanỳ (mandineha soa ze mamaky io), 16 le ao ze a Jodia ao hilay am-bohitse agne. 17 Ao ka ze ndaty ambone tafo-tragno ao, tsy hangalake ty fanagna’e an-tragno’e ao hey amy ie mizotso boake eỳ. 18 Le ao ka ze an-teteke agne, tsy holy hey hangalake i akanjo’e ivela’ey. 19 Loza ty hanjò ty ampela mivesatse naho ze mampinono amy ze andro zay! 20 Mivavaha lognandro nareo mba tsy ho amy ty asotry naho amy ty andro Sabata* ty hilaisa’areo. 21 Ty anto’e, amy ze andro zay, le hisy haoreagne lahibey mbe tsy nisy nanahake aze, nanomboke ty nisia o ndatio,* hatrake amy izao sady tsy hisy sasa ka. 22 Naho tsy nihafohezegne ze andro zay, le tsy hisy ndaty* ho voavonje. Faie noho ty amo o ndaty jinobogneo, le hohafohezegne ze andro zay.

23 “Naho misy ndaty areke mirehake ama’areo tie: ‘Intia i Kristy’ ndra ‘Aroa ty Kristy’, le ko inoagne. 24 Hisy Kristy sandoke naho mpaminany sandoke ho avy, le hanao famantaragne lahibey naho fahagagagne mba hamitahagne o ndatio, ndra o ndaty jinobogneo aza, naho vita iareo. 25 Tsiarovo avao ze raha nampitaoako anareo zay. 26 Fagnampe izay ka, naho misy ndaty mirehake ama’areo tie: ‘Am-patrambey agne ty Kristy, le ko mandeha mbeo.’ Ko inoagne ka naho misy manao izao tie: ‘Amy ty efetse agnate’e amy i tragnoy ao reke.’ 27 Manahake o helatse boake atignanagne agne mazava hatrake ahandrefagne agneo, ty ho fagnatreha i Ana o ndatỳ. 28 Amy ze misy faten-draha* agne ro hivoria o voromaherio.

29 “Afara i haoreagne amy ze fotoagne zaỳ, le avy le haiegne i masoandroy, tsy hagnomey hazavagne ka i volagney, vaho hopoke boake an-dagnitse ey o vasiagneo. Hohezegnezegnegne ka ty hery i lagnitsey. 30 Afara izay, le hiseho amy i lagnitsey ey ty famantaragne i Ana o ndatỳ. Le hijerajera ty tratra’e noho ty alahelo ty foko iaby amy ty tane toy. Hotrea iareo i Ana o ndatỳ ho avy amy i rahogney amy i lagnitsey ey, sady ho avy miarake amy ty heri’e naho ty voninahi’e. 31 Naho fa tiofegne mafe i trompetray, le hagnirake o anjeli’eo reke mba hamory ze ndaty jinobogne, boake amy ty tane toy iaby* naho boake amy ty ifotora i lagnitsey agne hatrake amy ty ifaragna’e agne iaby.

32 “Mandrambesa fianaragne boake amy ty fagnoharagne miomba o fihamio* toy: Naho vaho misy rave’e mitiry ty amy i sampa’e miboakey eo, le hai’areo fa ho avy i asaray. 33 Hoe izay ka, fa naho fa mahatrea i raha iaby rey nareo, le fantaro fa marine reke sady fa an-dalagne eo. 34 Volagneko ama’areo to vata’e, fa tsy hofoagne ty taranake toy, amparake ty hisehoa ze raha zay iaby. 35 Hofoagne i lagnitsey naho ty tane toy, fa ty raha rehafeko tsy ombia hofoagne.

36 “Naho ty miomba ze andro naho ze lera zay, le tsy misy mahay aze, ndra o anjely an-dagnitse agneo, ndra i Anakey, naho tsy i Rae avao. 37 Hanahake ty tamy ty andro i Noa ty fagnatreha i Ana o ndatỳ. 38 Tamy i Ranobeỳ mbe tsy niavỳ, le nihinagne naho ninogne o ndatio, nagnenga vao naho nengaem-bao, amparake ty niavia i andro nidira i Noa tagnate i sambobeỳ* aoy. 39 Tsy nidarea iareo ty raha nirey iareo naho nitrea iareo, amparake ty niavia i Ranobey namaoke iareo iabỳ. Le hanahake izay ka ty fagnatreha i Ana o ndatỳ. 40 Hisy lahilahy roe ty an-teteke agne, ty raike handesegne, le ty raike hengagne. 41 Hisy ampela roe higosa vare amy ty vato figosam-bare ahodigne tagnagne. Ty raike handesegne, le ty raike hengagne. 42 Miambena lognandro areke nareo, satria tsy fanta’areo ty andro hiavia i Tompo’areoy.

43 “Faie tadidio’areo ty raha raike toy: Naho nihay i tompon-tragnoy tie amy fire ty lera hiavia i mpangalatsey, le tsy ho niroro reke, fa niambegne i tragno’ey avao mba tsy hovakie i mpangalatsey. 44 Mivognona soa ka areke nareo, satria ho avy amy ty lera tsy eretserete’areo i Ana o ndatỳ.

45 “Ia maregne moa i mpanompo azo atokisagne naho mahimbagne, tinendre i tompo’e hikarakara ty mpanompo an-tragno’e aoy sady hagnomey iareo hanegne amy ty fotoagne ipalià iareo azey? 46 Sambatse ze mpanompo zay, naho zoe i tompo’ey manao ty asa’e naho fa avy reke. 47 Volagneko ama’areo to vata’e, fa hotendre’e hiandraikitse ty fanagna’e iaby reke.

48 “Faie naho raty fagnahy i mpanompoy, sady hoe reke am-po’e ao tie: ‘Tara i tompokoy zay!’, 49 le manomboke mijera o mpanompo hafao reke, sady mifanehake ty fihinagne naho ty finon-toake miarake amo o ndaty mamolavao, 50 le ho avy amy ty andro tsy ampoize ze mpanompo zay naho amy ty lera tsy fanta’e i tompo’ey. 51 Hosazea i tompo’ey mafe ze mpanompo zay, sady haharo’e amy ty toeragne misy o mpanao soa miatrekeo agne. Agne reke ro hangoihoy ty tagny naho hampikodri-nife.