Hoahy o Kolosianao
4 Inareo tompo, le manoa ty maregne naho ty rare’e amy ty mpanompo’areo, satria hai’areo fa ndra inareo ka managne Tompo an-dagnitse agne.
2 Mahareta amy ty vavake, satria ty fanoagne izay ro hahavy anareo hifoha avao sady manoa vavake fisaoragne. 3 Amy inareo manao izaỳ, le mivavaha ka ho anay, amy izay hisy lalagne hosokafen’Agnahare hoahy i saontsỳ, mba hahafaha’ay magnambara ty raha mietake masigne miomba i Kristy, i mahavy ahy hirohy seny am-pigadrako atoy. 4 Amy izay ka mba hagnambarako aze amy ty fomba mazava soa, arake ty toko’e hataoko.
5 Manoa raha aman-kilala naho fa mifandrambe amy ty ndaty ivela’e ey sady ampiasao soa ty fotoa’areo. 6 Anò’areo mahafinaritse avao ka ty reha’areo, manahake o laoke voatsahatsahatse soa ty sira’eo, amy izay hohai’areo ty fomba hamaleagne ty ndaty tsikiraidraike.
7 I Tikiko, rahalahy teako sady mpanompo azo atokisagne naho mpiara-manompo amy i Tompo ao, ro hirehake ama’areo ze vaovao iaby miomba ahy. 8 Hiraheko ama’areo agne reke, amy izay hohai’areo tie, manao akore zahay sady amy izay ka reke hampionogne ty fo’areo. 9 Hiarake ama’e ka ty Onesimosy, i rahalahiko teako sady tsy mivalike, boake ama’areo agney. Iareo ty hirehake ama’areo ze raha iaby miseho atoy.
10 Manao veloma anareo ty Aristarko mpiarake migadra amako, naho i Marka, i rahalahy i Barnabasỳ* (fa nahazo toromarike nareo mba handrambe aze soa naho fa avy ama’areo agne reke), 11 naho i Jesosy, i tokavegne tihoe Josto-y, i agnisa ty mitapakey. Iareo avao ty mpiara-miasa amako mba hanohagne i Fanjakàn’Agnaharey sady iareo ty nanjare fampaherezagne lahibey ho ahy. 12 Mampamangy anareo ty Epafra, i mpanompo i Kristy Jesosy boake ama’areo agney. Mivavake mafe lognandro ho anareo reke, mba ho matotse avao nareo sady hatoky tanterake ty zoton’arofon’Agnahare iaby. 13 Iraho ty vavolombelogne, fa mikezake mafe reke noho ty ama’areo naho hoahy ze a Laodikia agne vaho hoahy ze a Hierapolia agne.
14 Mampamangy anareo ty Lioka, i dokotera teagney naho i Demasy. 15 Mampamangy amy ty rahalahy a Laodikia agne naho amy i Nimfa vaho i fiangonagne mivory an-tragno’e aoy. 16 Naho fa vita vaky ama’areo eo ty taratasy toy, le manoa fandaharagne mba hamakiagne aze ka amy ty fiangonagne a Laodikia agne. Anò’areo ka ty hamakiagne i boake a Laodikia agney. 17 Rehafo’areo ka ty Arkipo tie: “Mikezaha hamita soa i fanompoagne nirambese’o amy i Tompo aoy.”
18 Itoy ty fanoam-beloma nisorate ty tagnako izaho Paoly. Anò’areo an-tsaigne avao ze firohizako seny am-pirizò atoa zao. Ho ama’areo abey i hasoa fagnahy miambakey!